Hatutan.com, (20 Jullu 2023), Díli- Asistente Ministru Negósiu Estranjeirus Repúblika Populár Xina, Nong Rong husu atu Timor-Leste apoiu Polítika “The one China policy” ne’ebé iha estatutu polítika Xina nian, katak Taiwan hola parte bá Xina.

Prezidente Repúblika José Ramos-Horta hasoru malu ho Asistente Ministru Negósiu Estranjeirus Repúblika Populár Xina, Nong Rong iha Palásiu Prezidensiál, Kinta (20/07/2023). Foto/Elio dos Santos da Costa

Asistente Ministru Negósiu Estranjeirus Repúblika Populár Xina, Nong Rong hateten kontente tebes, hamutuk ho delegasaun hasoru malu ho Prezidente Repúblika, José Ramos-Horta hodi hato’o mós kumprimentu hosi Prezidente Repúblika Populár Xina Xi Jinping bá Xefe Estadu Timor Leste.

Prezidente Repúblika José Ramos-Horta mós fó hato’o kona-ba relasaun bilaterál entre Timor-Leste ho Xina ne’ebé lao ona iha tempu naruk.

Prezidente Ramos-Horta vizita Xina iha 1976 no liuhosi sorumutuk ne’e, Ramos-Horta halo sumáriu ida hodi hato’o espetasaun bá relasaun Timor-Leste ho Xina, partikularmente bá dezenvolvimentu bilaterál desde Timor-Leste restaura nia independénsia iha 2002.

Advertisement

“Ha’u ho ha’u nia kolega sira kontente tebes hodi haree atinjimentu bo’ot iha Timor-Leste durante tinan 20 liubá. Ami mós satisfeitu ho relasaun bilaterál Xina ho Timor-Leste iha tinan 20 laran. Ami mós orgullu, ami bele fó asisténsia tuir saida mak ami bele bá maun no alin sira iha Timor-Leste,” Nong Rong hateten.

Edifísiu ida ne’ebé agora ita hamriik bá daudaun, Palásiu Prezidensiál konstrui ho asisténsia Xina nian. Iha tempu naruk Xina no Timor-Leste, mutuanente fó apoiu ba malu.

“Ami rekomenda atu Governu Timor-Leste fó apoiu ba polítika “The one china policy” katak Taiwan sempre parte hosi Xina. Polítika Xina nian ida de’it no hanoin katak, estatutu ne’ebé Taiwan mak parte hosi Xina,” Nia subliña.

Iha okaziaun internasionál sira nasaun rua Xina no Timor-Leste ne’e sempre fó apoiu bá malu, no serbisu hamutuk ba interese komún entre nasaun rua.

“Ami fiar katak liu husi lideransa Xefe Estadu na’in rua, Xina no Timor-Leste sei halo progressu bo’ot liu iha futuru. Ami espera katak relasaun bilaterál entre nasaun rua sei la hotu no laiha rohan, no dezenvolvimentu iha Timor-Leste sei hetan rezultadu bo’ot,” nia tenik.

Advertisement

Iha enkontru ne’e Prezidente Repúblika José Ramos-Horta hato’o bá Asistente Ministru Negósiu Estranjeirus Repúblika Populár Xina, Nong Rong oinsá nia halo interasaun ho parte Xina nian hafoin tinan 1976 no fó mós prinsípiu orientasaun balun no opiniaun di’ak bá relasaun di’ak entre nasaun rua ne’e no entre Ministeriu Estranjeiru rua ne’e.

Jornalista: Vito Salvadór

Advertisement