Hatutan.com, (31 Dezembru 2023), Díli- Arsebispu Arkedioseze Metropolitana Díli, Dom Virgílio Kardeal do Carmo da Silva, hateten kalan ikus tinan 2023 nu’udár momentu oportunu bá sarani Katólika atu hamutuk agradese bá Maromak no harohan husu pás ba mundu rai-klaran atu ema hotu moris iha hakmatek nia-laran.

Lee Mós: Parókia Uatolari La Selebra Misa Kalan 31 Dezembru ho 01 Janeiru 2024

Arsebispu Arkedioseze Metropolitana Díli, Dom Virgílio Kardeál do Carmo da Silva, SDB. Foto/Dok

Arsebispu Arkedioseze Metropolitana Díli, Dom Virgílio Kardeál do Carmo da Silva iha omilia ba missa agradesimentu tinan tuan 2023 ne’ebé hala’o iha igreja Parokia Katedrál Imaculada Conceição Vila Verde, Dili, Domingu (31/12/2023) hateten, ohin kalan hanesan momentu ida bá ema sarani Katólika atu hola konsiensia ho tempu ne’ebé Nai Maromak haraik bá ema ida-idak. Hanesan iha leitura ne’ebé dehan buat hotu iha nia tempu, iha tempu atu moris, iha mós tempu atu mate, iha tempu atu kuda nune’e mós iha tempu sohi ka koilleta, iha tempu atu tanis no iha mós tempu atu hamnasa, buat hotu tuir nia tempu no Maromak fó bá ema tempu hotu-hotu tuir kondisaun no esforsu ne’ebé ema halo.

Ho situasaun ne’ebé iha hatudu mai ema katak moris ne’e iha tempu ida nia laran, Maromak deit mak laiha tempu tamba hanaran eterna, la iha hun no la iha rohan.

“Ita ema moris iha tempu ida nia laran, iha períodu ida-ne’e mak Maromak fó mai ita atu ita ida-idak hakerek ita-nia istória, no atu hakerek istória ne’e ho di’ak, Maromak haraik bá ita buat ida liberdade atu ita ida-idak uza nia liberdade to’o másimu, maibé iha liberdade ne’ebé iha ezije ita-nia responsabilidade atu lori liberdade ne’e tuir dalan los hodi kria pás bá ita an rasik, bá ema seluk, komunidade no bá mundu rai klaran,” Arsebispu Arkedioseze Metropolitana Díli Dom Virgílio Kardeal do Carmo da Silva hateten.

Nia hateten, Maromak sei husu konta bá buat hotu ne’ebé ema halo, no buat hotu ne’ebé ema halo tenke responsabiliza ho konviksaun tomak, dalaruma hanesan ema ita halo buat ruma iha nakukun laran, ema subar no la iha responsabilidade maibé Maromak ne’ebé omnipotente haree no hahalok ne’ebé ema halo, ida-idak sei hatan ba buat sira ne’e hotu.

Dom Virgílio Kardeál afirma dala barak moris iha rai ne’e halo ema ta’uk liu lei duke Maromak. Iha Timor karik ema ta’uk liu atu bá prizaun Becora ho Gleno duke atu hatán bá Maromak. Iha krime barak ne’ebé ema halo, maibé ema subar no halai, hanesan dala barak ema oho tiha ema ruma, halai lakon bá subar, ikus mai rona deit dehan autor deskonesidu, iha bebe oan balun ne’ebé moris hosi inan ho aman ne’ebé la iha responsabilidade bá husik hela iha lixu, iha dalan no ema la hatene se mak halo asaun sira ne’e.

“Maluk sira ita bele halai husi justisa rai ne’e nian, maibé ba Maromak ita sei labele subar buat ida, ita halai husi justisa ema nian, maibé ita sei la bele no sei la halai husi justisa Maromak nian,”  Arsebispu tenik.

Iha kalan ikus, nia husu atu harohan bá Na’i Maromak, husu tulun atu timoroan hotu-hotu hahú husi ki’ik oan sira, adolexente, katuas no ferik, atu hotu-hotu kuda iha fuan no laran sentidu responsabilidade.

Kalan ida ne’e tenke sai mos hanesan momentu atu sarani Katólika hotu hola mos importánsia ba tempu ne’ebé Nai Maromak fo ba ema ida-idak. Momentu ida ne’e lori ema ba hatene kona-bá lia los, ema moris iha sirkunstansia ida mak tempu.

“Mai ita reza atu husik tia tinan tuan ida ne’e, hodi husik lia falsu no lia bosok ba ho tinan tuan, atu iha tinan foun ne’e ita bele loke an ba lia los, tamba Jesus radik mak dehan lia los mak sei liberta, laos lia bosok,” Nia dehan.

Arsebispu Arkedioseze Metropolitana Díli ne’e subliña iha kalan ikus ne’e mós hanorin ema atu hatene agradese bá Maromak tamba fó ona tempu bá  ema. Agradese bá di’ak ne’ebé Maromak fó ba ema ida-idak durante tinan 2023 to’o mai kalan ida ne’e.

Oras ikus iha momentu ida ne’e, sai netik kalan agradesimentu nian ba Nai Maromak ne’ebé fo mai povu doben iha Timor-Leste liberdade, unidade, domin no pás.

Agradese bá Maromak ba ita-nia fiar, lisan no kultura ne’ebé halo ema Timoroan sente orgullu ho identidade nu’udár Timoroan no hamrik metin iha rai ne’e no iha povu seluk nia let ho firmeza.

“Ita agradese tan Maromak sei fó tan tempu ba ita ida-idak atu rekoñese no buka hatene lia los,” Dom Virgílio Kardeál do Carmo da Silva hateten

Tuir observasaun Hatutan.com iha igreja Parokia katedral Imaculada Conceição Vila Verde hatudu katak sarani Katólika sira hotu ho fiar no devosaun partisipa iha selebrasaun missa asaun de grasa.

Jornalista: Vito Salvadór