Hatutan.com, (27 Jullu 2023), Díli—Primeiru-Ministru (PM), Kay Rala Xanana Gusmão bolu atensaun ba Ministériu Interiór (MI) no Polísia Nasionál Timor-Leste (PNTL) atu halo atuasaun direta bá kazu na’ok telefone ne’ebé prezudika órden públika iha sidade Díli loron hirak ikus ne’e, hodi garante páz no estabilidade.

Polisia kaer ona joven mane na’in-9, tanba deskonfia durante ne’e sempre na’ok ema nia sasán iha kapitál Díli, Kuarta (26/07/2023). Foto/Elio dos Santos da Costa.

“Ha’u bolu atensaun ba polísia, bolu atensaun ba Ministru Interiór hodi haree ba ida-ne’e,” Kay Rala Xanana Gusmão hateten iha Palásiu Prezidensiál Nicolau Lobato Bairru-Pité, Kinta (27/07/2023).

Lee Mós: Autoridade Detein Joven Na’in-9 Deskonfia Na’ok Sasán Iha Díli

Xefe Governu husu atu servisu seguransa tenke másimu, hodi halo identifikasaun ba fatin sira ne’ebé akontese perturbasaun no fó ameasa boot ba órden públika.

“PNTL tenke buka haree iha ne’ebé mak akontese  buat sira ne’e no kaer ema sira ne’e hatama iha kadeia nune’e ita bele iha pás no seguru,” Kay Rala Xanana Gusmão subliña.

Iha Kuarta (26/07/2023) kalan otl,  forsa konjunta kompostu hosi Polísia Nasionál Timor-Leste (PNTL), Komandu Munisípiu Díli, Unidade Espesiál Polísia (UEP), Servisu Informasaun Polísia (SIP), FALINTIL Forsa Defeza Timor-Leste (F-FDTL), Servisu Informasaun Militár (J2 ho N2), inklui Servisu Nasionál Intelijénsia nian (SNI), kaer joven mane na’in-9, tanba deskonfia durante ne’e sempre na’ok ema nia sasán iha kapitál Díli.

Joven na’in-9 ne’e, autoridade seguransa kaer iha fatin ne’ebé la hanesan, iha área juridisaun Díli nian.

Jornalista: Vito Salvadór