Hatutan.com, (03 Agostu 2023), Díli-Polísia Nasionál Timor-Leste (PNTL), Kuarta loraik (02/08/2023), kaptura ona kondenadu ho inisiál VdJFB iha área Suku Tirilolo, Postu Administrativu Baucau Villa, Munisípiu Baucau.

Lee Mós : Kazu Omesídiu Elemloi, Arguidu HSM Alegadu Prizaun Preventiva

Kondenadu VdJFB bá kazu asédiu seksuál  hetan ona pena prizaun tinan-hitu (7) liuhosi audiénsia primeira interrogatóriu Tribunál Judisiál Primeira Instánsia Díli (TJPID) iha loron 05 fulan-Juñu 2023, maibé kondenadu la koopera no halai lakon hosi justisa.

Polísia kaptura kondenadu kazu asédiu seksuál. Foto/Elio dos Santos da Costa

Kazu krime asédiu seksuál ne’e akontese Postu Administrativu Metinaro, Munisípiu Díli, iha loron 15 fulan-Novembru 2016, bainhira kondenadu  VdJFB bá kaer vítima ho inisial J (tinan 10) nia isin-lolon sensitivu bainhira vítima toba hela iha nia kuartu laran.

Ho hakfodak, vítima hadeer hosi fatin toba   informa  kedas  atitude VdJFB nian ne’e bá nia inan-aman ho família sira. Nune’e, família keixa bá iha Eskuadra Polisia Metinaro área jurisdisaun Komandu Polisia Nasional Timor-Leste (PNTL) Munisípiu Díli.

Hatán bá keixa ne’e, iha tempu ne’ebá, investigadór sira bolu kedan suspeitu VdJFB, hodi bá halo identifikasaun no mós investigasaun. Hafoin ida ne’e, Investigadór sira remete kedan autu ka prova sira bá iha Ministériu Públiku (MP), nu’udár na’in bá asaun penál, hodi kontinua prosesa kazu ne’e.

Iha loron 05 fulan-Juñu 2023, Tribunál Judisial Primeira Instánsia Díli (TJPID) hala’o prosesu primeiru interrogatóriu judisial bá suspeitu VdJFB. Rezultadu hosi primeiru interrogatóriu judisial ne’e, Juiz sira deside hodi kondena arguidu ho pena tinan hitu (7) iha prizaun Becora.

Hafoin rona tiha desizaun ne’e, fó tempu bá arguidu fila bá uma, hodi halo preparasaun. Infelizmente, to’o iha uma, kondenadu deside halai lakon, ho razaun katak, lakohi simu konsekuensia legál ne’ebé Tribunál aplika hodi bá subar aan iha Baucau.

Ho aktu ida ne’e, Tribunál Díli, hasai Mandadu-Detensaun ho NUC : 0009/19.DIMTN, delega kompeténsia bá PNTL ninia ekipa sira iha Departamentu Investigasaun Kriminál (DIK), atu buka tuir kondenadu to’o hetan no lori kedan bá kumpre kadeia tinan-hitu.

Hatán bá Mandatu-Detensaun hosi Tribunál ne’e, Ekipa DIK konjunta ho Komandu PNTL Munisipiu Baucau, reforsa hosi Servisu Informasaun Militár (SIM/J2), kaer duni kondenadu iha ninia rezidénsia, lokaliza iha área Suku Tiriolo, Postu Administrativu Baucau Vila, Munisípiu Baucau.

Forsa konjunta evakua kedan bá iha PNSIC hodi submete bá iha sertifikasaun, no transporte kedan kondenadu bá prizaun Becora.

Jornalista: Rogério Pereira Cárceres