Hatutan.com, (05 Agostu 2023), Díli—Ministru Justisa (MJ), Amandio de Sá Benevídes ho ekipa arranka ona bá nasaun Finlándia, iha Sábadu (05/08/2023) tuku 09:00 dadeer otl,  hodi halo aprovasaun finál bá kaderneta pasaporte Timor nian hamutuk 16.000 atu nune’e, kompañia bele hahú impríme.

Ministru Justisa, Amandio de Sá Benevídes semo ona ba Finlándia ho aviaun AERO DILI TIMOR-LESTE (Build the Nation) 4W-AAL, iha Sábadu (05/08/2023) hodi halo aprovasaun finál bá kaderneta pasaporte Timor nian hamutuk 16.000 atu kompañia bele hahú impríme. Foto: Média MJ.

“Ohin ita dezloka bá Finlándia liuhosi Bali. Atu bá haree hodi halo aprovasaun finál, depois ita atu bele halo asinatura ikus liu nune’e fó biban bá kompañia produtór atu sira bele halo produsaun,” Amandio de Sá Benevídes hateten iha Sala VIP, Aeroportu Internasionál Nicolau Lobato, Comoro-Díli, Sábadu (05/08/2023).

Hatán kona-bá data fixu ne’ebé Governu sei transporta mai TL iha Setembru, Ministru Justisa ne’e dehan, hein produsaun, tanba buat ne’e iha relasaun ho seguransa ninian, ema tenke haree pájina pur pájina.

“Pájina oin, security sheep mak dala-ruma tenke monta pájina pur pájina, ninia book letter, tenke halo fali livriñu ne’e entaun presiza tempu oitoan. Ita hein katak, ko’alia ho sira atu bele hakaas an. Ita hein katak mais-tarde fim Setembru ita bele hetan ona pasaporte,”  Ministru Amandio garante.

Produsaun dahuluk bá kaderneta pasaporte TL nian ho totál 16.000 ne’e, baze orsamentu ne’ebé Governu anteriór tau tiha kedan ona iha Orsamentu Jerál Estadu (OJE) tinan 2023 nian hamutuk $212.000.

“Ita prodús kedan ona 16.000 kaderneta pasaporte, lori hirak ne’e konforme kargo. Tanba pasaporte ne’e ita lori ho seguransa tebtebes, embalájen tenke di’ak, seguransa iha dalan, buat sira ne’e ita bele evita. Karik bele lakon iha dalan. Buat ida ita ansi ne’e, buat hothotu ne’e tenke haree kestaun segurasa, tanba ne’e la’os sasán baibain, mais ne’e pasaporte ida ke folin hanesan mós osan-mean,” nia hateten.

Iha Orsamentu Retifikativu (OR) foin lalais ne’e, IX Governu Konstitusionál aprova tán atu iha kedan tinan ida-ne’e, bele halo tán akizisaun bá kaderneta pasaporte ne’ebé bele to’o 70.000-resin, tanba 16.000 de’it sei la to’o.

“Atu nune’e bele responde nesesidade ne’ebé mak oras ne’e difísil tebtebes iha rai-laran,” nia subliña.

Ministru Amandio informa mós katak, kaderneta pasaporte Timor nian ne’ebé atu prodús daudaun ne’e, muda oitoan de’it mak iha ninia plataforma, tanba kestaun seguransa no modelu.

Ezemplu konkretu, uluk kadernéta pasaporte bá Diplomata sira ne’e ho kór verde, maibé agora muda bá kór metan.

“Mudansa ne’e tanba ita hakarak hili kór ne’ebé mak komfortável. Ne’e ita hakarak. Tipu pasaporte ne’e maka, ida pasaporte komún, pasaporte servisu, pasaporte estranjeiru no mós pasaporte diplomátiku,” Ministru Amandio esplika tán.

Iha OJE 2023 ne’ebé Governu anteriór prevee no aprova ho totál millaun $2,8. Tanba ne’e, IX Governu halo ezersísiu atu hamenus bá millaun $2,1 bá iha OR. Maibé, Ministru Amandio dehan, osan bá akizisaun pasaporte nian, sei la hatun, Governu prevee hela osan atu bele akiza, kadernéta pasaporte to’o 73.000.

Molok ne’e, kontratu ne’ebé VIII Governu liuhosi Eis Ministru Justisa (MJ), Tiágo Amaral Sarmento, kontrata ona Kompañia Internasionál Visi Mitra ho Thales, atu responsabiliza bá hatama kaderneta pasaporte TL nian no kontratu ne’e asina ona pluri anuál, katak 2023 to’o 2025.

Jornalista: Rogério Pereira Cárceres