Hatutan.com, (07 Agostu 2023), Díli-Sekretáriu Estadu Komunikasaun Sosiál (SEKOMS), Expedito Dias Ximenes ho ekipa tékniku sira sei haree fila-fali prosesu hotu kona-bá projetu harii torre tolu iha Munisípiu tolu bá Rádiu Televizaun Timor Leste, Empreza Públiku (RTTL,E.P)  ho mós projetu konstrusaun estúdiu multi-funsaun RTTL,E.P.

Lee Mós : SEKOMS Sei Forma Ekipa Inspesaun bá Projetu Torre RTTL,E.P Gasta Millaun $1.4

Atu  atinje polítika VIII Governu Konstitusionál nian iha prosesu dijitalizasaun Rádiu Televizaun Timor Leste, Empreza Públiku (RTTL,EP), Ministériu Asuntu Parlamentár no Komunikasaun Sosiál (MAPKOMS)  harii tán torre-tolu (3) iha munisípiu-tolu (3) ho uma-rua (2) bá kada torre.

Sekretáriu Estadu Komunikasaun Sosiál (SEKOMS), Expedito Dias Ximenes. Foto/Elio dos Santos da Costa

Projetu harii torre-tolu (3) ho uma-rua (2) bá kada torre ne’e gasta orsamentu Estadu ho montante millaun $1-resin, ne’ebé ministériu implementador maka Ministériu Asuntu Parlamentár no Komunikasaun Sosiál (MAPKOMS) estabelese kontratu servisu ho kompañia Global Citra Tama hosi Indonézia.

Atu prepara tan infrastrutura ne’ebé di’ak bá projetu dijitalizasaun RTTL,E.P ne’ebé sai mós projetu ambisaun iha programa VIII Governu Konstitusionál nian ne’e,  Governu liuhosi MAPKOMS estabelese kontrata ida ho empreza kontraktor  BANIR LEMA UNIP.LDA hodi harii edifísiu multi-funsaun RTTL,E.P ho valor orsamentu millaun US$1-resin.

Iha mandatu XI Governu ne’e, SEKOMS Expedito Loro Dias Ximenes, hateten, nia parte sei forma ekipa konjunta ida hodi halo averiguasaun ka haree fila-fali bá regra sira kona-bá projetu harii torre tolu iha Munisípiu Lautém, Ainaro no Bobonaro.  Maibé, ekipa ne’e SEKOMS sei forma, hafoin rona aprovasaun finál bá Orsamentu Retifikativu iha Parlamentu Nasionál (PN). 

Ekipa tékniku bá haree fila-fali obra ka legacy MAPKOMS nian  sei envolve mós ho tékniku sira hosi Ministériu Obras Públikas  (MOP), Ajensia Dezenvolvimentu Nasionál (ADN) inklui dirijente sira iha RTTL,E.P  tanba sira mak sai na’in ka benefisiáriu bá projetu refere.

“Agora, ami atu forma ekipa ne’e, hosi SEKOMS, Obras Públikas,  ADN hosi RTTL, atu haree. Depois orsamentu retifikativu hotu tiha iha parlamentu, ami sei forma ida, depois ekipa ne’e sei tun bá haree to’o iha ne’ebé nia prosesu. Tanba relatóriu ne’ebé ami hetan, katak, orsa ne’e to’o ona 55%. Agora, loos ka lae 55%. Tanba ne’e maka, ami presiza haree halo averiguasaun, atu haree fila-fali,” Expedito Dias Ximenes hatán bá Hatutan.com iha Palásiu Governu, Díli, Segunda (07/08/2023).

Tuir nia, bainhira ekipa konjunta ne’e estabelase ona, bá la’os atu halo fali auditória, maibé atu halo de’it averiguasaun, katak bá haree fila-fali regra no ninia prosesu sira kona-bá projetu harii torre tolu ne’ebé Governu anetior liuhosi Ministériu bá Asuntu Parlamentár no Komunikasaun Sosial (MAPKOMS) lansa iha tempu liubá.

“La’os auditória, lae. Governu, atu halo averiguasaun. Atu haree fila-fali, loos ka lae, projetu konstrusaun torre tolu iha Lautém, Bobonaro ho Ainaro ne’e la’o duni tuir regra ka lae.  Ida ne’e, la’ós investigasaun. SEKOMS sei kria ekipa ida, atu halo averiguasaun, katak, atu haree fila-fali projetu konstrusaun torre tolu ne’ebé Governu anterior halo hela konstrusaun, no agora entrega hela mai IX Governu,” Expedito Dias tenik.

Konstrusaun Edifísiu RTTL Extende Ona bá Dala-tolu

Konstrusaun edifísiu foun bá funsionáriu no Profesionál sira komunikasaun sosial nian iha RTTL,E.P, to’o oras ne’e seidauk finaliza, no parte kontratór husu bá IX Governu Konstitusionál liuhosi SEKOMS atu extende bá dala-tolu, katak fó tán tempu bá kompañia atu aselera projetu ne’e.

Iha Tersa, 28 fulan-Juñu 2022, VII Governu Konstitusionál liuhosi MAPKOMS, Franciso da Costa Pereira Jerónimo, asina ona kontratu ho diretór Kompañia BANIR LEMA UNIP.LDA, Domingos Sequeira, nu’udár kompañia kontratór. Iha tempu ne’ebá, na’in bá kompañia kompromete katak, Projetu konstrusaun edifísiu “provizóriu” foun RTTL,E.P ne’e, sei finaliza iha fulan-neen (6) nia laran, sura hosi fulan-Juñu to’o fulan-Dezembru 2022. Maibé, obra ne’e la konsege hotu tuir tempu ne’ebé dereminadu. Nune’e, na’in bá kontratór hato’o fila-fali pedidu bá IX Governu Konstitusionál liuhosi SEKOMS, husu autorizasaun atu bele extende ka hanaruk konstrusaun projetu ne’e bá fulan-neen (6) tán, kontinua fali hosi Dezembru 2022 to’o Juñu 2023.

Liu tiha ona fulan-Juñu 2023, projetu ne’e seidauk termina tanba ne’e, parte kontratór, liuhosi diretór kompañia BANIR LEMA UNIP.LDA, Domingos Sequeira, husu SEKOMS atu extende tán durasaun tempu servisu nian bá fulan-neen (6) tán hosi fulan-Juñu 2023 to’o fulan-Marsu 2024.

“Projetu Governu anterior nian, ne’e mak ohin ha’u dehan, ami nafatin mós halo averiguasaun, haree fali took oinsá. Mais, ita hein katak, projetu ne’ebé la’o dadaun, bele hotu tuir extensaun ne’ebé mak sira husu, no tuir prezidente RTTL, katak, ida ne’e sei hotu iha fulan-Marsu 2024,” SEKOMS  Expedito Dias Ximenes haktuir.

Hafoin simu pose iha loron 01 fulan-Jullu 2023 no iha loron tuir mai, SEKOMS Expedito Dias Ximenes ho ekipa halo kedan vizita traballu dahuluk  bá RTTL,E.P hodi haree besik liután servisu iha média estatál ne’e nian.

To’o iha ne’ebá, SEKOMS Expedito haree katak, konstrusaun bá edifísiu “provizóriu” foun RTTL,E.P nian ne’e, la’o neneik loos. Mais, hafoin nia halo tiha vizita ida ne’e, Expedito hetan relatóriu hosi Prezidente RTTL,E.P, José António Belo, katak, hafoin vizita ne’e, projetu ne’e la’o maka’as fali.

“La’o maka’as tiha ona, no sira promete katak, sei hotu iha fulan-marsu 2024. No tanba estúdiu multi-funsaun, ida ne’e, importante bá RTTL, no sira aselara, ita hein katak, to’o fulan-Marsu 2024, bele hotu,” Expedito Dias hateten.

MAPKOMS Halo Ona Termu Entrega

Hatán kona-bá informasaun katak, to’o oras ne’e, eis MAPKOS, Francisco da Costa Pereira Jerónimo, seidauk halo handover ka termu entrega bá SEKOMS, loos ka lae, SEKOMS Expedito dehan, informasaun ne’e laloos, tanba iha loron 03 fulan-Jullu foin lalai, eis-Ministru Francisco Jerónimo, halo kedan ona termu entrega.

“Entrega tiha ona. Ne’e sala. Kuandu iha dia 03 fulan-Jullu, ne’e entrega tiha ona, entrega ho relatóriu, tantu hosi SEKOMS, MAPKOMS, entrega mai ha’u hanesan SEKOMS, ho vise señor Adérito Hugo. Purtantu, entrega tiha ona, relatóriu eskrita, no entrega termu de entrega iha fatin ida ne’e duni,” Expedito informa.

Jornalista: Rogério Pereira Cárceres