Hatutan.com, (08 Agostu 2023), Díli—Mandatu IX Governu Konstitusionál fó prioridade bá Timor Leste (TL) ninia adezaun bá organizasaun rejionál  Association of Southeast Asian Nations (ASEAN).

Vise-Primeiru Ministru no Ministru Koordenadór Assuntu Ekonómiku no Ministru Turizmu no Ambiente, Francisco Kalbuadi Lay.

“Klaru katak, IX Governu Konstitusionál nia prioridade barak, liu-liu desentralizasaun, nune’e mós ita iha komprimisu dada kadoras mai Timor, maibé fó mós prioridade adezaun bá ASEAN liuliu iha preparasaun rekursu umanu. Ita sei haree mós bá ekonomia pequena no mós médiu,” Vise-Primeiru Ministru no Ministru Koordenadór Assuntu Ekonómiku no Ministru Turizmu no Ambiente, Francisco Kalbuadi Lay  hateten hafoin enkontru ho Embaixadór Malázia iha Timor-Leste, Amarjit Sarjit Singh  iha edifísiu MT Faról, Tersa (08/08/2023).

Lee Mós: Xanana Berharap Pemimpin ASEAN Mencari Solusi Penyelesaian Konflik di Myanmar

Vise-Primeiru Ministru no Ministru Koordenadór Assuntu Ekonómiku no Ministru Turizmu no Ambiente, Francisco Kalbuadi Lay simu audiénsia ho Embaixadór Koreia Súl iha Timor-Leste, Shin Mantaek iha edifísiu MT Faról, Tersa (08/08/2023). Foto: Elio dos Santos da Costa.

Kona-bá deklarasaun Primeiru-Ministru Kay Rala Xanana Gusmão kona-bá Timor-Leste nia adezaun ba ASEAN, Francisco Kalbuadi Lay hateten Primeirú Ministru hanesan ema ida desde uluk kedan iha ai-laran, nia luta, nia personalidade importante mak nia programa pró demokrasia no mós nia defende Diretu Umanu.

“Ida-ne’e nia ko’alia hanesan mós avó, maun Xanana, mais ha’u fiar katak intensaun Primeiru-Ministru la’ós ida-ne’e, intensaun ne’e dehan katak, ita tama ba ASEAN sim, mais ita mós tenke haree iha área direitus umanus, ASEAN buat hotu-hotu ne’e konsensu ho koletivu ne’ebé ita mós tenke respeita dehan katak buat hotu-hotu iha ASEAN ne’e hanesan família boot ida buat hotu-hotu consensus,” Francisco Kalbuadi Lay esplika.

Adezaun bá ASEAN importante no simu orientasaun hosi Primeirú Ministru no Prezidente Repúblika rasik dehan katak, Ministru sira hotu-hotu tenke prepara iha área ida-idak nian ho didi’ak, antes tama ba ASEAN nian.

Malázia Hakarak Apoia Seitór Turizmu

Vise-Primeiru Ministru no Ministru Koordenadór Assuntu Ekonómiku no Ministru Turizmu no Ambiente, Francisco Kalbuadi Lay simu audiénsia ho Embaixadór Malázia iha Timor-Leste, Amarjit Sarjit Singh iha edifísiu MT Faról, Tersa (08/08/2023). Foto: Elio dos Santos da Costa.

Iha loron hanesan, Embaixadór Malázia iha Timor-Leste, Amarjit Sarjit Singh kompromete  atu apoia Timor-Leste iha seitór turizmu no ospitalidade hodi hadi’a ekonomia povu nian.

Amarjit Sarjit Singh konsidera enkontru ho Francisco Kalbuadi Lay ne’e importante hodi ko’alia kona-bá oportunidade sira ba servisu hamutuk iha futuru liuliu oferese kapasitasaun bá foin sa’e sira iha setór turizmu no mós ospitalidade.

Iha área ospitalidade sei sai hanesan área ida ne’ebé parte rua sei tau foku hodi tulun esforsu sira Timor-Leste nian, atu hetan rendimentu liuhosi otelaria.

“Ami mós ko’alia kona-ba maneira sira oinsá dada investór sira mai investe iha Timor-Leste, liu-liu investór sira hosi Malázia no ohin ha’u hateten katak seitór turizmu no ospitalidade mak sei sai foku importante atu hadi’a kresimentu ekonómiku povu nian,” Amarjit Sarjit Singh esplika.

Diplomata ne’e hato’o ona komitmentu ba Vise-Primeiru Ministru katak Malázia sei nafatin apoia esforsu sira Timor-Leste nian hodi lori investór sira mai duni iha ne’e atu halo investimentu iha área Turizmu no ospitalidade.

Malázia ajuda TL barak  ona dezde  ukun rasik aan hahú tinan 2002 to’o agora, no agora daudaun emprezáriu hosi Malázia lubuk ida mak iha vontade  boot tebe-tebes atu  mai kontribui liu-liu  iha área ekonómiku, Turizmu, ambiente ho buat sira seluk tán.

Koreia Súl mós Hakarak Kapasita Joven TL

Vise-Primeiru Ministru no Ministru Koordenadór Assuntu Ekonómiku no Ministru Turizmu no Ambiente, Francisco Kalbuadi Lay simu audiénsia ho Embaixadór Koreia Súl iha Timor-Leste, Shin Mantaek iha edifísiu MT Faról, Tersa (08/08/2023). Foto: Elio dos Santos da Costa.

Embaixadór Koreia Súl, Shin Mantaek mós hala’o enkontru ho Francisco Kalbuadi Lay hodi atualiza vontade bá IX Governu Konstitusionál ne’ebé hakarak estabelese kooperasaun atu transforma illa Ataúro bele sai hanesan illa Jeju iha Koreia Súl.

“Ita seidauk iha kooperasaun ida espesífiku iha seitór Turizmu maibé ita iha hela kooperasaun atu transforma illa Ataúro bele sai hanesan illa Jeju iha Koreia Súl,” Embaixadór Shin Mantaek hateten.

Iha fulan Maiu liu bá, Prezidente Repúblika José Ramos-Horta vizita ona illa Jeju no hasoru-malu ona ho maior Jeju nian no iha tempu besik sei mai Timor-Leste atu bele realiza kompromisu ne’ebé iha.

Koreia Súl nafatin iha komitmentu apoia formasaun ba joven Timoroan sira atu bele iha oportunidade hodi ba servisu iha Koreia Súl.

Lee Mós: BREAKING NEWS: ASEAN Simu Timor-Leste Hanesan Membru Bá Dala-11

Jornalista: Vito Salvadór