Hatutan.com, (08 Agostu 2023), VIQUEQUE- Populasaun iha área Kráras liu-liu iha Suku Bibileo, Uai-Mori no Uma-Kiik, Postu Administrativu Viqueque Vila, Munisípiu Viqueque to’o oras-ne’e kontinua enfrenta problema sosiál barak hanesan, la asessu bá fasilidade saúde, liña eletrisidade, estrada, eskola no mós bee-moos.

Edifísiu eskola ida iha Suku Bibileo, Postu Administrativu Viqueque Vila, Tersa (08/08/2023). Foto: Rogério Pereira Cárceres.

Xefe Suku Uai-Mori, Francelino António Gomes relata problema hirak ne’e bá Hatutan.com hafoin partisipa serimónia abertura Marsa FALINTIL nian iha Suku Bibileo, Postu Administrativu Viqueque Vila, Tersa (08/08/2023).

Lee Mós: F-FDTL Tenke Hamutuk ho Povu iha Kualkér Tempu

“Durante ne’e komunidade konsumu bee mota. Komunidade seidauk asesu bá eletrisidade. Iha de’it eskola primária ida. Ami nia estrada kondisaun grave tebes, tanba komunidade tenke hakur mota. Komunidade iha suku tolu ne’e la asesa bá postu saúde ruma, bainhira iha ema moras ruma mak atu bá halo tratamentu saúde tenke halai bá to’o iha Krarás Vila,” nia hateten.

Molok ne’e, autoridade lokál sira hato’o ona proposta bá administradór postu administrativu no Prezidente Autoridade munisípiu Viqueque, inklui parte relevante sira atu rezolve problema infra-estrutura, infelizmente laiha rezultadu.

Kona-bá situasaun seguransa iha área ne’ebá, Xefe Suku ne’e dehan situasaun hakmatek hela maski dalaruma mosu duni problema ki’ik-oan balun, liu-liu kona-bá hada’u-malu rai, hada’u-malu animál ruma, maibé konsidera ne’e problema ki’ik-oan no hanesan autoridade lokál sempre buka solusaun hamutuk.

Iha fatin hanesan Xefe Suku Bibileo, Vasco Soares husu Governu atuál atu valoriza Krarás nu’udár fatin istóriku bá Timoroan hotu.

Valorizasaun ida-ne’e, tenke hadi’a infra-estrutura bázika sira, hanesan estrada, eletrisidade, saúde, bee-moos, no problema sosiál seluk tán mak durante sira enfrenta.

“Fatin ne’e istóriku tebes. Ita-nia maluk sira mate barak  tánba ne’e presiza tebes duni atu hadi’a. Ita iha ona fatin atu harii monumentu ida iha Tahu-been, maibé udan-boot halo bee mota tuun, agora estraga hotu. Ne’ebé, husu bá parte relevante atu bele tau mós atensaun bá fatin sira ne’e,” Vasco Soares sujere.

Distánsia hosi Postu Administrativu Viqueque Vila bá Krarás besik kilómetru 7 no liu fali bá Suku Bibileo, besik kilómetru 10.

Totál populasaun iha Suku Suku Bibileo, Uai-Mori, Uma-Kiik hamutuk 2.000, hosi Uma-ka’in 525.

Suku sira iha Postu Administrativu Viqueque Vila mak hanesan, Bahalarauain, Bibileo, Caraubalo, Fatudere, Luca, Maluru, Uai-Mori, Uma Quic, Uma-Uain Craic no Uma-Uain Leten.

Jornalista: Rogério Pereira Cárceres