Hatutan.com, (28 Dezembru 2023), Viqueque– Eskola Ensinu Bazikú 08 Umu-Sege, Postu Administrativu  Uatulari, Munisípiu Viqueque, presiza tan sala bá aula nian ho presiza aumenta tan  númeru profesór.

Eskola Ensinu Bazikú 08 Umu-Sege, Postu Administrativu Uatulari, Munisípiu Viqueque. Foto/Zita Menezes

“Tinan agora ne’e iha ona desimu primeiru no segundu mós loke ona, maibé problema maka sala bá aula sei menus no profesor sira menus, tanba ne’e, ami ko’alia hamutuk halo ona proposta bá Ministériu Edukasaun, maibé seidauk iha resposta. Ami ho komunidade no veteranu sira hakarak husu sé bele harii tán sala aula bá Eskola Filial Ensinu Sekundária Jerál Sabika Besikulit, ne’ebé loke ona iha tinan kotuk iha Uatulari-Afaloicai, maibé presiza tebes tanba bainhira ami halo proposta loke eskola sekundária iha ne’e presiza aumenta mós profesór sira,” Diretór  Eskola, Manuel Alves bá Hatutan.com iha iha Uatulari, Kinta (28/12/2023).

Diretór Eskola ne’e husu Ministériu Edukasaun atu halo rekrutamentu no fó voluntáriu bá profesór sira iha eskola refére. Infelizmente, Ministériu Edukasaun “konjela” ona atu la bele iha tan profesór voluntáriu ona, nune’e profesor permanente mai hosi eskola ensinu sekundária Sabika Besikulit la to’o.

Total estudante hosi Eskola Ensinu Bazikú 08 Umu-Sege Uatulari  na’in-368, Ensinu  Sekundária na’in-74  no  profesór kontratadu na’in-lima (5), permanente  na’in-27.  Entretantu, Ensinu Sekundária, profesór baibain mai hosi Eskola Sekundária Jeral Sabika Besikulit maka mai apoiu.

Jornalista Estajiária: Zita Menezes