Hatutan.com, (17 Agostu 2023), Díli—Prezidente Repúblika (PR), José Ramos-Horta kondekora eskritór timoroan, Luís Cardoso de Noronha “Takas” ho Kolar Orden Timor-Leste (TL).

Prezidente Repúblika (PR), José Ramos-Horta kondekora eskritór timoroan, Luís Cardoso de Noronha “Takas” ho Kolar Orden Timor-Leste (TL), Kinta (17/08/2023). Foto : Elio dos Santos da Costa/Hatutan.com.

Dekretu-Lei númeru 20/2009, Orden Timor Leste nu’udár rekoñesimentu hosi Estadu bá sidadaun nasionál ka ema estrajeiru ne’ebé mak liu hosi sira-nia atividade profisionál, sosiál ka asaun espontánea nakonu ho korajen, fó kontribuisaun boot ba Timor-Leste, bá timoroan ka bá umanidade.

Lee Mós: Eskritór Timoroan Luís Cardoso, Vensedór Prémiu Oseanu 2021

Tanba ne’e, kondekorasaun ida-ne’e bazeia bá Dekretu Prezidente Repúblika númeru 74/2023, ho konsiderasaun Xefe Estadu bá Luís Cardoso ne’ebé dezempeña atividade sira ho importánsia as bá kauza autodeterminasaun no independénsia Timor-Leste, liu hosi knaar sira ne’ebé nia hala’o nu’udár reprezentante Konsellu Nasionál Rezisténsia Maubere (CNRM), iha Portugál, hodi servisu hamutuk ho reprezentante espesiál CNRM no Laureadu Nobel ba Pás, José Ramos-Horta.

Alende ne’e, Luís Cardoso mós hola parte iha delegasaun Rezisténsia Timoroan ne’ebé hasoru-malu ho antigu Prezidente Áfrika-du-Sul, Nelson Mandela, iha Lisboa, Portugál.

Iha mensajen Xefe Estadu gava “Takas” ne’ebé halo Timoroan hotu orgullu no hariku literatura timoroan nian.

Xefe Estadu espresa sentimentu orgullu katak, bainhira lee livru sira hosi hakerek-na’in “Takas” ne’ebé tradús bá lian oioin, iha nasaun barak no sai sujeitu bá krítika literaria iha jornál sira internasional nian.

“Ami rekoñese Luís Cardoso, la’ós de’it hanesan mestre-boot literatura Timor nian, maibé mós ba lian seluk hosi nasaun barak,” Ramos-Horta hateten iha diskursu kondekorasaun ne’ebé hala’o iha Salaun Xina Palásiu Prezidensiál Bairru-Pité, Kinta (17/08/2023).

Prezidente Repúblika (PR), José Ramos-Horta kondekora eskritór timoroan, Luís Cardoso de Noronha “Takas” ho Kolar Orden Timor-Leste (TL), Kinta (17/08/2023). Foto : Elio dos Santos da Costa/Hatutan.com.

Hafoin simu kondekorasaun ne’e, “Takas” konsidera katak, prémiu literáriu, buat ne’ebé akontese bá hakerek-na’in ida nia moris, bainhira fiar iha valór no kualidade hosi nia traballu.

Tanba ne’e, Kondekorasaun buat ne’ebé Estadu fó ba nia sidadaun ida, bá servisu sira relevante no nia rasik rekoñese katak la halo traballu relevante ida bá nia-rain durante tinan-20 liu bá, maibé presta de’it nia kontribuisaun bá ezisténsia literatura timoroan nian.

“Ha’u fiar katak, sedu ka tarde ita sei iha hakerek-na’in estraordionáriu iha Timor-Leste,” Luís Cardoso ko’alia ho fiar-an.

Luís Cardoso de Noronha “Takas” hakerek-na’in timoroan rekoñesidu internasionalmente no manán-na’in “Prémiu Oseanu” ida hosi prémiu literáriu respeitaduliu iha mundu luzófonu, hakerek ona livru hitu, inklui novella, kontu no ensaiu ne’ebé tradúz ba lian oioin. Iha nia obra sira, dala barak esplora tema sira hanesan funu, eziliu no luta ba independénsia.

Luís Cardoso, oan hosi enfermeiru ida ne’ebé hala’o knaar iha fatin barak iha Timor-Leste, moris iha Cailaco, Bobonaro, iha 1958.

Frekuenta estuda iha Koléjiu Missionáriu Soibada no Fuiloro, tuir-mai, iha Semináriu Dare no Liseu Dr. Francisco Machado, Díli.

“Takas” hela iha Timor-Leste to’o de’it tinan-18, hafoin muda ba hela iha Portugál no remata kursu lisensiatura iha silvikultura iha Institutu Superiór Agronomia Lisboa.

Jornalista: Vito Salvadór