Hatutan.com, (19 Agostu 2023), Díli-Polísia Nasionál Timor Leste (PNTL) Eskuadra Dom Aleixo identifika ona joven timoroan na’in-rua ne’ebé lori sabit duni tuir sidadaun estranjeiru ida iha área Postu Penal, Suku Comoro, Postu Administrativu Dom Aleixu, Munisípiu Díli, Seganda foin lalais ne’e.

Lee Mós : Sei Koloka Tán Membru PNTL iha Fronteira TL-RI

Ilustrasaun/Foti hosi Google

Joven timoroan na’in-rua ho inisiál AdJdS (idade 22), ho MdS (idade 19) ne’ebé  uza  sabit hodi  ameasa no duni sidadaun hosi Xina ne’e vital iha media sosiál Facebook.

Ekipa konjunta PNTL nian ne’e, Kinta (17/08/2023), tuku 15:00 lorokraik Otl, identifika joven na’in-rua ne’e no polísia bá foti kedas sira na’in-rua  lori bá asegura iha Eskuadra Comoro.

Informasaun hosi Forsa Konjunta sira, katak, molok ne’e sidadaun na’in-rua ne’e konsumu uluk ona alkólika to’o lanu. Ikus mai la-kontrola aan, nune’e foti kro’at, bá buka problema ho  Xinéz ne’ebé hamriik buti hela telefone iha estrada ibun nia loja oin.

Sidadaun mane na’in-rua ne’e, halo reasaun no tentativa oioin, atu sona Xinéz ne’e, maibé vítima ho esforsa aan, hodi halai sees hosi lokál krime nian.

“Suspeitu na’in-rua ne’ebé tenta atu oho Xinéz ne’e, ita kaptura ona ho inisiál  AdJdS ho idade 22 no MdS ho idade 19,” fontes polísia  haktuir bá Hatutan.com, Sesta (18/08/2023).

Komandante PNTL Munisípiu Dili, Superintendente Orlando Pereira Gomes, konfirma loos duni, sidadaun na’in-rua ne’ebé deskonfia envolve iha kazu tentativa omesídiu ne’e, Polísia kaptura ona, no oras ne’e mós detein ona iha Sela Detensaun Polísia Eskuadra Dom Aleixo, Díli.

Kapturasaun ne’e akontese, tanba, hafoin kazu ameasa ne’e, parte vítima sente inseguransa bá ninian aan. Nune’e, bá kedan hato’o keixa iha Polícia Ciêntífica e de Investigacão Criminal (PCIK). Biar nune’e, Komandu PNTL Munisípiu Dili, orienta mós ninia membru sira, hodi buka tuir pardeiru hosi autór sira ne’e, to’o hetan.

Sidadaun na’in-rua ne’e, Polísia halo de’it prosesu identifikasaun, durante oras 12 nia laran. Hafoin ida ne’e, aprezenta kedan autus ka prova sira bá Ministeriu Publiku (MP), hodi prosesu tuir lei. Kona-bá evidénsia sira hanesan CCTV, oras ne’e iha ona Polísia nia lima.

Jornalista: Rogério Pereira Cárceres