Hatutan.com, (20 Agostu 2023), BAUCAU—Iha tinan 1998,  Forças Armadas de Libertação Nasionál Timor-Leste (FALINTIL), hala’o konsentrasaun boot no sai hanesan konsentrasaun ikus liu, hodi hakotu funu hasoru invazór Indonézia nian iha Atelari, Postu Administrativu Laga, Munisípiu Baucau.

Tenente Jenerál Reformadu, Tito Cristóvão da Costa “Lere Anan Timur” hato’o diskursu iha serimónia komemorasaun tinan 48 ezisténsia FALINTIL nian iha Eskola Bázika Sentrál (EBC) Celestino Peloi, Suku Atelari, Postu Administrativu Laga, Munisípiu Baucau, Domingu (20/08/23). Foto: Rogério Pereira Cárceres/Hatutan.com.

Tenente Jenerál Reformadu, Titó Cristóvão da Costa “Lere Anan Timur” konta-tuir durante diskursu iha serimónia komemorasaun tinan 48 ezisténsia FALINTIL nian iha Eskola Bázika Sentrál (EBC) Celestino Peloi, Suku Atelari, Postu Administrativu Laga, Munisípiu Baucau, Domingu (20/08/23).

Lee Mós: Militár Timoroan Na’in 20-resin Partisipa Ona Missaun ONU iha Líbano-Sudaun Súl

Tanba ne’e, iha 20 Agostu tinan ida-ne’e konsentra no halibur-malu dala ida tán iha fatin Atelari, Nautetu, Bordu hodi hanoin fila-fali bá kotuk kona-bá situasaun iha momentu ne’ebá.

“Ohin ema oitoan, maibé uluk iha 20 Agostu 1998, biar inimigu iha ita-nia sorsorin, maibé mai hosi fatin hotu-hotu iha nível nasionál, halibur-malu iha ne’e hodi komemora loron FALINTIL,” Titó Cristóvão da Costa “Lere Anan Timur” hateten.

Iha momentu importante ida-ne’e, Lere Anan Timur parabeniza inan-aman sira ne’ebé uluk fó sira-ninia apoiu tomak, bá sira-ninia oan, sira-ninia alin, sira-ninia liman-kro’at FALINTIL ne’ebé hamutuk ho sira iha ne’e iha tempu naruk.

Lere Anan Timur  temi katak, veteranu balun ne’ebé mak uluk hamutuk ho inan-aman Atelari, Sagadate, hanesan Abuti, Sirbu’u, Lavateri, Botu-mutu, hamutuk ho sira.

“Ita-nian inan-aman iha Nau-tetu, Atelari, Sagadate, sira dehan imi bele tesi-nuu, ai-hun sira ne’e hotu, naran ita ukun-aan no iha loron 30 Agostu 1999 ita konsege hetan duni Referendum, povu Maubere manan ukun-aan no sai duni nasaun soberanu, independente,” Lere hateten.

Istória mak ida-ne’e, FALINTIL nia konsentrasaun ikus iha Atelari, hakotu funu iha Atelari. Ida-ne’e mak istória. Sé la’e, aban-bainrua ema la fó valór bá fatin istóriku sira ne’e.

Lere dehan, dala-ruma tanba sira sei moris ne’e mak hanoin hetan fatin istóriku sira ne’e, maibé kuandu, sira la fó hatene istória bá militár sira, ofisiais foinsa’e sira, aban-bainrua, sala-ruma sira bele haluha tiha.

Tanba ne’e nia husu Veteranu sira, feto ka mane, membru sira FALINTIL nian, misaun di’ak liu iha sira-ninia moris maka serví ninia povu.

“Iha independénsia labele hanoin katak, ita veteranus FALINTIL, ita atu bá tuur iha Governu ka iha ne’ebé de’it. Ita beik. Ita entrega bá ita-nia maluk Timoroan matenek sira atu lori vida nasaun ho vida povu ida ne’e bá oin,” Lere fó-hanoin.

Jornalista: Rogério Pereira Cárceres