Hatutan.com, (25 Agostu 2023), Dili—Governu Britániku liuhosi Embaixadór nomeadu, Dominic Jermey konfirma katak, hakarak tebes atu fó apoia ka tulun Timoroan sira ne’ebé iha vontade atu bá servisu iha rai United Kindom.

Governu Britániku liuhosi Embaixadór nomeadu, Dominic Jermey hamutuk ho Komandante bá Roo RHMS Spey, Kapitaun Matthew Millyard to’o iha Portu antigun Dili, Sesta (25/08/2023). Foto: Hatutan.com.

Konfirmasaun bá komitmentu ida-ne’e, Embaixadór Dominic hato’o bainhira Roo Navál HMS Spey, hosi sidade Brisbane, Austrália to’o iha Portu antigu Dili, Timor-Leste.

Lee Mós: Raiña Elizabeth II Mate, Prínsipe Charles Mak Sei Sa’e ba Tronu Impériu Britâniku

Embaixadór Dominic esplika, sira-ninia prezensa no vizita iha Timor-Leste nu’udár komitmentu ida hosi sire nia rai Britániku rasik oinsá bele fó apoiu bá TL, inklui rejiaun sira iha Indo-Pasífiku, iha área ekonómiku.

“Ami mós hakarak suporta Timoroan sira ne’ebé mak hakarak bá UK atu halo servisu, liu-liu karik atu kontinua sira-nian estudu. Tanba ne’e ha’u konsidera edukasaun nu’udár parte ida ne’ebé mak importante tebes bá Timor-Leste,” Embaixadór nomeadu, Dominic Jermey hateten iha Portu antigu, Dili, Sesta (25/08/23).

Embaixadór foun hosi rai Britániku ne’e konsidera edukasaun sai nu’udár seitór ida ne’ebé importante tebes no Timoroan barak ona mós iha tempu sira liubá, finaliza sira-ninia estudu iha United Kindom.

Governu Britániku liuhosi Embaixadór nomeadu, Dominic Jermey hamutuk ho Komandante bá Roo RHMS Spey, Kapitaun Matthew Millyard to’o iha Portu antigun Dili, Sesta (25/08/2023). Foto: Hatutan.com.

“Daudaun ne’e Timor-Leste nia embaixadór iha United Kindom no nia rasik mós finaliza ona ninia estudu iha ami nia nasaun,” Embaixadór Dominic hateten.

Kona-bá komitmentu Estadu Britániku nian bá TL, Embaixadór Jermey konfirma, sira hatudu tiha ona foin lalais ne’e, liuhosi fasilita formasaun ka treinamentu bá Timoroan sira, relasiona ho preparasaun TL nian atu adere bá organizasaun rejionál Association of South East Asean Nation (ASEAN).

Hatán kona-bá oinsá Governu Britániku ninia haree bá Timoroan sira ne’ebé  servisu hela iha UK, maibé, utiliza fali nasaun sira seluk ninia dokumentu identidade hanesan pasaporte, sai sidadánia Portugés mak bele tama bá sira-ninian territóriu, Embaixadór Dominic rekoñese, situasaun ne’e loos duni.

“Ha’u hakarak aprezenta mós dadus katak, traballadór sira maizumenus ema 30.000 mak uza passaporte nasaun seluk nian. Maibé, sira ne’e Timoroan duni ne’ebé maka servisu iha United Kindom. Tanba ne’e, ha’u hakarak agradese tebes bá kontribuisaun sira ne’ebé mak ema Timor oan sira halo ona iha ami nia nasaun,” nia agradese.

Bá oin UK hakarak suporta ho legalmente bá Timoroan sira no suporta Migrasaun Internasionál katak, mudansa ema hosi sidadánia nasaun ida bá fali nasaun seluk, entaun, sira mós suporta ida ne’e.

Embaixadór Dominic sente haksolok tanba bele vizita fila-fali TL hodi fó lembra bá nia iha tinan 23 kotuk, nia mós marka prezensa iha Timor, hodi akompañia timoroan sira-ninian prosesu luta bá ukun-rasik aan.

“Pesoalmente, saida mak motiva ha’u hodi mai iha-ne’e maka, ha’u kontente tebes atu mai vizita Timor-Leste tanba ha’u mós iha kolega barak. Durante tinan sira liubá iha Timor nomós iha memória furak barak mós, ne’ebé mak ha’u iha, ligasaun ho rai ida ne’e,” nia espresso.

Rai Britániku nu’udár nasaun ida ne’ebé mak autóra bá formaliza konsellu seguransa iha Organizasaun bá Nasoens Unidas (ONU-Sigla Inglés) no Timor mós halo parte hanesan membru.

Tanba ne’e, Governu Britániku haree katak, hanesan país joven ida, Timor-Leste importante tebes mós bá United Kindom, Britániku.

“Tanba ne’e, ha’u sente kontente tebes hodi bele marka fali prezensa iha fatin ida ne’e, nu’udár embaixadór ida reprezenta ha’u nia nasaun Britániku no ha’u sei aprezenta ami nia karta kredensiál bá Prezidente Repúblika, José Ramos-Horta,” Embaixadór Dominic hatutan.

Roo Naval HMS Spey

Governu Britániku liuhosi Embaixadór nomeadu, Dominic Jermey hamutuk ho Komandante bá Roo RHMS Spey, Kapitaun Matthew Millyard to’o iha Portu antigun Dili, Sesta (25/08/2023). Foto: Hatutan.com.

Iha biban ne’e mós Komandante bá Roo RHMS Spey, Kapitaun Matthew Millyard, sente haksolok tanba roo navál hosi sira-nian nasaun bele atraka iha Portu Dili, Timor-Leste nian no kontente liután tanba sira foin hala’o mai vizita Timor.

“Iha okaziaun bá dadeer kmanek ida ne’e nian, espesialmente fó bem víndu bá roo navál. Timor-Leste mós importante bá roo ida-ne’e iha área tasi nian. Tanba ne’e, ha’u espera katak bá oin roo ida-ne’e sei hala’o vizita regulár mai Timor, liu-liu kapitál Dili,” Kapitaun Matthew Millyard hateten.

Iha tinan sira ikus ne’e Roo Naval HMS Spey hala’o ona vizita bá rai barak liu-liu iha rejiaun Indo-Pasífiku nian, hamutuk nasaun 30-resin no tuir planu, iha tinan-lima bá oin, roo ne’e sei kontinua vizita haleu rejiaun ida ne’e.

“Ami-nia vizita ida ne’e iha razaun oioin mak hanesan razaun polítika no Governasaun ne’ebé dudu ha’u, hodi prezente iha Timor. Ho situasaun mundu nian ne’ebé mak hasoru destruisaun ambientál no ha’u hakarak introdus katak roo ida ne’e hanesan roo ida ne’ebé mak amigável tebes bá ambiente, ne’ebé maka durante ne’e eziste iha forsa Britániku nian. Ne’e hanesan roo ida ne’ebé mak sei la fó destruisaun ambientál,” Kapitaun Matthew esplika.

Roo Naval HMS Spey sai hosi Sidade Brisbane, Australia no viájen iha tasi-laran durante loron sanulu, hafoin to’o Dili.

Roo HMS Spey ne’e transporta forsa Britániku sira hamutuk 69 ne’ebé tuir oráriu iha Domingu, (27/08/2023), roo forsa navál sei fila-fali bá sira-ninian rai oríjen.

Jornalista: Rogério Pereira Cárceres