Hatutan.com, (25 Agostu 2023), Díli—Embaixadór Reinu Unidu nian mai Timor-Leste, Dominic Jermey, entrega ona karta kredensiál bá Xefe Estadu, José Ramos-Horta iha Palásiu Prezidensiál Bairru-Pité, Díli, Sesta, 25 agostu 2023.

Embaixadór Reinu Unidu nian mai Timor-Leste, Dominic Jermey, entrega karta kredensiál bá Xefe Estadu, José Ramos-Horta iha Palásiu Prezidensiál Bairru-Pité, Díli, Sesta, 25 Agostu 2023. Foto: Média PR.

Karta kredénsial ida-ne’e, hodi reafirma parseria entre Estadu Reinu Unidu ho Timor-Leste nian ne’ebé buras bá beibeik.

Lee Mós: Governu Britániku Hakarak Apoia Timoroan Sira bá Servisu no Estuda iha UK

Dominic Jermey CVO OBE, hanesan Embaixadór nomeadu hosi Majestadu hodi sai nu’udár Embaixadór bá Repúblika Indonézia (RI), nomós nu’udár Embaixadór Naun-Rezidensial bá Repúblika Demokrátika Timor-Leste (RDTL).

Embaixadór Dominic, uluk hanesan diretór jerál iha Organizasaun Sosiedade Siénsia Konservasaun, Sosiedade Zoolójika Londres nian, hosi tinan 2017 to’o 2022.

Hamutuk ho nia papél sira seluk, Dominic mós sai ona nu’udár Majestadu nia Embaixadór bá Afeganistaun hosi 2016 to’o 2017, no iha mós Uniaun Emirádu Árabe hosi 2010 to’o 2014.

“Ha’u haksolok tebes fila-fali mai Timor-Leste, ha’u nafatin tuir besik nasaun ne’e no Ema Timor nian istória ka lala’ok, depois ha’u hetan ha’u nia kna’ar iha Dili tinan 20 liu bá. Ida-ne’e previléjiu bo’ot tebes ida no ónra bá ha’u atu aprezenta ha’u nia kredensiál bá Prezidente Timor-Leste, ha’u nia kolega Exelénsia Señor José Ramos-Horta. Timor-Leste importante tebes bá Reinu Unidu, nomós nu’udár Parseiru Diálogu bá ASEAN, ami suporta tebes adezaun Timor-Leste bá blóku rejiónal ida-ne’e,” Hatutan.com sita iha komunikadu.

“Ami nia parseria ho Timor-Leste kontinua buras, foka ba dezenvolvimentu ekonomia, saúde no nutrisaun, adaptasaun klimátika no edukasaun. Reinu Unidu nia programa bolsu estudu importante, Chevening, atrai tiha ona estudantes talentóza sira atu bá estuda hodi hasai sira nia Mestradu iha Universidade sira iha Reuni Unidu ne’ebá mak agora daudaun iha ona alumni na’in-50 resin,” Embaixadór Dominic afirma.

Embaixadór Britániku ne’e informa mós katak, janela oportunidade bá hatama aplikasaun loke iha fulan-Setembru tinan ne’e no nia hakarak enkoraza estudante sira atu aplika, nune’e sira bele aprende abilidade foun no manán experiénsia sira iha Reinu Unidu, hodi ajuda dezenvolve no harii futuru Timor-Leste nian.

“Ha’u hakarak tebes atu hala’o ha’u nia papél nu’udár Embaixadór Naun-Rezidensiál Britániku nian bá Timor-Leste, atu hametin liután relasaun bilaterál. Ha’u hakarak loos atu fila-fali mai nasaun furak ida ne’e iha tempu badak no iha oportunidade atu hafoun relasaun tuan sira no establese relasaun foun entre nasaun rua ne’e,” Dominic promete.

Biografia Dominic Jermey

Dominic Jermey Embaixadór nomeadu hosi Majestadu hodi sai nu’udár Embaixadór bá Repúblika Indonézia no Timor-Leste iha 2023.

Dominic nia postu diplomátiku sira molok ne’e maka, nia sai ona nu’udár Embaixadór Majestadu nian bá rai Afeganistaun (2016-17) no bá Uniaun Emirádu Arábe (2010-14).

Dominic mak Diretór no Xefe Ezekutivu bá Investementu Internu Reinu Unidu nian no ajénsia suporta exportasaun nian, Reinu Unidu nia komérsiu no negósiu hosi 2007-2010 nomós hosi 2014 – 2015.

Iha 1999-2000, Dominic sai ona mós nu’udár reprezentante rai Britániku nian bá Administrasaun Tranzisional ONU nian iha Timor-Leste, relata bá Embaixadór Reinu Unidu nian iha Jakarta.

Dominic mós serbii iha Pakistaun, España, Macedonia, nomós nia lídera Ekipa Krizi Reinu Unidu nian iha Tailandia, hafoin krize tán rai nakdoko no Tsunami (tasi-sa’e) iha tinan 2004.

La’ós ne’e de’it, Dominic mós nu’udár Diretár Jerál hosi ONG siénsia konservasaun nian, Sosiedade Zoolójiku Londres, hosi tinan 2017-2022.

Molok ne’e, hamutuk ho servisu diplomátiku, Dominic mós sai ona nu’udár finansiadór kooperativu bá banku, Schroders. Dominic mós sai administradór bá ONG internasional bá dezenvolvimentu CAFOD hosi kedas 2008.

Dominic iha paisaun vitalísia bá halo konservasaun animais iha ai-laran nian, teatru, no artes. Nia mós gosta luku no trialeta lentu.

Jornalista: Rogério Pereira Cárceres