Hatutan.com, (05 Setembru 2023), Díli—Bankada Frente Revolusionáriu Timor-Leste Independente (FRETILIN) iha Parlamentu Nasionál (PN), kestiona maka’as ho desizaun Primeiru Ministru (PM), Kay Rala Xanana Gusmão ne’ebé halo karta ezonerasaun bá Koronél Domingos da Câmara “Amico”, hanesan Diretór Jerál iha Serviço Nacional de Inteligência (SNI).

Bankada FRETILIN iha Parlamentu Nasionál (PN). Foto/Elio dos Santos da Costa.

Preokupasaun ne’e hato’o liuhosi intervensaun iha plenária PN, Tersa, 05 Setembru 2023, deputadu Dário Madeira fó uluk apresiasaun bá Diretór Jerál sesante SNI nian, Coronel Amico tanba ho fuan boot simu desizaun hosi IX Governu Konstitusionál.

Lee Mós: PM Xanana “Ezonera” Koronél Amico hosi SNI

Dario Madeira apresia mós bá IX Governu tanba durante kampañia eleisaun Parlamentár promessa ida maka repoem órden konstituisionál  no konsege halo. Ida-ne’e, signifika governu repoin duni ona.

“Maibé, ha’u mós iha lamentasaun. Seráke nomeiasaun foun, nia bele garante órden konstitusionál. Nia bele garantia justisa.  Ida ne’e ha’u nia perguntas. Seráke troka komendante Amico ho diretór foun ne’e bele rezolve problema sira ne’ebé akontese,” Deputadu Bankada FRETILIN Dário Madeira foti assuntu ne’e durante intervensaun iha plenária PN.

Nia mós kestiona katak, seráke troka ne’e la partidariza instituisaun SNI nian, tanba iha karta ezenorasaun hateten katak, diretór SNI sesante partidariza tiha SNI.

“Ne’e la’ós ha’u mak ko’alia maibé komandante Amico rasik mak ko’alia no agora daudauk bele akompña ninia gravasaun vídeo ne’ebé virál hela iha média sosiál,” Dario Madeira kestiona.

Deputadu FRETILIN ne’e sente triste tanba veteranus tinan 24 ida-ne’e sei iha kanek, maibé nunka kanek ho justisa, la kanek tanba nia nunka halo injustisa ruma bá Estadu ida-ne’e, maibé troka fali ho ida ne’ebé kanek boot.

“Seráke ida-ne’e mak justisa, ha’u ko’alia ida-ne’e tanba kazu iha Tribunál hela, diretór ida ne’ebé atu troka, Estadu ne’e atu lori ba iha ne’ebé,” nia preokupa.

Iha Segunda (04/09/23) Timoroan tomak komemora hela loron anuniu rezultadu Referendum nian no deputadu sira hotu iha plenária, sai sasin katak, laiha ema ida iha momentu ne’ebá hakmatek. Maibé, ohin loron, ema hotu sei hakmatek iha ida-idak nia fatin, maibé ema barak mós sente preokupadu ho situasaun ida ezonerasaun ne’e.

“Maibé la buat ida. Desizaun órgaun ida-idak nian. Ida ha’u ko’alia ne’e tanba reprezentate povu ninian.  Tanba dala-barak povu ko’alia hela assuntu ida-ne’e. Entaun, ha’u ko’alia iha fatin ida-ne’e,” Dario Madeira afirma.

Nune’e mós, deputada Helena Martins Belo hosi Bankada FRETILIN  reforsa katak, kestaun kona-bá ezonerasaun bá Koronól Amico hosi Diretór Jerál SNI ne’e, tuir loloos nia mandatu hela tinan rua tán.

Maibé, tanba saida mak hetan lalais ezenoresaun no ida-ne’e ema hotu-hotu oinsá mak fó kontribuisaun  bá dezenvolvimentu rai ida-ne’e atu la’o bá oin.

“Labele hodi ódiu vigansa hodi fali ezonerasaun karik. Tuir mai públiku nonok, universitariu mós nonok, akadémiku mós nonok, organizasaun noun-Governamentál sira hotu-hotu nonok. Pena ema ne’e veteranu 24 anus, maibé ita hotu-hotu nonok, ne’e sinál katak injustisa boot mosu iha rai ida-ne’e. Depois saida mak akontese bá oin,” deputada Helena Martins Belo kestiona tán.

Deputada Helena enkoraza Koronél Amico atu ho forsa nafatin hasoru situasaun saida de’it, maibé importante maka presiza hamriik metin nafatin bá rai doben Timor-Leste.  

Kona-bá ne’e, Deputadu Bankada Congresso Nacional de Reconstrucção de Timor-Leste (CNRT), Patrocíno Fernades dos Reis aproveita hato’o CNRT ninia agradessimentu no apresiasaun boot bá desizaun tomak Diretór Jerál Sesante Servisu Nasionál Intelijénsia (SNI) Komandante Amico hanesan veteranu boot ida ne’ebé kontinua hatudu ninia dedikasaun,  kompromísu iha tinan 24 nia laran, kona-bá libertasaun pátria RDTL nian.

“Veteranu sira kontribui nafatin hodi harii, hametin no konsolida nafatin bá Estadu ida ne’e. Agradese bá dedikasaun sira ne’e hotu, au-mezmu tempu parabéns bá novu diretór ne’ebé hetan konfiansa hosi IX Governu konstitusionál. Nafatin ita hanoin katak Timoroan ita hotu nian, laiha ema ida sei hanoin aat bá Estadu ida-ne’e, bá nasaun ida-ne’e,” Deputadu Patrocínio apresia.

Deputadu bankada Governu ne’e hein katak, ho mandatu Diretór Jerál SNI ne’ebé foun bele hadi’a di’ak liután servisu intelijénsia nian, hodi kontribui informasaun sira ne’ebé bele assegura Estadu no nasaun, no kaer metin nafatin prinsípiu nu’udár Estadu diretu demokrátiku no Estadu ida independente.

Lee Mós: Lidera SNI, Longuinhos Monteiro Promete Atua ho Profisionál

Jornalista: Rogério Pereira Cárceres