Hatutan.com, (08 Setembru 2023), Díli—Rádiu Komunidade (Rakom) iha Lospalos, Munisipiu Lautém no Ili-Wa’I Manatuto, oras-ne’e enfreta hela problema kona-bá menus fasilidade bá atividade jornalizamu nian. Tanba ne’e, IX Governu Konstitusionál liuhosi Sekretária Estadu Komunikasaun Sosial (SEKOMS), promete atu fó apoiu. 

Sekretáriu Estadu Komunikasaun Sosiál (SEKOMS), Expedito Loro Dias Ximenes hala’o vizita bá Rádiu Komunidade (Rakom) iha Lospalos, Munisipiu Lautém (07/09/2023). Foto: Rogerio Pereira Cárceres.

Iha kinta (07/09/2023), tuku: 16:00, Sekretáriu Estadu Komunikasaun Sosiál (SEKOMS), Expedito Loro Dias Ximens ho ekipa hakat liubá vizita Rádiu Komunidade Lospalos (RCL-Sigla Português) VOX POPULI ho Frekuénsia FM. 100.9 (Mhz), iha Sentrál, Suku Fuiluro, Postu Administrativu Lospalos Villa, Munisipiu Lautém.

Lee Mós: SEKOMS ho Tékniku ADN no MOP Halo Inspesaun bá Projetu MAPKOMS

SEKOMS observa direta kondisaun uma Rakom Lospalos nian, nune’e mós sala redasaun, Estúdiu Gravasaun, Estúdiu On-Air nian.

Durante vizita ne’e, Jornalista Rádio Comunidade Lautém (RCL), Ermelinda da Silva Pereira informa direta difikuldade ne’ebé durante hasoru.

“Difikuldade maka, menus komputadór ho IC Record (tape recorder) ho tán transporte ne’ebé mak fasilita ami atu halo kobertura. Motór ida de’it, maibé ida ne’e mós  jestór nian. Tanba ne’e, bainhira ami halo kobertura dook, entaun ami bele uza hela xefe ninia motór,” Ermelinda da Silva Pereira hateten, Kinta (07/09).

Sira mós presiza tebes meza, kadeira atu jornalista sira bele utliza hodi halo servisu jornalizmu ninian lorloron.

Nune’e mós Mikrofone (mixer) ne’ebé uza durante tempu naruk nia laran, no kondisaun ladun funsiona, dala-ruma aat, sira tenke komunika lalais bá sira-ninian ofisiál Informasaun no Teknolójia (IT), hodi hadi’a.

Oras ne’e daudaun Radíu komunidade ne’e iha jornalista na’in-lima ho tán jestór hamutuk na’in-neen.

Rakom Ili-Wa’I

Sekretáriu Estadu Komunikasaun Sosiál (SEKOMS), Expedito Loro Dias Ximenes hala’o vizita bá Rádiu Komunidade Ili-Wa’i, ho Frekuensia FM 96.1 Mhz, iha Suku Aiteas, Postu Administrativu Manatuto Villa, 07/09/2023). Foto: Rogerio Pereira Cárceres.

Iha sorin seluk, Rádiu Komunidade Ili-Wa’i, ho Frekuensia FM 96.1 Mhz, iha Suku Aiteas, Postu Administrativu Manatuto Villa enfreta problema boot rua. Ida maka menus komputadór no seluk maka problema edifísiu atuál, tanba Ministériu Edukasaun (ME), hanoin ona atu hasai sira hosi fatin ne’e, tanba konsidera fatin bá turizmu istóriku.

Jestór Rádiu Komunidade Ili-Wa’i, Laurente Soares Freitas, informa preukupasaun ne’e hafoin simu vizita hosi SEKOMS Expedito Dias Ximenes, iha Rakom Ili-Wa’I, Suku Aiteas, Manatuto Villa, sexta (08/09).

Edifísiu atuál bá Rakom Ili-Wa’i ne’e, sira utiliza kedan iha 2002 to’o ohin loron. Maibé tanba fatin ne’e konsidera hanesan fatin istóriku, no pertense bá patrimóniu Estadu nian, nune’e foin lalais, ekipa hosi Ministériu Edukasaun informa bá sira, atu muda sees hosi ne’e, tanba ME hakarak atu rehabilita, hodi sai fatin bá turizmu istóriku.

Programa rádiu sei ativu iha Rádiu Komunidade Ili-wa’i Manatuto mak hanesan, Programa Juventude, Saúde, Edukasaun, Agrikultura, Feto, servisu hamutuk mós ho UNICEF kona-bá Programa Labarik.

Jornalista bá Rádiu Komunidade Ili-Wa’i nian iha na’in-neen (6), ho tán voluntáriu hamutuk na’in-hitu, maibé, komputadór ida ida de’it.

SEKOMS Expedito Hatán

Hatán bá preukupasaun hosi rádiu komunidade rua ne’e, SEKOMS Expedito Dias a-nota hela no promete atu orsamentu ka tau osan iha Orsamentu Jerál Estadu (OJE) 2024 nian, hodi bele responde.

SEKOMS Expedito esplika, objetivu hosi nia vizita ne’e atu bá haree besik liután kondisoens ne’ebé rádiu komunidade sira iha, tanba molok ne’e, nia vizita uluk ona mós bá rádiu komunidade Matebian iha Baucau, no Rádiu Sahe iha Bucoli.

Durante vizita iha Rádiu Komunidade Lospalos, SEKOMS Expedito haree katak, kondisaun edifísiu liu-liu espasu sira, di’ak ona, presiza de’it maka apoiu ekipamentu sira, ne’ebé bele reforsa jornalista rádiu sira-niana atividade lorloron nian.

Maske rádiu komunidade Lospalos sira ho de’it kondisoens ekipamentu sira ne’ebé limitadu, maibé Expedito haree katak, sira halo duni atividade rádiu komunidade ho di’ak. Sira sente katak, sai jornalista iha rádiu komunidade iha Lospalos ne’e, sira nian, bele dehan katak, hanesan vokasaun ida no sira ema Lospalos oan duni.

“Ita hotu hein katak ho sira-nia espíritu forte ne’ebé sira iha ne’e, mezmu ke iha ekipamentus limitadu ne’ebé sira halo lorloron, maibé ho kondisaun ne’ebé ha’u haree, konserteza SEKOMS sei buka oinsá atu bele fó atensaun bá iha kestaun sira, liu-liu ekipamentus,” SEKOMS Expedito Dias promete.

Expedito konsidera rádiu komunidade sira hanesan liña frente hodi fó informasaun bá komunidade, sá tán iha Governasaun IX-Governu Konstitusionál nian, sei iha politika desentralizasaun administrativa ne’ebé Governu sei hakbesik aan liubá iha komunidade no Governasaun iha Munisipiu sira.

Tanba ne’e mak rádiu komunidade importante tebetebes atu bele SEKOMS hadi’a intermu rekursu umanu sira ho treinamentu ne’ebé sei fortifika, nomós espasu bá sira bele hala’o atividade.

“Ita iha era dijitál, konserteza, ita tenke buka ekipamentus ne’ebé modernus, atu nune’e bele responde bá iha era dijitál oras ne’e dadaun. Rádiu komunidade tenke-ser mós iha ekipamentus sira modernus, atu bele responde ho aktualiza situasaun sira ne’ebé la’o hela,” SEKOMS Expedito Dias hateten.

Kompromísiu IX Governu Konstitusionál nian, liuhosi SEKOMS rasik, sei fó atensaun no sei apoia bá iha situasaun ne’ebé karik rádiu komunidade sira hasoru.

“Rádiu komunidade Vox Populi Lospalos tuir ha’u nia haree presiza apoiu ekipamentus. Nune’e mós rádiu komunidade seluk ne’ebé ha’u haree liu tiha ona presiza apoiu, no ida ne’e, bele dehan sei sai atensaun iha Orsamentu Jerál Estadu 2024,” nia tenik.

Hatán kona-bá problema sira iha Rádiu Komunidade Ili-Wa’I, SEKOMS Expedito, komprometidu nafatin atu fó apoiu, fasilidade, ekipamentu sira, hodi nune’e jornalista sira bele hala’o kobertura ho di’ak liután iha komunidade nia leet.  

Jornalista: Rogério Pereira Cárceres