Hatutam.com, (06 Outubru 2023), Lospalos-Animal protejida sira, hanesan rusa iha Illa Jaco,  Munisípiu Lautem, balun komesa mate daudaun tanba menus ai-han.

Lee Mós : Family Time: Raul Lemos Boyong Krisdayanti, Amora dan Kellen ke Pulau Jaco

Rusa sira iha Illa Jaco. Foto/Elio dos Santos da Costa

Dadus hosi Guarda Florestál destakadu iha Illa Jaco, katak daudaun ne’e rusa  protejida hamutuk 400-resin mak moris iha Illa Jaco, maibé ho bai-loron naruk no rai-manas kuaze du’ut mate hotu, no ai-horis ki’ik-oan hirak ne’ebé sai hahán proteína bá rusa sira mós namlaek no mate daudaun.

“Tuir informasaun dehan bee laiha ne’e la loos. Ami nia haree katak  rusa sira ne’e, balun krekas no balun  mate daudaun tanba ai-han menus,”  Da Cuz Maucasar hateten.  Iha mós rusa balun mate tanba idade aumenta hodi halo sira-nia isin krekas no fraku.

Durante ne’e Governu tau matan hela bá rusa sira-ne’e liuhosi meius prepara bee no Guarda Florestál sira  transporta bá Illa Jaco no monta ona tanki lubun iha Illa Jaco atu udan mai karik bele prezerva bee ba rusa.  

“Ami propoin bá Governu,  sé bele haloestudu ka  peskiza ruma hodi identifika ai-horis ne’ebé nakonu ho proteína atu kuda iha Illa Jaco nune’e iha bailoron naruk, rusa sira ne’e bele han atu sira la bele mate hamlaha,”  Da Cuz Maucasar  haktuir bá Hatutan.com iha Illa Jaco, Kinta (05/10/2023).

Karik posivel, Guarda Florestál sira rekomenda bá ministériu relevante sira atu halo estudu bá ai-han nutritivu bá rusa no bele karik sosa hodi transporta mai Illa Jaco para fó han bá rusa protozoa sira-ne’e.  

Rusa sira iha Illa Jaco isin krekas daudaun tanba menus ai-han. Foto/Elio dos Santos da Costa

“Kuandu ita atu mai kuda ai-horis sira iha ne’e mós labele tanba sai ona jona inti nune’e  halo peskiza ruma bele kuda ai-horis iha rai-boot para kada tinan ita bele lori mai fó rusa sira han i tuir ami nia peskiza ai-horis ne’ebé ami fó han sira ne’e mak ai-besi nia tahan, nune’e ami kuda ai-besi ne’e iha Lospalos hodi transporta  mai  fó rusa sira-ne’e han,” nia haktuir.

Daudaun ne’e  Guarda Floresta na’in-haat (4) mak tau matan hela bá rusa no animal protejida sira seluk iha Illa Jaco no tuir planu ne’ebé Governu iha mak Governu identifika ona fatin balu hanesan Ai-telu hodi haki’ak tan rusa iha fatin refere iha tempu tuir mai hodi aumenta tan populasaun rusa.

Jornalista Estajiária: Zita Menezes