Hatutan.com, (10 Setembru 2023), Díli—Primeiru-Ministru (PM) Kay Rala Xanana Gusmão agradese bá ekipa médiku Xineza ne’ebé ho domin tomak fó asisténsia saúde bá Povu Timor Leste (TL) ho moras oin-oin, durante semana ida iha Díli ho Ró Militár Ospitál Xina -Peace Ark 866.

Primeiru Ministru (PM), Kay Rala Xanana Gusmão vizita Ró Ospitál Xina-Peace Ark 866 ne’ebé sadere iha Portu Dili, no simu direta hosi Komandante Ró Ospitál Xina-Peace Ark 866, Almirante Zhao Guangqin no Almirante Li Xike no ofisiál ho pareda militár, Domingu (10/09/23). Foto: GPM.

Sentidu agradesimentu ne’e Primeiru-Ministru hato’o bainhira hala’o vizita direta ba Ró Militár Ospitál Xina -Peace Ark 866 iha Portu Díli, Domingu (10/09).

Lee Mós: PM Taur Agradese Apoiu Ne’ebé Durante Ne’e Xina Oferese ba TL

“Ha’u agradese tebes bá imi nia atendimentu sira bá ami nia povu liu hosi asaun umanu ne’ebé imi hala’o la’ós mai TL de’it maibé mós bá rai sira iha Áfrika ne’ebé sira mós moris mukit liu presiza tebes asisténsia umana sira hanesan ne’e,” Hatutan.com sita lia fuan agradesimentu hosi Xanana nian iha komunikadu.

Iha komunikadu ne’e hateten, Almirante Zhao Guangqin no Almirante Li Xike introdús mapa mundu nian ne’ebé ekipa bá vizita ona.

Ró Ospitál Naval China Peace Ark 866 nu’udár primeiru ró militár Xina nian ne’ebé hala’o misaun umanu iha mundu ho nia naruk kuaze metru 45 ho kapasidade tonelada 10.000.

Ró ne’e iha fasilidade médiku mordernu kompletu ho médiku hamutuk ema na’in-126  no doutór espesialista ba moras oin-oin ema na’in-40.

Komandante Ró Ospitál Xina -Peace Ark, Almirante Zhao Guangqin introdus ba Xefe Governu Xanana katak, ró ne’e hala’o ninia primeiru operasaun ba servisu umanu ka fò asisténsia saúde gratuita hahú tinan 2008 no daudaun ne’e hala’o ona vizita ba nasaun 43 no Timor-Leste hetan primeiru vizita iha tinan 2017 no tinan 2023.

Hosi nasaun 43 ne’ebé sira vizita kuaze fó ona asisténsia médiku ba pasiente kuaze 250.000 no halo ona operasaun ba pasiente sira ne’ebé moras kuaze 1.500.

Durante vizita Timor-Leste, tuir dadus Ministériu Saúde (MS) populasaun ka pasiente sira ne’ebé hetan asisténsia saúde kuaze 10.000 liu.

Tuir planu ró ne’e iha Domingu (10/09/23) ohin sai hosi Timor-Leste sei fila fali ba Xina no atraka iha ninia fatin permanente Portu Marina Militár Provínsia Zhenjiang.

Vizita Xefe Governu ba Ró Ospitál Xina-Peace Ark 866 ne’ebé sadere iha Portu Dili, akompaña direta hosi Vise-Primeiru Ministru no Ministru Koordenadór Ekonomia no Ministru Turizmu no Ambiente, Francisco Kalbudi Lay, Ministra Saúde Élia A.A dos Reis Amaral no simu direta hosi Komandante Ró Ospitál Xina-Peace Ark 866, Almirante Zhao Guangqin no Almirante Li Xike no ofisiál ho pareda militár.

Jornalista: Rogério Pereira Cárceres