Hatutan.com, (19 Setembru 2023), Díli- Ministériu Edukasaun seidauk iha koñesimentu kona-bá kondisaun Eskola Ensinu Báziku Sentral (EBC), Sagrado Coração de Jesus, Aitutu Rina,  ne’ebé oras ne’e grave.

Lee Mós: MEJD Sosa Ró Folin $142,000 bá ESTV Peska Atauro La Utíl To’o Ferrujen

Kondisaun Eskola Ensinu Báziku Sentral (EBC), Sagrado Coração de Jesus, Aitutu Rina, Postu Administrativu Hatubuilico, Munisípiu Ainaro. Foto/Espesiál

Ministra Edukasaun, Dulce de Jesus, konfirma katak  Ministériu Edukasaun sei ba haree direita kondisaun eskola refere ne’ebé lokaliza iha área  Suku Mulo, Postu Administrativu Hatubuilico, Munisípiu Munisípiu Ainaro.

“EBC Sagrado Coração de Jesus Aitutu Rina ami presiza bá haree, no ha’u tenke haree bá lista prioridade ne’ebé Ministériu Edukasaun deside tiha ona,” Ministra Edukasaun Dulce de Jesus hateten hodi responde Hatutan.com iha Aeroportu Internasionál Prezidente Nicolau Lobato, Comoro, Kuarta  (20/09/2023).

Hosi sorin seluk bá Hatutan.com via telefónika inisiadór no manorin na’in bá EBC Sagrado Coração de Jesus Aitutu Rina, José da Conceição Costa, hateten eskola EBC Sagrado Coração de Jesus Aitutu Rina hahú konstrusaun iha 2004 atu bele responde bá komunidade nia nesesidade bá edukasaun.

Nia afirma hafoin eskola EBC Sagrado Coração de Jesus Aitutu Rina harii too ohin loron seidauk hetan apoiu direita hosi Governu liu-liu bá iha konstrusaun fíziku eskola nian.

Kondisaun Eskola Ensinu Báziku Sentral (EBC), Sagrado Coração de Jesus, Aitutu Rina, Postu Administrativu Hatubuilico, Munisípiu Ainaro. Foto/Espesiál

“Ami nia eskola aat, la permite ona atu ami utiliza, maibé kondisaun obriga ami tenke kontinua hanorin mezmu didin ho au no kalen aat hodi satan de’it anin no loro manas, tempu udan ami susar liután tamba udan been nalihun iha aula laran,” José da Conceição Costa informa.

Nia hatutan uluk iha mandatu VII Governu konstitusionál parte Ministériu Edukasaun bá haree ona no promete atu halo konstrusaun foun, maibé to’o agora seidauk.

Profesór kontratadu Januário Cardoso hateten eskola ne’e nia kondisaun hahú aat iha 2008 no to’o agora seidauk iha apoia ruma hosi parte kompetente, liu-liu Ministériu Edukasaun.

Nia afirma uluk Ministériu Edukasaun bá hare direita no gabinete Prezidénsia Repúblika mós to’o ba haree,  maibé rezultadu laiha to’o agora no estudante sira kontinua aprende iha uma ne’ebé ho kondisaun la di’ak no kada vez prejudika prosesu aprendizajen tamba anin-boot ka udan-boot tenke husik fatin ne’e mamuk tamba ta’uk dezastre ne’ebé kauza husi kondisaun uma ne’ebé iha.

Kondisaun Eskola Ensinu Báziku Sentral (EBC), Sagrado Coração de Jesus, Aitutu Rina, Postu Administrativu Hatubuilico, Munisípiu Ainaro. Foto/Espesiál

“Iha sala neen mak grave, uma kle’uk loos ona, didin de’it ho au no kalen aat. Kuandu tempu udan ami labele kontinua prosesu aprendizajen, dalaruma ami tenke fó férias semana tomak,” Januário Cardoso haktuir.

Manorin na’in ne’e hatutan fasilidade eskola nia hanesan meza, kadeira, kuadru,  armariu no fasilidade  eskola seluk menus hotu no difikulta mós prosesu aprendizajen.

Pe. Adriano Ola Duli SVD, liu husi Caritas Dioseze Díli hamutuk ho komunidade no inan-aman estudante sira halo esforsu hodi halo konstrusaun foun bá sala haat ne’ebé ida utiliza bá edifísiu profesór sira nian no tolu seluk bá estudante sira. No sala neen ne’ebé nia konstrusaun dezde inísiu eskola ne’e hahú mantein no oras ne’e iha kondisaun grave no la permite ona atu estudante sira kontinua utiliza.

Eskola EBC Sagrado Coração de Jesus Aitutu Rina iha Profesór permanente na’in-6, kontratadu na’in-3, voluntáriu  na’in-7 ne’ebé dezde 2016 hala’o ona knaar iha eskola refere.

Estudante  hotu iha EBC Sagrado Coração de Jesus Aitutu Rina hamutuk na’in-268 ne’ebé kompostu husi mane  na’in-141 no feto na’in-127.

Jornalista: Vito Salvadór