Hatutan.com, (22 Setembru 2023), Díli-Iha Kinta loro-kraik, 21 Setembru 2023, hale’u tuku 18:00 Otl, mosu kazu insidente tuda-malu entre juventude sira iha fatin futu-manu nian ne’ebé lokaliza iha Aldeia Kaporo, Suku Maina I, Postu Administrativu Lospalos Vila, Munisípiu Lautem.

Ilustrasaun polísia tiru. Foti hosi Google

Tuir kronolojia hosi autoridade Polísia sira katak, deskonfia kazu ne’e envolve hosi membru grupu arte-rituál Sete-Sete (77) ho grupu arte-marsiál  Persaudaraan Setia Hati Terate (PSHT).

Kronolojia ne’ebé oras ne’e iha Komandu PNTL nia liman katak hafoin akontesimentu, laiha keixa ruma bá Polísia. Joven ida ne’ebé sente sai vítima bá ofensa integridade fízika ne’e bá konvida tán nia maluk sira seluk iha área Pairara nian, besik ema na’in-45, fila-fali bá iha Aldeia Kaporo, hodi tuda uma komunidade sira nian, rezulta uma rua mak hetan estragu ka rahun.

“Akontesimentu ne’e, mai hosi fatin futu-manu iha ne’ebé joven na’in-rua  maka diskute malu. Sira-na’in-rua ne’e, na’in-ida membru PSHT no na’in-ida seluk membru 77. Sira na’in-rua halo problema depois liu tiha minutu balun  komesa asalta malu hodi rezulta uma rua hetan estragus,” Portavóz Komandu jerál PNTL, Superintendente Polísia António da Luz, informa bá jornalista sira iha Kuartél Jerál PNTL, Caicoli, Sesta (22/09/2023).

Ho akontesimentu ne’e, komunidade sira ne’ebé hela besik iha lokál insidente, kontakta direta bá Polísia Nasionál Timor-Leste (PNTL) Munisípiu Lautem, Eskuadra Lospalos Vila, atu tun bá halo atuasaun.

Hafoin simu informasaun ne’e, iha  tuku 19:00 Otl, membru sira iha Eskuadra Lospalos Vila, tun duni bá lokál insidente, atu bele halo atendimentu no atuasaun, hodi buka tuir joven sira, ka ema sira ne’ebé mak halo problema ne’e.

To’o iha área Putunira-Pairara, joven sira ne’e, haree polísia nia kareta. Sira hahú hakilar bá membru polísia sira ne’e, ho liafuan milísia, no foti lampada (lampra) leno bá membru PNTL sira ne’e ninia oin, no foti mós fatuk tuda hasoru membru polísia ne’e.

“Suspeitu sira na’in-45 mak halo asaun hasoru ekipa PNTL na’in-5. Iha tempu ne’ebá, ekipa PNTL sira, labele satan fatuk ne’ebé suspeitu sira tuda. Joven lubuk ida mak hamriik hela iha foho leten, depois, sira komesa hakilar bá polísia sira, dehan, polisia milísia, depois sira leno lampra bá polísia sira-nian matan, no sira tuda polisia. Entaun sira tuda, no membru ida maka halo tiru adverténsia,” Portavóz  PNTL António da Luz haktuir.

“Tiru sa’e, maibé, tanba polisia ne’e tiru sa’e bá, kala tesik bá foho -leten, entaun, kala kona joven ida kanek ho identidade Martinho Gonçalves (tinan 26), ne’ebé, sira la sente dehan katak tiru kona joven ne’e,” Komandante António da Luz, hateten.

Bainhira haree tiha kondisaun vítima ne’e nian, atuasaun ne’ebé membru PNTL sira ne’e halo maka, ajuda joven ida kanek ne’e, no sira lori bá Ospitál no daudaun transporta ona mai ospitál referral Eduardo Ximenes, Baucau atu hetan tratamentu intensivu.

Investiga Membru PNTL

Ho akontesimentu kazu tiru joven mane ne’e, Komandante Jerál PNTL, Komisáriu Henrique da Costa, hasai ona despaixu ida ho númeru 441CGPNTL/9/2023, hodi fó orientasaun bá ekipa Inspesaun Jerál ho Departamentu Justisa PNTL nian atu bele halo investigasaun bá kazu ida ne’e, hodi bele hatene loloos kronolójia akontesimentu.

“Orienta ona bá Inspetór Jerál, ho diretór dixiplina justisa, atu bele forma ekipa hodi halo inkéritu bá kazu ida-ne’e atu bele hatene katak, atuasaun sira ne’e, tuir lei ka lae. Ida-ne’e maka prosesu la’o hela, ita hatene katak, kuandu kazu ne’e krime ona, ne’ebé prosesu ne’e sei bá Ministériu Públiku, hodi hetan prosesu kontinuasaun,” Portavóz Komjer, António da Luz hateten.

Membru PNTL sira ne’ebé deskonfia envolve iha kazu tiru joven ne’e, ho identidade inisial AdC, SFX, JMC, AC, AR, no oras ne’e, asegura hotu ona iha Komandu PNTL Munisipiu Lautem, hodi hein prosesu kontinuasaun bá oin.

Hosi sorin seluk sasin sira iha Pairara informa bá Hatutan.com katak ekipa Polísia Patroilamentu  bá Pairara atu buka suspeitu sira ne’ebé envolve iha konfrontu no perturba orden públiku ne’e, maibe to’o iha besik pairara jovens sira taka dalan no aproveita leno ho lampra mak tuda ekipa Polísia. Nune’e polísia nain rua seluk tun foti Pistola hodi tiru sae, maibé pozisaun husi joven sira ne’e iha foho leten ikus mai konsege kona jovens ida nia ain sorin hodi borus ba sorin.

Sasin ne’e haree  katak ekipa  polísia ne’ebe momentu kalan bá halo patroilamentu hodi halo atuasaun ne’e hamutuk membru na’in-5, entre na’in-5 ne’e iha ema na’in-4 mak lori arma ka Pistola, no ida seluk la lori pistola.

“Ami lahatene membru polísia sira ne’e se loos mak tiru tanba ami haree polísia na’in-rua mak tiru sa’e ho intensaun hodi fó sinál,” fontes ne’e informa.

Jornalista: Rogério Pereira Cárceres