Hatutan.com, (25 Setembru 2023), Díli– Komisaun B Parlamentu Nasionál ne’ebé trata asuntu Seguransa, Defeza no Negósiu Estranjeiru, seidauk simu informasaun formál ka relatóriu ruma, kona-bá kazu Polísia tiru joven ida iha Suku Paiara, Postu Administrativu Lospalos Vila, Munisípiu Lautem, foin lalais ne’e.

Lee Mós: Viral, Polísia Tiru Joven Ida iha Pairara

Kazu insidente ne’ebé deskonfia tiru hosi oknum Polísia Nasionál Timor-Leste (PNTL) akontese Kinta, 21 fulan-Setembru 2023, haleu tuku 19.00 Otl, hafoin konfrontu (tuda-malu) entre juventude sira iha Aldeia Kaporo, Suku Maina I, Postu Administrativu Lospalos Vila, Munsípiu Lautem.

Foto/Ilustrasaun

“Ami seidauk simu. Felizmente, ha’u seidauk simu. Ha’u haree took lai, sé karta ruma mai karik, informasaun ruma mai, depois maka (..), ha’u la entende problema, ha’u nar-naran fó informasaun, ha’u nia deklarasaun, oras ida bele sala tán,” Prezidente Komisaun B, deputadu Domingos Augosto “Deker”, hatán bá Hatutan.com iha kna’ar fatin PN, Segunda (25/09/2023).

Ho akontesimentu kazu ne’e, iha SeSta (22/09/2023), Komandu Jerál PNTL liuhosi portavóz, Superintendente Polísia António da Luz, fó sai liuhosi konferénsia imprénsa katak, razaun nia membru PNTL tiru joven ne’e, tanba durante atuasaun iha terrenu, mosu grupu joven ida, hakilar hosi foto leten, leno lampada (lampra) hasoru membru polísia sira ne’e ninia oin, hasai mós ho liafuan milísia to’o foti fatuk tuda tán polísia.

Liga ho kazu ne’e, iha versaun seluk hosi komunidade no juventude sira iha Pairara katak, Polísia nia atuasaun tiru ne’e, sees ona hosi fatin akontesimentu, tanba mosu duni kazu ida, maibé konsellu suku nian rezolve ona, no joven sira ne’e mós atu fila-fali ona bá sira nia hela fatin, Pairara. Maibé, to’o iha dalan maka, polísia tiru hasoru, rezulta vítima Martinho Gonsalves (idade 26), ain tohar.

Hatán bá mosu versaun rua hosi kazu insidente ne’e, Prezidente Komisaun B, Deputadu “Deker” dehan, kazu sira ne’ebé hela ho dúvidas ne’e, sujere atu Ministériu Públiku (MP), atu halo investigasaun emediata.

“Ha’u hanoin, kazu sira hela ho dúvidas hanesan ne’e, komisaun B ninia parte, orienta bá Ministériu Públiku halo investigasaun hodi hatene nia serteza. Ami Komisaun B seidauk simu informasaun ruma, ofisialmente, ami seidauk simu. Depois  ami simu informasaun ruma liga bá kazu ne’e, tenta fó ami nia paresér,” Deputadu Domingos Augosto “Deker” hateten.

Prezidente Komisaun B ne’e dehan, uainhira nesesáriu, sira sei bolu Komandu PNTL atu halo klarifikasaun kona-bá kazu tiru ne’e. Maibé, baibain mosu problema sira ne’e, sira simu informasaun, fó sira-ninian paresér, para depois, instituisaun kompetente liu-liu komandu PNTL, atu aprosima, no koolabora hodi husu apoiu, prezensa ministériu públiku nian, atu nune’e halo investigasaun, hodi hetan problema ne’e ninia hun.

Kona-bá regra sira ba utilizasaun arma ka kilat nian, deputadu Augosto “Deker” dehan, PNTL iha duni lei. Maibé, hanesan sidadaun nasaun ida ne’e, husu hothotu tenke hakru’uk bá lei, tenke obedese bá lei, labele foti desizaun anarkizmu.

Iha fatin hanesan ne’e, Deputadu Davíd Dias Ximenes “Mandati” hatutan, to’o oras ne’e, parte Komisaun B seidauk simu informasaun ruma kona-bá kazu tiru joven ida iha Pairara ne’e. Maibé, sé ema ruma kanek ona ne’e Polísia mak tiru.

Agora, tenke haree bá situasaun ne’e oinsá, tanba iha fatin balu, uainhira Polísia sira atu bá halo atuasaun, iha rezisténsia. Uainhira iha rezisténsia ona, tenke iha duni atuasaun de dezmobilizasaun nian, hodi dezmobiliza joven sira iha konfrontu ne’e.

“Agora, sé Polísia maka hanesan hakarak tiru, purke ta’uk mak tiru, entaun iha ne’e, laloos ona. Maibé, karik, sira mós halo tiha ona tiru de adverténsia, mais, depois avansa mai nafatin atu perturba fali, dezautoriza fali polisia, klaru ke, Polísia mós teke defende nia aan. Labele tiru mate, mais dezmobiliza ne’e, parese ke, ne’e Polísia ninia regras iha,” Deputadu Mandati hateten.

Deputadu Davíd Dias Ximenes husu sidadaun hotu, Timoroan tomak, atu kumpri lei ho ordém ne’ebé mak vigóra iha País demokrátiku ida ne’e. Uainhira viola lei ho ordém sira ne’e, sempre iha ninia protesaun koativa. Agora, sé mak bele halo koasaun ne’e, forsa ne’ebé organiza hosi estadu, no estadu nia forsa mak Polísia ne’e duni.

“Ne’ebé, ha’u la dehan katak, Polísia tiru arbiru, tanba seidauk iha kronolójia ida tama iha ami nia liman, ami simu de’it hosi ita-boot sira. Hanesan versaun rua ne’e, ita bele haree lai nia verasidade ne’e to’o iha ne’ebé? Para depois, fó ita-nian liafuan. Maibé, ita kuandu la kumpri lei, ninia konsekuensia ne’e sei iha. Ne’e mak ha’u dehan katak, ita tenke respeita malu, parake depois ema seluk, iha sosiedade ne’e mós respeita ida ne’e,” Deputadu Mandati fó hanoin.

Membru PNTL sira ne’ebé deskonfia envolve iha kazu tiru joven ne’e, ho identidade inisial AdC, SFX, JMC, AC, AR, no oras ne’e, asegura hotu ona iha Komandu PNTL Munisipiu Lautem, hodi hein prosesu kontinuasaun bá oin.

 Jornalista: Rogério Pereira Cárceres