Hatutan.com, (27 Setembru 2023), Díli- Sekretáriu Jerál (Sekjer) Komité Olimpíku Nasionál Timor-Leste (CONTL), Laurentino Guterres,  rekoñese nia lori duni nia kaben (fen) nu’udár “Accompanying Guest” tanba hetan finansiamentu direita husi Olympic Council of Asia (OCA).

Lee Mós: Ezekutivu CONTL Balun Lori Fen-Oan Partisipa Asian Games Hangzhou

Dokumentu komprovativu atu Prezidente CONTL, Sekretáriu Jerál ho Third Delegate iha Accompanying Guest. Foto/Repro

Sekretáriu Jerál CONTL, Laurentino Guterres esplika Accompanying Guest ne’e aplika bá Prezidente, Sekretáriu Jerál ho Third Delegate  no alojamentu Olympic Council of Asia (OCA) maka fornese.

“Ha’u mak lori duni ha’u nia kaben, ha’u hanoin katak atleta ka ofisiál sira ne’ebé fornese informasaun bá ita ne’e dalaruma  iha situasaun sira ne’ebé ami mai rungu-ranga uitoan ne’e mak karik sira fó informasaun sira ne’e bá ita-boot sira,” Sekretáriu Jerál CONTL Laurentino Guterres bá Hatutan.com  liuhosi  WhatsApp, Kuarta (27/09/2023).

Sekretáriu Jerál CONTL ne’e informa liután katak kona-bá Accompanying Guest ne’e la’ós buat foun no ida-ne’e aplika bá iha ezekutivu sira CONTL nian.

Sekjer CONTL, Laurentino Guterres. Foto/Espesiál

“Ha’u hateten ne’e la’ós buat foun ida, tamba ne’e regra no norma sira ne’ebé maka OCA no Comité Olímpico Internasionál (COI) iha hodi fó Accompanying Guest ne’ebé aplika bá iha Prezidente, Sekretáriu Jerál no ho third delegate. Ezekutivu sira iha Accompanying Guest atu bele lori kaben para bele la’o ho ka ema sira ne’ebé bele la’o ho nia, tanba ne’e mak ha’u lori ha’u nia kaben mai no kustu bá buat hotu-hotu no farda ka orsamentu nein hetan husi orsamentu ne’ebé delegasaun Timor-Leste iha,” nia  subliña.

Nia argumenta katak orsamentu bá viajen no mós alojamentuu durante estadia iha Xina la mai husi orsamentu ka apoiu Governu no mós CONTL, tanba kuandu la’o ho nia Olympic Council of Asia (OCA) mak selu ona nia inklui mós nia kaben.

Sekretáriu Jerál mos esklarese bá públiku kona-bá nia oan ne’ebé partisipa mós iha eventu Asian Games Hangzhou Xina tanba nia oan mane ne’e uluk kedas atleta hosi modalidade Natasaun.

“Kona-bá ha’u nia oan ne’e, nia atleta no dezde uluk kedas nia atleta,”  Laurentino Guterres informa.

Jornalista: Vito Salvadór