Hatutan.Com, (03 Outubru 2023), Díli– Tribunál Rekursu (TR) liuhosi Juiza Konsillera Maria Natércia Gusmão, husu bá Ministeriu Justisa (MJ) atu harii tan Tribunál instansia iha kada munisípiu iha teritoriu tomak, hodi nune’e, bele lori besik liu justisa bá povu, liuliu feto vulneravel sira.

Lee Mós : Kazu Pendente 1.757, Governu Tenke Rezolve Problema Judisiária

Juiza Konsillera Maria Natércia Gusmão sai oradór iha sorumutuk “ Feto iha Karreira Júridika”- Dezafiu haforsa no Kontribuisaun sira haforsa feto no labarik feto sira iha Setor Justisa, Tersa (03/10/2023), iha Otél Timor, Díli. Foto/Elio dos Santos da Costa

“Ami hato’o bá Governu liu-liu Minsitériu Justisa atu harii tan Tribunál Primaria Instánsia iha territoriu tomak, hodi asegura no asesu mais fasíl hosi ita-nia feto maluk sira ne’ebe maka enfrenta problema sira hasoru feto,”  Maria Natércia Gusmão, hateten iha ámbitu enkontru kona-bá “ Feto iha Karreira Júridika”- Dezafiu haforsa no Kontribuisaun sira haforsa feto no labarik feto sira iha Setor Justisa, Tersa (03/10/2023), iha Otél Timor, Díli.

Iha nia intervensaun Juiza Maria Natércia Gusmão hateten, la’ós katak kada munisípiu sira-ne’e atu harii tribunál dala ida, maibé pelumenus hosi Tribunál primeira instánsia haat ne’ebé maka iha ona, bele aumenta tan liu-liu iha Munisípiu rua, hanesan Ermera no Viqueque.

“Ermera ho Viqueque maka nia populasaun barak tebes ho krime ne’ebé maka aas, sira ne’e ita tenke fó prioridade,”  nia akresenta.

Maske rekomendasaun hirak ne’e Juis sira soe bá Governu, maibé depende ba kbiit finanseiru ne’ebe maka Estadu Timor-Leste ne’e rasik iha no mós polítika di’ak hosi Governu ne’e rasik atu tulun sosiedade sira.

Iha biban hanesan mos, Juiza Konsillera ne’e hato’o bá estudante sira hotu ne’ebé marka prezensa iha atividade ne’e katak, bainhira atu sai hanesan Juis ka Juiza ida, laharee ba kór, rasa, fetó, mane, tantu defisiensia, riku no kiak.

Nia afirma atu sai Juis tenke independente no imparsiál,  sei laiha no la uza sentimentu hodi koondena ema, foti desizaun bazeia bá faktus ne’ebe maka iha.

Daudaun ne’e Juis iha Timor-Leste hamutuk 35 no husi númeru ne’e kompostu husi feto na’in-14 no mane na’in-21.

Jornalista: Gloria Maia