Hatutan.com (03 Outubru 2023), Díli- Membru Parlamentu Nasionál (PN) hosi Bankada CNRT, Natalino dos Santos, preokupa ho kazu droga barak ne’ebé to’o ohin loron la iha prosesu no pendente iha  Ministériu Públiku (MP) ho Tribunál.

Lee Mós: TR Seidauk Foti Desizaun Rekursu MP Kona-bá Kazu Droga hosi Arguido Na’in-sia

PCIC lori arguidu sira kazu ilísitiu bá droga bá TDD, Segunda (15/08/2022). Foto/Dok.Hatutan.com

Liuhosi sesaun plenária PN, Tersa (03/10/2023), Deputadu Natalino dos Santos, hateten durante ne’e autoridade polísia   detein no kaptura suspeitu lubuk ida ne’ebé envolve iha kazu droga no balun envolve iha sindikatu tráfiku droga no bainhira submete bá Ministériu Públiku (MP) to’o ohin loron povu  lahatene kazu sira  ne’e bá ne’ebé alias kazu sira-ne’e arkivu tiha ona ka sei pendenti hela.

“Kazu droga ne’e kazu ida  extraorsdináriu, sé Ministériu Públiku la foti medida di’ak para atu bele kondena ema sira husi utiliza sasán droga hirak ne’e mak sei estraga ita-nia oan sira nia futuru no nasaun nian futuru,“ Deputadu Natalino dos Santos  hateten iha nia intervensaun.

Deputadu Natalino dos Santos husu bá Ministériu Justisa (MJ) atu fó justisa bá sasán droga sira hanesan ne’e tanba droga ne’e buat  aat tebe-tebes atu estraga nasaun, estraga ema nia vida no estraga futuru joventude .

“Ha’u la interven bá prosesu justisa, maibé ha’u atu husu bá Ministériu Públiku ho Tribunál  atu fó justisa bá sasán droga sira hanesan ne’e tanba droga ne’e buat aat tebe-tebes atu estraga nasaun, estraga ema nia vida no estraga futuru joventude sira nian tanba ne’e ha’u hakarak husu bá instituisaun kompeténti sira atu haree kona-bá prosesu pendenti, arkivu ka oinsá,” Deputadu Natalino dos Santos afirma.

Biban ne’e, Vise-Ministru Asuntu Parlamentár, Adérito Hugo da Costa, hateten  orgaun hothotu inkluí Tribunál mós iha nia soberanu.

“Se ema ida halo kontrolu auditoriu mós laiha avaliasaun bá sira-nia dezempeñu mós laiha ita konta de’it mak kazu pendenti, akuzasaun sem evidénsia bá Tribunál laiha evidénsia ema livre hela iha li’ur,” Vise-Ministru Adérito Hugo hateten.

Jornalista Estajiária: Zita Menezes