Hatutan.com, (05 Outubru 2023), Díli—Ministru Obras Publika (MOP), Samuel Marçal akompaña hosi Kay Olo hamutuk ho funsionáriu sira hamoos valeta ne’ebé nakonu ho lixu no intupidu iha aldeia 05, Suku Fatuhada, Postu Administrativu Dom Aleixo, Munisípiu Díli.

Valeta ne’ebé nakonu ho lixu no intupidu iha aldeia 05, Suku Fatuhada, Postu Administrativu Dom Aleixo, Munisípiu Díli, Kinta (05/10/2023). Foto: Leopoldina de Carvalho.

Objetivu hosi limpeza ne’e atu prevene komunidade hosi moras oin-oin, tanba komunidade barak seidauk iha konsiénsia so’e lixu tuir nia fatin, hodi implika bá valeta intupidu no bainhira udan monu rai mosu inudasaun no bee bele tama bá uma komunidade.

Lee Mós: Fator lima ne’ebé sai kauza prinsipál ba inundasaun iha Dili

“Tinan-tinan valeta sira intupidu hotu hamosu inundasaun no estraga uma sira. Tanba ne’e, ita antesipa kedan tenke hamoos valeta sira ne’e no husu konsiénsia komunidade nian atu labele so’e foer arbiru,” Samuel Marçal hateten hafoin limpeza, Kinta (05/10).

Ministru ne’e husu bá autoridade lokál sira liuliu xefe suku, xefe aldeia sira tenki fó hanoin bebeik bá komunidade atu labele so’e foer bá valeta kuak.

Valeta ne’ebé nakonu ho lixu no intupidu iha aldeia 05, Suku Fatuhada, Postu Administrativu Dom Aleixo, Munisípiu Díli, Kinta (05/10/2023). Foto: Leopoldina de Carvalho.

Samuel Marçal observa katak, problema medida valeta sira ne’ebé iha ki’ik tebes hodi labele akumula foer ne’ebé mai ho kuantidade bo’ot tanba ne’e mak inisiativa hodi hamoos ne’e atu nune’e bee foer bele halai diak no labele intupidu.

Tuir observasaun jornalista Hatutan.com iha terrenu katak, autoridade lokál sira la marka prezensa iha atividade limpeza ne’e, no komunidade rasik asiste de’it hosi dook, no barak mak hakarak hadau malu hodi hasa’i de’it foto ho Kay Olo.  

Jornalista: Leopoldina de Carvalho