Hatutan.com, (10 Outubru 2023), Díli—Nasaun Brunei Darusalam iha kompromisu atu simu traballadór Timoroan na’in 20.000-resin ne’ebé iha abilidade di’ak hodi bá servisu iha área indústria, ospitalidade, agrikultura no infraestrutura.

Prezidente Repúblika, José Ramos-Horta simu audiénsia Embaixadór Timor Leste bá Brunei Darussalem Abel Guterres ho delegasaun, iha Palásiu Prezidensiál, Ai-tarak laran Díli, Tersa (10/10/2023). Foto: Elio dos Santos da Costa.

Embaixadór Timor-Leste bá Brunei Darusalam, Abel Guterres hateten iha fulan Novembru bainhira Prezidente Repúblika, José Ramos-Horta hala’o vizita Estadu ofisiál bá iha nasaun Brunei Darusalam sei assina mós akordu bilaterál ho Brunei Darusalam ne’ebé iha komitmentu atu simu traballadór Timoroan ba servisu iha ne’ebá.

Lee Mós: Hadiri HUT ASEAN, Xanana Jamu Perwakilan Negara ASEAN

“Ohin ne’e mós fó breafing bá Prezidente Repúblika kona-bá vizita Estadu atu bá iha Brunei Darusalam. Kuandu Xefe Estadu vizita iha fulan Novembru, sei assina akordu entre nasaun rua no bainhira akordu ne’e assina ona ita nia traballadór Timoroan sira bele bá servisu iha Brunei Darusalam,” Embaixadór Abel Guterres hateten iha Palásiu Prezidensiál Nicolau Lobato, Bairru-Pité, Tersa (10/10/2023).

Diplomata ne’e hatutan, kona-bá kritéria ne’ebé traballadór Timoroan sira sei prienxe molok bá servisu iha Brunei Darusalam sei halo breafing ho Sekretáriu Estadu Formasaun Profisionál no Empregu (SEFOPE), hodi ko’alia kona-bá prossesu sira ne’e hotu.

Embaixadór Timor Leste bá Brunei Darussalem Abel Guterres.

“Ne’ebé hein de’it, kuandu loos ona aviaun Brunei Darusalam sei mai foti traballadór Timoroan sira,” nia hateten.

Traballadór Timoroan sira ne’ebé atu bá Brunei Darusalam sei hetan treinamentu uluk no iha ona abilidade balun ne’ebé prienxe rekizitu tékniku ne’ebé empreza sira iha Brunei Darusalam presiza.

Brunei Darusalam la aplika saláriu mínimu ba traballadór sira, maibé selu traballadór sira bazeia bá abilidade tékniku ne’ebé iha.

Empreza Stratacom Global Hasoru Prezidente Repúblika

Empreza Stratacom Global hosi Brunei Darusalam hasoru-malu ho Prezidente Repúblika, José Ramos-Horta hodi hato’o komitmentu atu investe iha Timor-Leste.

“Empreza Stratacom Global mai Timor-Leste ba da-haat ona. Sira hakarak investe iha área Turizmu, iha zona Baucau no mós Díli. Sira hakarak halo dezenvolvimentu iha área tasi ibun  no empreza mós sei investe iha área sira seluk ne’ebé Governu presiza sira halo inklui petroleum,” Abel Guterres informa.

Empreza Stratacom Global iha ona preparasaun ba akordu ho Governu Timor-Leste, tanba investimentu ne’ebé empreza ne’e sei halo, fó mos servisu ba Timoroan no bele kontribui bá dezenvolvimentu nasionál.

Prezidente Repúblika, José Ramos-Horta agradese no sei fó apoiu bá empreza hosi Brunei Darusalam ne’ebé hakarak no iha komitmentu atu investe iha Timor-Leste.

“Prezidente Repúblika kontente loos simu sira tanba empreza Stratacom Global hakarak investe iha ita nia rain,” nia dehan.

Jornalista: Vito Salvadór