Hatutan.com, (05 Novembru 2023), Díli- Prezidente Repúblika (PR), José Ramos-Horta hamutuk ho Liurai Brunei Darussalam, Hassanal Bolkiah sei sai testemuña sintura Memorandu Entendimentu ida kona-bá Mobilidade Traballu, hodi permite Timor-oan sira ne’ebé elijivél atu servisu iha indústria sira iha Brunei.

Lee Mós: Xanana ho Liurai Hassanal Bolkiah Ko’alia Kooperasaun Bilaterál

PR José Ramos-Horta halo vizita Estadu bá Brunei Darrusalam, Domingu (05/11/2023). Foto/Média GPR

Asinatura Memorandu Entendimentu ida-ne’e Prezidente Repúblika José Ramos-Horta sei fó nia testemuña direita durante hala’o vizita  Estadu bá nasaun Brunei Darussalam no Filipina.

Vizita ofisiál Xefe Estadu nian ne’e hodi hatán bá konvite husi Sua Majestade Hassanal Bolkiah Ibni Omar Ali Saifudden III Sultaun Brunei Darussalam no Prezidente Repúblika Filipina,  Bongbong Marcos.

Sita hosi komunikadu  imprensa  hosi Gabinete Média Palásiu Prezidensiál, Domingu (05/11/2023), haktuir Prezidente Repúblika, José Ramos-Horta no delegasaun sei to’o iha Brunei Darussalam iha kalan, 5 fulan-Novembru.

Brunei Darussalam sai hanesan nasaun primeiru ida-ne’ebé estabelese relasaun diplomátika ho Timor-Leste dezde Timor-Leste restaura nia independénsia iha 20 fulan-Maiu 2002. Relasaun bilaterál ne’e kontínua aumenta bá beibeik ho lasu amizade ne’ebé país rua ne’e iha.

Prezidente Repúblika José Ramos-Horta, hein atu servisu hamutuk ho Sua Majestade Hassanal Bolkiah hodi habelar relasaun ida-ne’e bá Parseria Estratéjika.

Iha Brunei Darussalam, Xefe Estadu sei hala’o sorumutuk ida ho Sua Majestade Sultaun no Yang Di-Pertuan Brunei Darussalam nian iha Cheradi Laila Kenchana, Istana Nurul Iman.

Durante vizita ne’e, Prezidente no Sua Majestade sei testemuña sintura Memorandu Entendimentu ida kona-bá mobilidade traballu hodi permite Timor-oan sira ne’ebé elejivel atu servisu iha indústria sira iha Brunei.

Xefe Estadu mós sei hala’o palestra iha Universidade Brunei Darussalam, ho tema “Timor-Leste nia viajen difisil bá nasaun viziñu no ninia trajetória ekonómika Sosiál.

Loron da-ruak, Prezidente José Ramos-Horta sei vizita Temburong Taman Rekreasi Bukit Patoi, Entru Médiku Parke Jerudong no Sentru Kankru Brunei, Muzeum Royal Regalia no Jestaun Negósiu iha Polo Club Jerudong.

 “Brunei koñesidu hanesan pulmaun iha Sudeste Aziátiku. Tanba ne’e importante atu aprende kona-bá sira-nia polítika ambientál iha tempu ne’ebé mudansa klimátika sai ameasa sériu bá umanidade,” sita hosi komunikadu ne’e.

Iha loron 8 fulan-Novembru, Prezidente Repúblika José Ramos-Horta sei kontinua halo viajen ba Filipina hodi hala’o vizita Estadu nian hahú husi loron 9 to’o loron 11 fulan-Novembru.

Prezidente Ramos-Horta iha belun barak iha Filipina, relasaun ida-ne’ebé iha ona antes Timor-Leste nia independénsia.

Prezidente Ramos-Horta no Prezidente Filipina hasoru malu foin lalais ne’e iha Simeira ASEAN-GCC ne’ebé hala’o iha Riyadh no dezenvolve lalais relasaun ida-ne’ebé di’ak tebes. 

Prezidente sei akompaña husi Vise Primeiru Ministru, Ministru Koordenadór Asuntu Ekonómiku no Ministru Turismu no Ambiente Francisco Kalbuadi Lay, Ministru Negósiu Estranjeiru no Kooperasaun Bendito dos Santos Freitas no Vise-Xefe Estadu-Maiór Jenerál Forcas Armadas, Jenerál Calisto dos Santos “Koliati.”

Konvidadu espesiál na’in haat husi Prezidente Repúblika mak Xefe Suku Fatumasi, Flaviana Babo da Costa; Xefe Suku Sifin, Abrão Caunan; no komersiante ambulante laran di’ak ida, Armindo Martins, no funsionáriu apoiu sei sai parte husi delegasaun ne’e. Prezidente Repúblika, José Ramos-Horta sei fila hikas hosi Manila iha loron 12 fulan-Novembru.

Jornalista: Vito Salvadór