Hatutan.com, (12 Outubru 2023), Díli– Parlamentu Nasionál (PN) liuhosi Komisaun A ne’ebé trata asuntu Lejizlasaun no Justisa liuhusi fiskalizasaun Komisaun A bá Servisu Notariadu iha Munisípiu Díli, identifika menus rekursu umanu, ekipamentu no espasu kloot hodi prezudika forma naruk.

Lee Mós: Forma Naruk Trata BI-Sertidaun RDTL, Tenke Investiga Funsionáriu Broker Sira

Sidadaun sira forma hodi trata Billete Identidade (BI), Sertidaun Repúblika Demokrátiku Timor Leste (RDTL), Sertidaun Kazamentu no Sertidaun Óbitu (Mate) iha Diresaun Munisipál Konservatóriu Servisu Rejistu Notariadu Díli, Tersa (10/10/2023). Foto/Tomé da Silva.

“Foin daudaun komisaun A bá fiskalizasaun katak atu bá haree prosesu administrasaun sira la’o di’ak ka lae intermus rekursu umanu sira sufisiente para depois hala’o servisu sira ne’e ka lae? ekipamentu sira atu fasilita servisu sira ne’e iha ka lae?,” Prezidente Komisaun A PN, Patrocíno Fernandes bá Hatutan.com iha PN, Kinta (12/10/2023).

Patrocíno Fernandes hateten, Komisaun A la iha kompeténsia atu haree bá kazu broker sira iha notariadu.

“Ko’alia fila-fali bá broker iha broker laiha broker ne’e la’ós kompeténsia komisaun A nian atu bá haree ida-ne’e, ha’u hanoin buat ida importansia mídia sira nian maka bainhira imi hetan imformasaun sira hanesan ne’e imi tenki públika aliende halo mídia investigativu ida kle’an depois fó sai bá públiku para redúz buat sira ne’e no ita hatene katak buat ne’e iha duni, depois ita kaer fó sansaun, no ha’u hanoin lei kona-bá ida-ne’e iha hotu ona sé karik akontese ida-ne’e dehan katak mall-administrasaun mosu iha ne’ebá karik média sira nia papél ne’e importante iha ne’ebá para atu bele hetan informasaun kle’an kona-bá ida-ne’e,” Deputadu Patrocínio hateten.

Komisaun A nu’udár instituisaun ida estadu nian husi Parlamentu Nasionál (PN), katák komisaun A nia servisu espesializada bá (PN). Patricíno Fernandes haktuir komisaun A identifika sidadaun sira forma naruk tanba kauza husi espasu no  rekursu umanu limitadu atu atende ema barak no iha parte seluk mak notariadu iha munisípiu  kondizaun laiha, espasu laiha inkliu ekipamentu laiha entaun ema sira iha Munisípiu atu asesu bá dokumentu ladi’ak entaun sira mai mai konsentra hotu iha Díli  entaun situasaun ida-ne’e mak halo   sidadaun sira trata dokumentu loro-loron aumenta hodi kauza forma naruk.

Komisaun A halo hotu ona fiskalizasaun no agora daudaun tékniku sira hakerek daudaun ona iha relatóriu no rekomendasaun sira ne’e iha hotu ona relatóriu no  sei leitura iha plenária hodi públiku bele asesu no sei rekomenda bá Governu hodi tau atensaun no presiza hadia’ak faillansu hirak ne’e

Rekomenda bá Governu katak problema espasu atendimentu públiku presiza tau iha konsiderasaun no prioridade bá Governu nia programa iha tinan oin no la’ós katák faillansu sira ne’ebé detekta ne’e la’ós milagre para bá hamoos tiha ne’e laiha ona, maibé  iha vontade atu deskobre faillansu hirak ne’e no buka nia alternativu no solusaun.

Jornalista Estajiária : Zita Menezes