Hatutan.com, (13 Outubru 2023), Díli—Vise-Ministru Assuntu Parlamentár, Adérito Hugo da Costa atualiza katak, oras ne’e daudaun Governu ho pasiénsia hein hela bankada Partidu CNRT ne’ebé to’o ohin loron sei esforsu hodi kontaktu ho bankada FRETILIN iha Parlamentu Nasionál (PN) atu bele hetan kandidatu konsensuál bá Komissáriu Comissão Anti Corrupção (CAC) hodi avansa bá eleisaun.

Vise-Ministru Asuntu Parlamentár, Adérito Hugo da Costa. Foto: Media PN.

Adérito Hugo da Costa esplika, Governu sei nafatin tuir meius sira ne’ebé bankada sira halo kontaktu no ida-ne’e la’ós fásil tanba durante semana hirak ne’e nia laran, desde submete naran rua ne’e mai iha ne’e, bankada sira halo ezersísiu makaas, kontaktu, halo komunikasaun oinsá maka bele hetan konsensu.

Lee Mós: Polémika Eleisaun Komisáriu CAC, CNRT Prefere Governu Komunika Fali ho Bankada FRETILIN

Parte Governu iha esperansa no nafatin atualiza hosi liu hosi konferénsia bankada atu kontinua rona nafatin, no Governu kontinua fó nafatin tempu bá bankada sira atu rona sira nia kontaktu bá malu.

“Ami akompaña hela sira nia loby. Bainhira iha ona konsensu ami tau ajenda dala ida tán. Tanba, regra iha Lei bá Komissáriu CAC, nia rekezitu maka ida-ne’e no ida-ne’e kustu demókrasia no laiha partidu ida iha eleisaun liubá ne’e mak manán maiória ho kualifikadu, laiha partidu ida mak manán forma Governu mesak,” Adérito Hugo hateten iha resintu PN, Sesta (13/10/23).

Vise-Ministru Assuntu Parlamentár ko’alia ne’e tanba bankada partidu ne’ebé mak sustenta Governu  ida-ne’e maka kadeira 37, rekezitu Lei hateten tenki iha kadeira 49 deputadus iha plenária.

“Ida-ne’e mak ami dehan katak hotu-hotu ho Governu deside ona ho ema na’in-rua, ami entrega bá Parlamentu atu bankada sira jere ho konsiderasaun bá importánsia entidade ida Comissão Anti-Corrupcão,” Adérito Hugo esplika.

Nia rekoñese katak, buat ida konsensu ne’e la fásil iha situasaun sira haneaan ne’e, entaun Governu pasiénsia hodi akompaña nafatin dinámika kontaktu entre bankada sira nune’e bele halo andamentu funsionamentu normál bá CAC nian.

Jornalista Estajiária : Zita Menezes