Hatutan.com, (16 Outubru 2023), Abu Dhabi- Sekretáriu Jerál Muslim Council of Elders (MCE), Mohammed Abdelsalam, apresia no hahí  Prezidente Repúblika Timor-Leste José Ramos-Horta nia kontribuisaun bá pás no rekonsiliasaun iha mundu.

Lee Mós: Abdullah bin Zayed Al Nahyan Promete Mobiliza Investidór UEA Investe iha TL

Sekretáriu Jerál MCE Mohammed Abdelsalam hato’o deklarasaun ne’e bainhira simu vizita ofisiál Prezidente Repúblika José Ramos-Horta nian bá iha sede Sekretariadu Fraternidade Umanu no Muslim Council of Elders, iha Abu Dhabi, Domingu (15/10/2023).

Prezidente Repúblika José Ramos-Horta entrega prenda bá Sekretáriu Jerál Muslim Council of Elders (MCE), Mohammed Abdelsalam, iha Etihad Tower, Abu Dhabi, Domingu (15/1/2023). Foto/Vito Salvadór

Sekretáriu Jerál Muslim Council of Elders, Mohammed Abdelsalam sente onra tebes tanba Prezidente Repúblika Timor-Leste, José Ramos-Horta mai iha sede prémiu Internasional Zayed nian bá Fraternidade Umanu, no mós iha sede Muslim Council of Elders nian, la’ós de’it nu’udar Prezidente no lider Timor-Leste nian, maibé mós nu’udar kampiaun mundiál ida hodi promove valór Fraternidade Umana, koezisténsia no toleránsia, la’ós de’it iha Timor-Leste, maibé mós iha rejiaun ida-ne’ebé luan liu iha Sudeste Aziátiku.

“Tanba ne’e mak ita iha onra ohin iha prémiu Internasional Zayed ba Fraternidade Umanu no Muslim Council of Elders simu Ramos-Horta nu’udar ezemplu ida, hodi hatudu valór sira husi konsisténsia, respeitu no komprensaun ba malu. No ita haree iha Timor-Leste ezemplu reál ida kona-ba oinsá nasaun ki’ik ida-ne’ebé iha rekursu ne’ebé haraik-na, fitun ida-ne’ebé iha dalan atu hetan dame, konsisténsia no fraternidade umanu ho ninia viziñu hotu no rejiaun tomak,” Sekretáriu Jerál Mohammed Abdelsalam.

Jornalista Hatutan.com, Vito Salvadór, ne’ebé akompaña vizita Estadu Prezidente Repúblika, José Ramos-Horta nian hosi Abu Dhabi, informa katak  Timor-Leste nia relasaun amizade ho Indonézia  nu’udár  ezemplu rai-rua ne’ebé moris iha dame, armonia no respeitu bá malu.

“Há’u iha mensajen atu hato’o bá povu Timor-Leste. Há’u hatete bá imi katak imi tenke sente orgullu tanba maski Ita ho ita sira hanesan nasaun simples no foin dezenvolve, maibé imi iha lider boot ida, Prezidente úniku iha mundu ne’ebé nu’udar premiadu Nobel ba Pás no mós membru xave ida no membru importante sira iha família Prémiu Internasional Zayed nian bá Fraternidade Umanu. No ho fiar ida-ne’e, imi sei kontinua moris-di’ak no iha futuru ne’ebé naroman liu ba imi-nia rai, tanba imi-nia espíritu laran-metin no ezisténsia nian ne’ebé imi iha,” Sekretáriu Jerál Muslim Council of Elders, Mohammed Abdelsalam hateten.

Zayed human fraternity award hakarak  harii sede iha TL

Prezidente Repúblika José Ramos-Horta hateten, enkontru ho Sekretariadu Fraternidade Umanu no Sekretáriu Jerál Muslim Council of Elders hodi kontinua diskute kona-bá Pás no mós rekonsiliasaun.

Prezidente Repúblika José Ramos-Horta enkontru ho Sekretáriu Jerál Muslim Council of Elders (MCE), Mohammed Abdelsalam, iha Etihad Tower, Abu Dhabi, Domingu (15/1/2023). Foto/Vito Salvadór

Nia afirma dezde 2021 hahú ona dezenvolve relasaun ho Muslim Council of Elders, bainhira hetan konvite atu sai nu’udár juri internasionál bá iha prémiu Zayed human fraternity award, no iha tinan sira nia laran ne’e sempre halo esforsu maka’as bá divulgasaun dokumentu Fraternidade Umanu no sira hakarak atu loke eskritóriu boot ida iha Timor-Leste.

“Sira rasik loke eskritóriu boot rejionál iha Jakarta, no sekretariadu Fraternidade Umana hakarak loke eskritóriu boot ida iha Timor-Leste, no eskritóriu ne’e bele uza de’it iha semana ida kada tinan bainhira presiza ba halo reuniaun no hafoin de ida ne’e ita iha Timor-Leste mak bele utiliza bá nesesidade sira ne’ebé iha em relasaun ho Fraternidade Umanu,” Ramos-Horta haktuir.

Ramos-Horta hatutan sede Fraternidade Umanu ne’e sei harii iha Timor-Leste, sei kontribui atu halo Timor-Leste sai fatin bá hakiak dame no toleránsia ne’ebé sei sai ezemplu bá mundu no relasaun Timor-Leste nian ho Muslim Council of Elders  no Fraternidade Umana metin liután. ***