Hatutan.com, (16 Outubru 2023), Abu Dhabi- Ministru Negósiu Estranjeiru no Kooperasaun Internasionál (MNEKI), Uniaun Emiradu Árabe (UEA), Liurai Abdullah bin Zayed Al Nahyan, promete mobiliza investidór sira hosi UEA  mai investe iha Timor-Leste hodi tulun dezenvolvimentu ekonomia no kria kampu servisu barak liután bá Timoroan sira.

Lee Mós: TL-UEA Sei Aselera Relasaun Bilaterál iha Setór Ekonomia, Komérsiu no Investimentu

Prezidente Repúblika José Ramos-Horta hasoru malu ho Ministru Negósiu Estranjeiru no Kooperasaun Internasionál (MNEKI), Uniaun Emiradu Árabe (UEA), Liurai Abdullah bin Zayed Al Nahyan, iha Otel St Regis Abu Dhabi National Tower, Domingu (15/10/2023). Foto/Vito Salvadór

Kompromisu ne’e Liurai Abdullah bin Zayed Al Nahyan, hato’o diretamente Prezidente Repúblika (PR), José Ramos-Horta, liuhosi sorumutuk ne’ebé hala’o iha Otél St Regis Abu Dhabi National Tower, Domingu (15/10/2023).

Jornalista Hatutan.com, Vito Salvadór, ne’ebé akompaña vizita Estadu Prezidente Repúblika, José Ramos-Horta iha Abu Dhabi, relata katak sorumutuk ho Ministru Negósiu Estranjeiru no Kooperasaun Internasionál UEA nian ne’e haree  no hakle’an asuntu sira ne’ebé ko’alia kona-bá oinsá atu aselera dezenvolvimenturRelasaun bilaterál, hodi halais kooperasaun iha setór oin-oin, liuliu iha setór ekonomia, komérsiu, investimentu, no asaun klimátika.

Ramos-Horta hateten, Timor-Leste presiza atu iha mós investor sira hosi UEA nian ne’ebé sei tulun atu investe iha área infraestrutura otél nian tanba bainhira Timor-Leste sai membru permanente ASEAN iha tinan sira mai ne’e presiza iha otél ne’ebé akumulativu no iha fatin ba konferénsia nivel internasionál.

“Ha’u ko’alia ho Ministru Negósiu Estranjeiru no Kooperasaun Internasionál UEA nian, no nia hanesan mos liurai boot nia alin ikun no nia hateten UEA prontu atu no sira sei mobiliza investidór iha ne’e bá investe iha área infraestrutura otél iha Timor-Leste. Ne’e hanesan business no la’ós ajuda tamba ita presiza dunik investidór sira husi UEA atu bele fó kampu traballu bá Timoroan sira no ajuda kria kondisaun ba Timor-Leste iha futuru,” Prezidente Repúblika José Ramos-Horta hateten.

MNEKI UEA Sei Vizita Timor-Leste

Prezidente Repúblika José Ramos-Horta hateten MNEKI UEA Liurai Abdullah bin Zayed Al Nahyan iha kompromisu boot atu vizita Timor-Leste hodi hametin kooperasaun país rua.

“Nia hakarak ba vizita Timor-Leste, uluk kedas nia halo planu atu ba vizita Timor-Leste maibé tanba COVID-19 akontese nia la bá, maibé agora nia promete sei  bá iha tempu badak,” Ramos-Horta informa.

Prezidente Repúblika José Ramos-Horta entrega prenda bá Ministru Negósiu Estranjeiru no Kooperasaun Internasionál (MNEKI), Uniaun Emiradu Árabe (UEA), Liurai Abdullah bin Zayed Al Nahyan, iha Otel St Regis Abu Dhabi National Tower, Domingu (15/10/2023). Foto/Vito Salvadór

Ramos-Horta subliña UEA iha hakarak dunik atu hametin relasaun ho Timor-Leste no hein katak situasaun agora ne’e garante atu Timor-Leste no UEA sei iha relasaun ida metin loos no UEA bele ajuda Timor-Leste no liu-liu mobiliza investidór sira ba investe iha Timor-Leste.

Enkontru entre Prezidente Repúblika José Ramos-Horta no Ministru Negósiu Estranjeiru no Kooperasaun Internasionál hetan mós akompañamentu husi I Vise Primeiru-Ministru no Ministru Koordenadór Asuntu Ekonomia no Ministru Turizmu no Ambinte Timor-Leste Francisco Kalbuadi Lay no Vise Ministra Asuntu ASEAN Milena Rangel. ***