Hatuta.com, (18 Outubru 2023), Abu Dhabi—Prezidente Repúblika (PR), José Ramos-Horta apresia no enkoraza traballadora Timoroan na’in-haat ne’ebé servisu iha Abu Dhabi atu kontinua hatudu hahalok di’ak hodi loke oportunidade bá Timoroan sira seluk.

Jornalista sira entrevista ho traballadora Timoroan sira iha Abu Dhabi, hafoin hasoru-malu ho Prezidente Repúblika, José Ramos-Horta iha St Regis Abu Dhabi National Tower, Kuarta (18/10/2023). Foto: Vito Salvadór.

Ramos-Horta hasoru-malu ho traballadora na’in-haat ne’e iha otél St. Regis Abu Dhabi National Tower, hodi rona sira nia esperiénsia servisu no atividade diária durante hetan kontratu hosi empreza sira iha Abu Dhabi.

Lee Mós: Ramos-Horta Husu Governu Lori Fila Traballadora Timoroan iha Abudabi

Prezidente Repúblika rona sira nia situasaun katak, sira hala’o serbisu ho seguru iha Abu dabi no nia kontente loos haree traballadora sira mai liu hosi Ajénsia Nasionál INCANTO Group ne’ebé halo rekrutamentu ba sira.

“Uluk ha’u ko’alia ho INCANTO atu sira bele haree, ko’alia ho Uniaun Emiradu Árabe, Dubai no Abu Dhabi ho di’ak atu sira simu traballadór Timoroan. Iha UEA ne’e iha konfiansa tanba laiha problema,” Ramos-Horta hateten iha Otel St Regis Abu Dhabi National Tower, Kuarta (18/10/2023).

Xefe Estadu la konkorda bainhira haruka traballadór Timoroan sira bá rai balun ne’ebé laiha seguransa de vida, maibé iha Abu Dhabi no Dubai ne’e iha konfiansa boot.

Ramos-Horta dehan traballadora timooan sira ne’e maski Serbisu iha Abu Dhabi manán osan ladún boot, maibé sira hatudu espíritu forte hanesan joven timoroan seluk ne’ebé buka esperiénsia iha ema-nia rai.

“Sira manán osan ladun bo’ot. Se dollar karik sira manán de’it $300 no serbisu todan. Maibé, sira rasik hateten ami manán esperiénsia de’it tanba hakarak aprende buat ruma ne’e di’ak. Há’u mós hateten beibeik, ba li’ur ne’e la’ós de’it tanba osan maibé buka manán mós esperiénsia, ne’e hanesan eskola iha universidade di’ak ida, loron ruma fila ho koñesimentu di’ak, no servi rai Timor,” Ramos-Horta dehan.

Traballadora timoroan, Gralha Arlete Josefina Baquita hateten, bainhira to’o iha Abu Dhabi,  empreza ne’ebé fó kontratu servisu bá sira prepara ona buat hotu no halo resepsaun bá traballadór sira ho dignu.

“Bainhira ami to’o iha rai Abu Dabhi empreza prepara buat hotu ona mai ami, sira simu ami ho di’ak, haksolok, no la to’o semana ami serbisu kedan. Sira fahe ami serbisu tuir ami ida-idak nia área, balun iha Casher no balun iha restaurante no seluk tán,” Gralha Arlete Jusefina Baquita hateten.

Traballadora ne’e hatutan, kontratu ne’ebé sira iha tuir akordu ne’ebé empreza halo ho ajénsia INCANTO bá tinan rua de’it no oras ne’e sira servisu ona tinan ida ho balun, falta fulan neen deit tuir kontratu ne’ebé iha.

Empreza ne’ebé fó servisu bá sira hakarak fó tán oportunidade maibé depende bá serbisu, se sira konfortável bele estende tán.

“Atu dehan de’it, tratamentu empreza nian bá traballadór hotu liu-liu mai ami sente di’ak tanba tuir akordu ne’ebé iha no tuir mós kultura nasaun ne’e nian, laiha diskriminasaun hanesan rasa no relijiaun,” nia dehan.

Kona-bá saláriu ba traballadór sira tuir kontratu ne’ebé iha no sente sufisiente, hanesan Timoroan no foin-sa’e ida sente kontente maski ho remunerasaun ki’ik maibé bele hetan oportunidade no manán esperiénsia foun barak liután atu loron ruma fila bá Timor bele aplika no kria empregu ba an rasik.

Gralha Arlete Josefina Baquita dehan, kona-bá difikuldade, konseteza moris iha ema-nia nasaun hetan difikuldade hanesan tentasaun no kolen, maibé ne’e esperiénsia halo sira forsa liután.

Tempu Badak TL Instala Embaixada iha UEA

Traballadora Timoroan iha Uniaun Emiradu Árabe liu-liu iha Abu Dhabi sente kontente tanba tempu besik Timor-Leste (TL) sei instala embaixada iha UEA.

“Ami rona hosi Prezidente Repúblika José Ramos-Horta katak, ita nia embaixada Timor-Leste nian sei instala iha ne’e no ami kontente tanba bá oin ami bele trata ami nia dokumentu sira fásil liu no ita nia koperasaun bilaterál bele metin liután. Kontente tanba IX Governu Konstitusionál iha planu atu estabelese Embaixada Timor-Leste iha Abudabi,” Gralha Arlete Josefina Baquita hateten.

Ikus liu, traballadora Timoroan sira ne’e ho domin no korazen hato’o mensajen bá Timoroan seluk katak, bainhira  iha oportunidade, tenke koko, hodi hasoru dezafiu sira ho potensialidade ne’ebé iha hodi kontribui bá Timor-Leste iha futuru.

Jornalista: Vito Salvadór