Hatutan.com, (19 Outubru 2023), Riyadh—Arábia Saudita liu hosi Fundu Dezenvolvimentu, prontu atu halo investimentu no apoia dezenvolvimentu Timor-Leste (TL) iha seitór Agrikultura, Peska, Infraestrutura no Turizmu.
Prezidente Repúblika (PR), José Ramos-Horta simu direta hosi Diretór Ezekutivu Fundu Dezenvolvimentu Árabia Saudita Sultan Al-Marshad iha Otél Ritz-Carlton, provínsia Riyadh, Kinta (19/10/2023). Foto: Vito Salvadór.
Prontiduan ne’e Prezidente Repúblika (PR), José Ramos-Horta simu direta hosi Diretór Ezekutivu Fundu Dezenvolvimentu Árabia Saudita Sultan Al-Marshad hamutuk ho nia vise Faisal Al-Kahtani no Xefe Gabinete Ministru Turizmu Árabia Saudita Ahmad Al-Husssaini, hamutuk ho Asesora ba Gabinete Ministru Turizmu Árabia Saudita Anan Al-Alwan, durante enkontru ne’ebé hala’o iha Otél Ritz-Carlton, provínsia Riyadh, Kinta (19/10/2023).
Lee Mós: Ramos-Horta To’o Ona Arábia Saudita Atu Partisipa Simeira ASEAN-GCC
Ramos-Horta hateten enkontru ho responsável másimu Arábia Saudita nian ba fundu dezenvolvimentu ne’e hanesan institutusaun númeru um iha Arábia Saudita ne’ebé apoia projetu oin-oin iha mundu.
Fundu Dezenvolvimentu Arábia Saudita nian bele apoia projetu sira bá dezenvolvimentu hosi rai ruma ne’ebé hakarak no sira bele apoia iha área infraestrutura, Agrikultura, Peska no turizmu inklui dezenvolvimentu sira seluk depende bá nesesidade.
“Fundu dezenvolvimentu Arábia Saudita nian mós bele fó empréstimu ho funan kamán, la hanesan ho banku komersiál sira ne’ebé ho funan ne’ebé todan tebes. Bá Governu iha terseiru mundu, país não dezenvolvidu empréstimu ne’e nia funan kamán,” Ramos-Horta hateten.
Xefe Estafu mós esplika ba sira katak, kestaun kona-bá dezenvolvimentu ne’e pertense ba Governu nia kompeténsia maibé nia hatene katak prioridade nasaun Timor-Leste nian iha planu IX Governu Konstitusionál nian ba tinan lima mai ne’e mak kontinua investe iha infraestrutura, tanba sei falta estrada barak, liu-liu iha suku, aldeia no área remotas sira ne’ebé presiza duni assesibilidade ba estrada.
Sorumutu ne’e Xefe Estadu ho delegasaun fundu Dezenvolvimentu Arábia Saudita Ko’alia mós kona-bá infraestrutura otél, tanba bainhira Timor-Leste nia adezaun ba ASEAN presiza otél no presiza mós otél atu bele dezenvolve seitór turizmu.
“Ba assuntu sira ne’e hotu sira prontu no sira hateten Governu Timor-Leste prontu, semana ida nia laran, ekipa ida hosi Arábia Saudita bele to’o ona iha Díli,” Xefe Estadu hateten.
Klaru katak Xefe Estadu bainhira to’o iha Dili sei halo breafing ida ho Primeiru-Ministru no Xefe Governu mak sei determina konvite bá sira atu ba Díli haree no halo avaliasaun, ko’alia, estuda no depois Governu mak haree desizaun saida, halo pedidu hanesan apoiu donativu ou emprestimu ne’ebé ho funan kaman ou bele halo mós investimentu públiku privadu no bele dada tán parte terseiru ida hodi bele investe iha seitór ne’ebé Governu Timor-Leste hakarak.
Prezidente Repúblika mós esplika ho detallu bá sira katak, Timor-Leste nasaun ki’ik, la’ós ki’ak rabat rai, Timor-Leste iha meius no hakarak dezenvolve relasaum amizade ho Arabia Saudita.
Jornalista: Vito Salvadór