Hatutan.com, (23 Outubru 2023), Díli— Sekretáriu Estadu Komunikasaun Sosiál (SEKOMS), Expedito Dias Ximenes kontente ho média online Hatutan.com no konsidera ninia prezensa extraordináriau tebes ho ninia moto: lais, atuál no konfiável ne’ebé maski foin tinan rua maibé ninia produtu sira konsege hetan duni konfiansa hosi públiku no sai inspirasaun bá média sira iha Timor-Leste (TL).

Sekretáriu Estadu Komunikasaun Sosiál Expedito Dias Ximenes ho Prezidente Conselho Imprensa (CI) Otelio Ote, hala’o vizita bá edifísiu Hatutan.com hodi haree direta ritmu serbisu média online ne’e iha rua Kampung Alor Díli, Segunda (23/10/2023). Foto: Hatutan.com.

Expedito espressa lia fuan ne’e iha ámbitu vizita bá edifísiu Hatutan.com hodi haree besik serbisu média ne’e iha Rua Kampung Alor, Díli, Segunda (23/10/23).

Lee Mós: Notísia Investigativu Kazu Set-top Box RTTL,E.P Lori Hatutan.com Manan Prémiu Francisco Borja da Costa no Manan Mós Prémiu Bernardino Guterres

Expedito konsidera extradináriu tanba maski foin eziste maibé iha tinan ida-ne’e ninia produtu sira konsgee manán prémiu rua kedan hosi Conselho Imprensa (CI) mak hanesan Premiu Bernardino Guterres no mós Prémiu Francisco Borja da Costa.

“Buat ida prémiu ne’e la’ós buat ida hanesan tun hosi lalehan. Prémiu ne’e halo avaliasaun hosi ita nia dezempeñu iha média ida-idak nian. Entaun, iha mundu barak bolu award maibé award ne’e aas liu. Entaun, ita bolu prémiu ne’e kategoria hanesan. Tanba ne’e ha’u hanesan reprezentante Governu bá iha Assuntu Komunikasaun Sosiál ha’u senti haksolok tanba Hatutan.com foin moris, foin hala’o knaar iha mundu jornalizmu liuliu hosi ninia karakterístika investigativu maibé bele hetan prémiu rua. Ida ne’e ha’u bolu extraordináriu,” Expedito hateten iha salaun enkontru Hatutan.com.

SEKOMS sita motto Hatutan.com nian, Atuál, Lais no Konfiánvel hodi halo interpretasaun katak, liafuan tolu ne’e iha nia signifikadu própriu, bainhira lalais, atuál maibé ema la konfia ne’e saugati de’it no bele laiha istória.

Tanba nee, nia dehan ho dezenvolvimentu teknolojia oras-ne’e daudaun kuaze hotu-hotu ne’e lalais la halimar, streaming sira agora ne’e mosu mai oioin, maibé ema bele konfia ka la’e.

CEO Hatutan.com Raul dos Reis Lemos oferese faru Hatutan.com bá Sekretáriu Estadu Komunikasaun Sosiál Expedito Dias Ximenes tanba konsidera SEKOMS nu’udár mahon bá média hotu-hotu iha Timor Leste.

“Dalabarak ne’e ema barak dehan katak, ikus liu ami tenke konfirma média konvensionál sira maibé dalabarak ho streaming ne’ebé agora ita la’o daudaun bele dehan katak Hatutan.com hatudu duni ninia atualidade no konfiável ida ka ema fiarliu,” SEKOMS hateten.

Ho ida-ne’e SEKOMS husu ekipa Hatutan.com atu kaer metin motto konfiável, tanba oras-ne’e daudaun prosesu jornada média iha Timor ne’e hosi rejime bá rejime desde tempu Portugés no tempu Indonézia tinan 24, depois haree iha prossesu indepedénsia tinan 21, oras-ne’e daudaun haree katak iha avansu no retrosesu iha kontextu ida dalabarak hakarak lalais maibé la senti katak notisia ne’e ema akompaña ka la’e, ema rona ka la’e ne’ebé despaixa de’it importante maka rona xefe redasaun katak loron ida halo notísia tolu atu kualidade iha ka laiha la importante.

Tuir SEKOMS nia haree katak, públiku oras-ne’e daudaun kestiona makás kona-bá kualidade informasaun, ne’e mak IX Governu tau tebes atensaun makaas bá iha formasaun no kapasitasaun bá jornalista sira.

“Agora ne’e ita kompete la’ós ona sa’e biskleta no karreta. Maibé, kompete hanesan sa’e aviaun ho roket semo makaas tanba teknolojia ne’e obriga ita tenke atualiza ita nia aan. Tanba ne’e, ha’u sente orgullu ohin bele mai iha ne’e. Ha’u senti katak Hatutan.com hatudu ninia prossesu transformasaun no hatudu ninia imparsiálidade, konfiável katak povu konfia. Bainhira ouvintes ka telepetadór sira konfia, signifika ita nia produtu ne’e simu iha públiku,” nia hatutan.

Expedito Loro Dias Ximenes mós konsidera Jornalista mak sai produtór bá informasaun ho telemóvel android maibé problema maka ne’e, informasaun ida sai hosi telemóvel ne’e hoax ka konfiável.

Se konfiávél maka tenke assegura nian kualidade tanba buat rua ne’ebé públiku haree importante, ida maka atuál nomós konfiável.

SEKOMS Expedito Dias Ximenes ho CEO Raya Media & Etretaiment no Hatutan.com Raul dos Reis Lemos asina kontratu bá publisidade nian durante fulan tolu hahú hosi Outubru to’o Dezembru 2023, iha edifísiu Hatutan.com Rua Kampung Alor Díli, Segunda (23/10/2023). Foto: Hatutan.com.

“Tanba ne’e maka ha’u agradese tebes tanba Hatutan.com sempre halo jornalizmu investigativu ne’ebé kle’an. Iha oportunidade ida-ne’e husu bá kolega jornalista sira, bainhira halo investigative, labele haree ema. Tenke haree bá saida mak ema ne’e halo. Sé ita haree bá ema tanba la gosta maka ha’u tenke kee ne’e ladún di’ak. Maibé sé ita haree bá interese públiku mak ha’u kee ne’e di’ak,” nia hateten tán.

Governante ne’e husu bá Hatutan.com ho sira seluk katak, iha liberdade atu halo saida de’it, entrevista sé de’it maibé keta haluha responsabilidade, tenke iha dadus ne’ebé atuál no kompletu nune’e bele responde bá públiku katak halo duni notisia investigativu, tanba média sira agora ne’e barak ne’e straight news de’it atu informa liu de’it maibé la kle’an.

“Tanba ne’e ha’u husu nafatin katak Hatutan.com sai ezemplu di’ak bá média sira seluk liuliu bá plataforma online sira hodi halo notísia ne’ebé sai ne’e kle’an no investigative,” Expedito husu.

SEKOMS agradese bá Chief Executive Officer (CEO) Hatutan.com Raul Dos Reis Lemos ne’ebé maski iha esperiénsia natón de’it kona-bá mundu média ninian, maibé konsege lori inspirasaun atu bele dezenvolve mundu jornalizmu no mundu informasaun ne’ebé nia hatudu daudaun ona bá mundu liuliu hatudu bá públiku Timor-Leste katak Hatutan.com parte ida hosi habelar informasaun bá dezenvolvimentu nasaun.

“Tanba ne’e, bainhira hotu-hotu hamriik bá interese nasaun nian maka IX Governu liu hosi SEKOMS sei hamriik iha kotuk atu apoia,” nia apresia.

CEO Hatutan.com Raul dos Reis Lemos oferese faru Hatutan.com bá Prezidente CI tanba konsidera CI nu’udár órgaun reguladór bá média hotu-hotu iha Timor Leste.

Iha fatin hanesan Prezidente Conselho Imprensa (CI), Otélio Ote hateten durante tinan barak nia laran servisu iha média, maibé nia apresia tebes ho mídia Hatutan.com desde inísiu.

“Tanba ne’e susar tebes ha’u rona buat barak kuaze sira na’in-rua Francisco Belo Simões da Costa hanesan Xefe Redasaun Simoes ho Cipriano Colo hanesan Koordenadór kobertura, katak ekipa ne’e ki’ik loos. Iha inisiu ita la hatene Hatutan.com ne’e média saida. Tanba ne’e, média ki’ik no ema komesa ko’alia dehan sira mai atu halo fali saida. Ami mak iha esperiénsia barak liu. Ami mak makás liu duké harii média ki’ik ida hanesan ne’e,” Prezidente CI hateten.

Ida ne’e, Otélio Ote atu de’it kona-bá saida mak prezensa Hatutan.com tanba bainhira ema la hatene istria kona-bá harii média ne’e no ema hanoin katak ne’e ki’ik maibé nia la hanoin katak ema mosu mai ho sistema ida metin tia ona.

“Tanba ne’e maka ha’u apresia ba CEO Hatutan.com Raul Lemos, ema ida ne’ebé mak iha jestaun di’ak kona-bá oinsa atu jere organizasaun, rekursu umanu no sira seluk maske laiha koñesimentu bá média,” nia apresia.

Otélio Ote mós apresia tebes ho notísia Hatutan.com lorloron tanba mai ho ema ida ne’ebé mak iha kompromisu, entaun komesa jere sira nia influénsia ba ema seluk to’o hetan ka manán prémiu rua iha tinan ne’e no orgullu tebes ida-ne’e.

“Atu hateten de’it bá média sira katak, atu ekipa boot ka ki’ik maibé depende bá traballadór sira ne’e nia performa. Ha’u nota ekipa ne’e preparadu hela maka foin daudaun Hatutan.com hetan prémiu rua. Ne’ebé, esforsu an atu tinan oin defende nafatin hodi manán tán. Hatutan.com sai inspirasaun bá média hotu-hotu,” nia ekoraza ekipa.

Iha oportunidade ne’e mós Otelio Ote rekoñese katak, hanesan Prezidente CI observa iha Timor Leste situasaun média sira problema barak liu makai ha Jestaun.

Nune’e, nia husu bá CEO Hatutan.com Raul Lemos ne’ebé iha esperiénsia barak ona kona-bá jestaun média, koñese ema barak iha Indonézia oinsa servisu hamutuk ho CI atu luta hamutuk oinsá bele oferese formasaun kona-bá jestaun, ou minimál halo estudu komparativu ba ema nia média.

“Tanba média iha Timor-Leste ne’e problema barak liu mak jestaun. Ho ida-ne’e dalaruma sei realiza iha tinan 2024,” nia hateten.

Prezensa Hatutan.com La’ós Atu Kompete

CEO Hatutan.com Raul dos Reis Lemos oferese simbólikamente karreta rua ho camera bá Xefe Redasaun atu fasilita ekipa Hatutan.com nia serbisu lorloron. Foto:Hatutan.com.

Iha fatin hanesan, CEO Hatutan.com Raul Lemos hateten, eziténsia Média Hatutan.com la’ós atu kompete ho média seluk, maibé atu kompleta malu ho média sira seluk ne’ebé eziste uluk ona iha Timor Leste hodi fahe informsaun bá públiku.

CEO ne’e konta tuir katak, Hatutan.com harii liu hosi prossesu naruk ida, la’ós hosi CEO de’it, maibé ho ekipa hanesan Xefe Redasaun, Koordenador Kobertura, Advogadu no sira seluk. 

“Hosi prosesu lubuk ida, ha’u foti desizaun katak presiza harii média ida la’ós atu kompete. Hatutan.com mai atu hamutuk ho média sira seluk atu fó ita nia kontribuisaun ba dezenvolvimentu bá rai ida ne’ebé ita hotu hadomi, liu hosi informasaun,” Raul Lemos esplika.

Raul Lemos mós esklarese katak, Hatutan.com moris ho nia karaktér investigativu ho nia prinsipiu ida katak nafatin la’o ba oin, sidi hamrik, hakat nafatin labele hakiduk ba kotuk, labele tauk, maski iha kro’at ruma iha oin.

“Tanba ita servisu ba nasaun ho povu Timor Leste nune’e mak ami tau naran Hatutan katak, atu hatutan informasaun bá públiku. Tanba ne’e agradese bá ekipa ne’ebé lidera hosi xefe redasaun Francisco Belo maski ekipa kiko’an,  maibé sempre hatudu katak ami bele,” nia hateten.

Sekretáriu Estadu Komunikasaun Sosiál Expedito Dias Ximenes ho Prezidente Conselho Imprensa (CI) Otelio Ote, hala’o vizita bá edifísiu Hatutan.com hodi haree direta ritmu serbisu média online ne’e iha rua Kampung Alor Díli, Segunda (23/10/2023). Foto: Hatutan.com.

Emprezáriu Timor oan ne’e mós hateten katak, maski hanesan CEO maibé laihaa podér atu halo intervensaun iha situasaun saida de’it bá iha notisia saida de’it maibé enkoraza nafatin ekipa atu hatudu neutralidade hodi serbi loos de’it públiku, bainhira loos dehan loos no sala dehan sala.

“Maski Hatutan.com ho nia karaktaer investigativu, maibé ami la’ós sai juíz atu foti desizaun sala ka la sala. Ami akompaña de’it prossesu ruma no informa bá públiku. Ida determina dehan sala ka la sala ne’e husik bá iha kompeténsia Tribunál nian,” nia dehan.

CEO Hatutan.com ne’e mós sujere bá SEKOMS atu tau-matan bá média tomak, liuliu unifika média sira atu iha unidade iha assuntu kobertura ninian hodi sai forsa ida atu sai duni mius hodi halo kontrolu sosiál ida forte iha nasaun ida ne’e.

CEO Hatutan.com iha konsiderasaun boot no respeita tebes média sira seluk, hanesan bebé ida foin moris Hatutan.com laiha hanoin atu kompete ho média seluk, Hatutan.com iha de’it prinsípiu atu hanoin hamutuk hodi fahe informasaun bá públiku.

CEO Entrega Prémiu bá Jornalista Hatutan.com

Manán-na’in bá prémiu Francisco Borja da Costa no Bernardino Guterres hosi Conselho Imprensa hanesan Cipriano Colo no Fotógrafu Elio dos Santos da Costa, entrega prémiu no trófeu bá CEO Hatutan.com Raul Lemos, maibé CEO ne’e entrega fila fali prémiu ne’e tanba konsidera ne’e direitu Jornalista sira nian, ho sira nia esforsu no abilidade.

Iha biban ida-ne’e, manán-na’in bá prémiu Francisco Borja da Costa no Bernardino Guterres hosi Conselho Imprensa hanesan Cipriano Colo no Fotógrafu Elio dos Santos da Costa entrega prémiu no trófeu bá CEO Hatutan.com Raul Lemos, maibé CEO ne’e entrega fila fali prémiu ne’e tanba konsidera ne’e direitu Jornalista sira nian, ho sira nia esforsu no abilidade.

“Sira entrega mai ha’u, ha’u entrega fila fali bá sira tanba buat sira ne’e la’ós ha’u nia servisu. Ha’u ne’e jere de’it, haree de’it, bele fasilita de’it, maibé buat ne’ebé sira hetan ne’e servisu sira nian. Sira nia esforsu no kosar been, no ita tenki respeita ita nia funsionáriu sira nia esforsu,” Raul Lemos konsidera.

Iha tempu hanesan CEO Raul Lemos mós ofisialmente entrega karreta rua ho marka Hylux no Camera bá Xefe Redasaun Hatutan.com hodi apoia jornalista sira nia servisu lorloron.

Karreta rua ne’ebé CEO Hatutan.com Raul dos Reis Lemos oferese atu fasilita ekipa Hatutan.com nia serbisu lorloron. Foto:Hatutan.com.

Aproveita oportunidade ne’e, SEKOMS Expedito Dias Ximenes ho CEO Raya Media & Etretaiment no Hatutan.com Raul dos Reis Lemos asina kontratu bá publisidade nian durante fulan tolu hahú hosi Outubro too Dezembru 2023.

Kontratu ne’e bazeia bá rekezitu iha Lei Rejime Jerál Aprovizionamentu bainhira instituisaun Estadu ida atu monta publisidade iha média.

“Kontratu ne’ebe Governu halo ho media sira nu’udar politika IX Governu Konstitusional nian hodi apoia media sira. La signifika apoiu ne’e ho intesaun atu halo intervensaun ba independensia media no independensia editorial,” Expedito Dias Ximenes afirma.

Ekipa Hatutan.com