Hatutan.com, (24 Outubru 2023), Díli—Prezidente Repúblika (PR), José Ramos-Horta fó pose bá  Lorosa’e da Silva Horta (Loro-Horta) ho Marciano Octavio Garcia da Silva nu’udár Embaixadór extraordinária Plenipotensiáriu, hodi reprezenta Estadu Timor-Leste iha nasaun Repúblika Populár Xina no Repúblika Filipina.

Prezidente Repúblika (PR), José Ramos-Horta fó pose bá Lorosa’e da Silva Horta (Loro-Horta) ho Marciano Octavio Garcia da Silva nu’udár Embaixadór extraordinária Plenipotensiáriu, hodi reprezenta Estadu Timor-Leste iha nasaun Repúblika Populár Xina no Repúblika Filipina, iha Palásiu Prezidensiál Nicolau Lobato Bairru-Pité, Tersa (24/10/2023). Foto: Elio dos Santos da Costa.

Ministru Negósiu Estranjeiru no Kooperasaun (MNEK), Bendito dos Santos Freitas hateten, Prezidente Repúblika José Ramos-Horta ezerse funsaun konstituisionál hodi fó nomeasaun bá Embaixadór dezinadus na’in-rua hanesan Embaixadór Marciano Octavio Garcia da Silva nu’udar Embaixadór Repúblika Demokrátika Timor Leste (RDTL) bá Repúblika Filipina, no nomeiasaun ba Embaixadór Maubere Lorosa’e da Silva Horta nu’udár Embaixadór Extraordináriu Plenipotensiáriu RDTL bá Repúblika Populár Xina.

Lee Mós: Prezidente Repúblika Husu Embaixadór Foun Tau Atensaun Bá Timor Oan Sira iha Reinu Unidu

“Tuir regra sira sei kumpri sira nia mandatu bá tinan tolu, maibé depois haree bá sira nia performes, servisu sempre iha konsiderasaun tanba ita presiza duni diplomata ne’ebé iha kualifikasaun, iha esperiénsia atu bele reprezenta Estadu Timor-Leste ho dignidade iha nível ne’ebé aas no atu bele halo diálogu ho parseiru sira no diplomata sira iha nível ne’ebé respeitadu,” Bendito dos Santos Freitas hateten iha Palásiu Prezidensiál Nicolau Lobato Bairru-Pité, Tersa (24/10/2023).

Embaixadór na’in-rua ne’e nu’udár kuadru Timorenese ne’ebé kualifikadu, sira na’in-rua ne’e antes ne’e hanesan ona Embaixadór no agora re-tomada bá misaun diplomátika.

Embaixadór, Marciano Octavio Garcia da Silva.

Embaixadór, Marciano Octavio Garcia da Silva agradese bá Estadu no Governu ne’ebé fó konfiansa ba nia nu’udár Embaixadór RDTL bá Repúblika Filipina.

Konfiansa ida-ne’e nia sei tane ho responsablidade, iha mós obrigasaun atu servisu bá povu no ba nasaun ida-ne’e.

Prioridade dahuluk sei hametin no habelar Timor Leste nia relasaun ho povu Filipina, tanba Timoroan barak mak eskola iha ne’éba.

“Hanesan diplomata no reprezentate Estadu Timor-Leste iha Filipina sei servisu atu proteze no tulun sidadaun oan sira ne’ebé hela iha rai Filipina,” nia promete.

Buat seluk maka, sei tulun explora oportunidade sira ne’ebé Filipina iha hodi lori mai Timor-Leste liu hosi kooperasaun atu bele tulun dezenvolvimentu nasionál liu hosi investimentu ruma iha Timor.

Embaixadór Maubere Lorosa’e da Silva Horta.

Embaixadór Maubere Lorosa’e da Silva Horta hateten, prioridade númeru dahuluk maka hametin relasaun bilaterál no promove Timor-Leste hodi atrai investidór sira mai halo investimentu iha Timor Leste.

Embaixadór ne’e dehan, Timor Leste iha problema barak ho dezempregu, tanba ne’e ninia prioridade númeru dahuluk mak atrai investedór hosi Xina mai investe iha Timor Leste, tanba Xina hanesan país bo’ot no segunda maiór ekonómika iha mundu no iha poténsia bo’ot atu bele mai investe iha Timor Leste.

“Ha’u nia relasaun ho Xina iha tempu kleur iha área akadémika. 2005 ha’u halo Estudu akadémiku iha universidade defeza nasionál iha Xina. 2014 to’o 2017 servisu iha Embaixada Xina hanesan konsilleru,” nia konta tuir.

Embaixadór Marciano Octavio Garcia da Silva antes ne’e nu’udar Embaixadór Timor Leste ba Zenebra no Maubere Lorosa’e da Silva Horta nu’udar Embaixadór Timor Leste bá Kuba.

Jornalista: Vito Salvadór