Hatutan.com, (23 Outubru 2023), Baucau—Polísia Nasionál Timor-Leste (PNTL) Munisípiu Baucau tenke uza forsa ho tiru  gás lacrimogêneo (gas air mata) no tiru uza pistola ho kilat dala-haat hodi atua grupu deskoñesidu lansa provoka malu to’o tuda-malu iha besik sentru votasaun Eskola Bázika Santu Domingos Xavio,  Suku Bahu, Postu Administrativu Baucau Vila, Munisípiu Baucau.

Lee Mós: Eleitór Suku Bahu La Kontente ho Mekanizmu Eleisaun Órgaun Suku

Eleisaun órgaun suku Bahu ne’ebé konsentra hotu iha Sentru Votasaun Eskola Báziku Santu Domingos Xavio kontínua la’o to’o tuku 21:08 Otl.

Eleitór sira Suku Bahu forma naruk hodi tuir eleisaun órgaun suku Bahu, 28 fulan-Outubru 2023. Foto/Francisco Simões

Tuir observasaun Hatutan.com nian  to’o tuku 20:03 Otl, iha sentru votasaun refere hatudu katak eleitór sira hosi Aldeia Ana-ulo, Ro-ulo, Boi-lé, ho Lamegua kontínua forma iha liña atu ezerse sira-nia direitu votu bá kandidatu xefe suku, xefe aldeia ho delegadu  Suku Bahu nian.

Maske kalan ona, abitante ka eleitór sira kontínua forma  ho hakmatek hodi bá vota.  Maske, antes ne’e, hale’u tuku 14 liu minutu balun, akontese dezastre ki’ik ida entre eleitór na’in-rua; feto ida no mane ida, baku malu tanba duun malu dehan ida mane ne’e halo asédiu seksuál hasoru inan feto ne’e.

Iha diskusaun maka’as to’o uza forsa baku malu no parte seluk tama la’ós atu akalma, maibé apoia parte balun hodi halo situasaun sai pániku uitoan. Nune’e, PNTL foti medida detein parte sira ne’ebé envolve iha insidente ki’ik ne’e hodi lori bá akalma sira iha Eskuadra PNTL, Postu Administrativu Baucau Vila.

Iha fali tuku 20:12 Otl,  PNTL obrigadu uza forsa hodi lansa tiru dala-haat ho kilat no pistola no tiru gás lacrimogêneo hasoru grupu juventude deskoñesidu ne’ebé tuda-malu iha estrada kruzamentu Santu António, Lamegua nian.   

Grupu deskoñesidu sira-ne’e hakilar-malu, provoka-malu to’o tuda-malu iha estrada laran iha kedas parte loja Palapa nia oin to’o fatuk kona portaun Eskola ne’ebé sai fatin Sentru Votasaun Suku Bahu nian.

Ho gás lacrimogêneo balun monu tama to’o iha arredór sentru votasaun halo abitante barak pániku no halai, inklui brigada STAE sira ne’ebé destaka iha sentru votasaun Suku Bahu nian ne’e.

 Ho polísia nia atuasaun ne’e konsege akalma situasaun no joven deskoñesidu sira ne’ebé tuda-malu halai lakon hotu. Nune’e, iha tuku 20:42 Otl, abitante sira ne’ebé seidauk vota kontínua  vota fali.

 To’o tuku 20:55 Otl, Aldeia Makadae hahú prosesu sura rezultadu eleisaun no  eleitór sira hosi Aldeia Boi-lé mós  vota hotu ona hodi hein atu sura de’it ona rezultadu eleisaun nian.

To’o notísia ne’e publika seidauk hetan konfirmasaun hosi autoridade Polísia Munisípiu Baucau kona-bá motivu hosi grupu deskoñesidu ne’ebé perturba orden públiku iha besik Sentru Votasaun Suku Bahu nian iha Baucau Vila Antiga ka Vila Salazar ne’e.

Jornalista : Francisco Simões