Hatutan.com, (29 Outubru 2023), Baucau—Kontajen votu eleisaun órgaun suku Bahu, Postu Administrativu Baucau Vila, Munisípiu Baucau, konklui ona iha  Domingu 29 fulan-Outubru 2023,  tuku 12:41 Otl.

Lee Mós: Tuda-Malu Besik Sentru Votasaun Bahu, Polísia Atua ho Tiru

Eleisaun Órgaun Suku Bahu, Postu Administrativu Baucau Vila, Munisípiu Baucau, 28 fulan-Outubru 2023. Foto/Francisco Simões

Akta Apuramentu Rezultadu Eleisaun Xefe Suku Bahu ne’ebé fó sai hosi pesoál STAE Apoiu Suku (PSAS) hatudu katak total eleitór suku Bahu 7.220, maibé eleitór ne’ebé tuir vota 3.768 de’it.

Hosi númeru eleitór suku ne’ebé vota hamutuk 3.768 ne’e, total votu nulu 170 no votu branku 32. Suku Bahu kompostu hosi aldeia  lima, mak hanesan Aldeia Ana-ulo, Ro-ulo, Boi-lé, Makadae ho Lamegua.

Manuel Gusmão ho José António Gusmão Hakat Bá Segunda Ronde

Eleisaun órgaun suku Bahu ne’ebé hala’o iha Sábadu to’o Domingu (28-29/10/2023),  nia rezultadu ikus hatudu katak kandidatu Xefe Suku Manuel F. R. Gusmão (xefe suku atuál) ho kandidatu xefe suku José António Gusmão hetan votu barak liu, maibé la liu bareira 50+1.

Haktuir bá lei órgaun suku númeru 9/2006 katak, bainhira la prienxe rekizitu ho votu 50+1 maka avansa bá eleisaun  segunda volta ne’ebé sei hala’o iha loron 13 fulan-Novembru 2023.

Kandidatu sira Xefe Suku Bahu nian. Foto/Francisco Simões

Rezultadu kontajen votu ne’ebé  fó sai hosi Pesoál  STAE Apoiu Suku (PSAS), katak eleisaun órgaun suku Bahu  ho kandidatu xefe suku na’in-neen (6) hetan votu barak liu mak kandidatu xefe suku Manuel  F.R. Gusmão ho númeru sorteiu 5 ho votu 1.330 no tuir fali mak kandidatu xefe José António Gusmão ho númeru sorteiu 4 hetan votu 948. Maibé, tanba la prienxe rekizitu votu to’o 50+1 tenke hakat ba eleisaun segunda ronde.  

Iha eleisaun órgaun suku 2023 ne’ebé hala’o iha loron, 28 fulan-Outubru ne’e, Suku Bahu iha nia kandidatu xefe suku na’in-neen (6), kompostu hosi Kandidatu Xefe Suku Eleutério A. Boavida ho númeru sorteiu 1, Fabiana S. Ribeiro (2), Faustino D. Soares (3), José António Gusmão (4), Manuel F.R. Gusmão (5) ho Miguel A. da Costa (6).

Kandidatu Xefe Suku Eleutério A. Boavida hetan votu 282, Fabiana S. Ribeiro ho hetan votu 362, Faustino D. Soares hetan votu 366, José António Gusmão ho hetan votu 948, Manuel  F.R. Gusmão hetan votu 1.330, no kandidatu xefe suku Miguel A. da Costa hetan votu  358.

Jornalista: Francisco Simões