Hatutan.com, (29 Outubru 2023), Lacló—Kandidatu númeru sorteiu 03, iha eleisaun órgaun suku tinan ne’e nian, Filomeno Rodriguês Pereira Cárceres, manán ho votu maioria absoluta iha Suku Lakumesak, Postu Administrativu Lacló, Munisipiu Manatuto.

Eleisaun órgaun suku, iha Sede Suku Lakumesak, Postu Administrativu Lacló, Munisipiu Manatuto, Domingu (29/10/2023). Foto: Rogério Pereira Cárceres.

Suku Lakumesak ho nia totál kandidatu na’in-lima mak hanesan, Angelina Correia Soares ho númeru sorteiu 1, Cipriano Correia Ximenes númeru sorteiu 2, Filomeno Rodriguês Pereira Cárceres númeru sorteiu 3, Januário Cárceres númeru sorteiu 4, no Sérgio Raimundo Rodriguês Pereira ho númeru sorteiu 5.

Lee Mós: Pessoál STAE Taka Portaun Iha Tuku 15:00, Eleitór Barak La Vota

Prosesu eleisaun ne’ebé la’o hahú kedan iha tuku 09:00 dadeer to’o 15:00 lorokraik otl, no iha rezultadu sira kontájen votu nian hosi Ofisiál Eleitorál sira Sekretáriadu Tékniku bá Administrasaun Eleitorál (STAE), fahe bá kandidatu sira mak hanesan;

Iha Sentru Votasaun Sede Aldeia Labubu, Angelina Correia Soares ho votu válidu totál 24, Cipriano Correia Ximenes 46, Filomeno Cárceres 177, Januário Cárceres 12, Sergio Raimundo Rodriguês Pereira ho votu totál 3.

Iha Sentru Votasaun Sede Aldeia Hatu-Konan, Angelina Correia Soares ho votu válidu totál 1, Cipriano Correia Ximenes 10, Filomeno Cárceres 158, Januário Cárceres 4, Sergio Raimundo Rodriguês Pereira ho votu totál 12.

Sentru Votasaun Sede Aldeia Readodok, Angelina Correia Soares ho votu válidu totál 3, Cipriano Correia Ximenes 24, Filomeno Cárceres 98, Januário Cárceres 30, Sergio Raimundo Rodriguês Pereira ho votu totál 31.

Iha Sentru Votasaun Sede Aldeia Tahagamu, Angelina Correia Soares ho votu válidu totál 4, Cipriano Correia Ximenes 19, Filomeno Cárceres 163, Januário Cárceres 62, Sergio Raimundo Rodriguês Pereira ho votu totál 12.

Sentru Votasaun Sede Aldeia Nakaleu, Angelina Correia Soares ho votu válidu totál 68, Cipriano Correia Ximenes 109, Filomeno Cárceres 133, Januário Cárceres 8, Sergio Raimundo Rodriguês Pereira ho votu totál 3.

Totál votu válidu hosi sentru votasaun sede aldeia lima nian, kandidatu númeru 1 ho votu 100, númeru sorteiu 2 ho totál 208, kandidatu númeru sorteiu 3 ho totál 724, kandidatu númeru sorteiu 4 ho totál 116, no kandidatu ho númeru sorteiu 5, iha totál 61.

Haree bá rezultadu ne’e, konklui katak, kandidatu númeru sorteiu 3 hetan votu válidu ho totál 724.

Kompara ho kandidatu númeru sorteiu na’in-haat seluk ho votu totál 587.

Hosi rezultadu ne’e hatudu katak, kandidatu númeru sorteiu 3 mak manán maiória ho 59,9% ka 60%.

Rezultadu ida ne’e, demonstra vitória boot bá atuál Xefe Suku Lakumesak, Filomeno Cárceres, hodi re-eleitu, atu nune’e bele lidera komunidade Suku Lakumesak nia oan tomak, iha periudu mandatu 2023 to’o 2030.

Xefe Suku re-eleitu, Filomeno Cárceres hato’o nia agradesementu wain bá komunidade Lakumesak oan tomak, tanba tula ona konfiansa dala-rua bá nia, atu lidera tán suku ne’e iha tinan-hitu mai oin.

Tuir nian, eleisaun ne’e la’ós atu hatudu bá malu kona-bá vitória no derrota, maibé, oinsá mak responsábilidade lideransa komunitáriu ida atu bá serví komunidade tomak iha Suku Lakumesak, no liu-liu mós populasaun tomak, Postu Administrativu Lacló nian.

“Aproveita biban ida ne’e, hakarak agradese espesial bá komunidade Lakumesak oan tomak, tanba kontinua fó fiar mai ha’u, atu la’o hamutuk ho sira iha tinan-hitu bá oin. Suku ida atu la’o bá oin, ita presiza partisipasaun sidadaun sira hotu nian, servisu en-koordenasaun bá malu nafatin,” Filomeno Cárceres, hateten bá Hatutan.com, hafoin akompaña prienximentu rezultadu finál bá Akta apuramentu eleisaun órgaun suku, iha Sede Suku Lakumesak, Postu Administrativu Lacló, Munisipiu Manatuto, Domingu (29/10/2023).

“Ha’u agradese mós kolega kandidatu na’in-haat seluk, ne’ebé ami foin kompete hamutuk iha eleisaun tinan ida ne’e. Ho kolega sira na’in-haat ninian prezensa iha eleisaun ida ne’e, atu hamoris liután demokrasia iha ita nia rain, liu-liu tanba komesa kedas hosi baze,” nia agradese.

Filomeno mós agradese liután bá komunidade Lakumesak oan tomak, tanba ho sira nian pasiénsia tomak, partisipa ona iha eleisaun bá órgaun suku ida ne’ebé la’o ho trankuiliu no demokrátiku tebes. Ida ne’e hanesan aktu ida pozitivu tebtebes hodi haburas bebeik sistema demokrásia iha País doben Timor-Leste.

Reprezentante kandidatu na’in-tolu seluk ne’ebé votu válidu la konsege hakat barreira iha ámbitu eleisaun bá órgaun suku tinan ne’e nian, Sergio Raimundo Rodriguês Pereira, sente kontente hodi simu rezultadu ne’ebé komunidade sira fó ona bá nia. Tanba demokrásia nia dalan mak nune’e duni, povu mak hili, no povu rasik mak determina.

Iha prosesu tomak eleisaun bá orgaun suku nian ne’ebé hala’o iha Suku Lakumesak ne’e, hetan seguransa másimu hosi Membru seguransa Polisia Nasional Timor-Leste (PNTL), ne’ebé komandu destaka ona iha kada sentru  votasaun sira hotu.

Totál eleitór Suku Lakumesak 1.657, sira ne’ebé tuir vota 1.282. Totál Votu Nulu 51, Votu Branku 22.

Jornalista: Rogério Pereira Cárceres