Hatutan, (12 Fevereiru 2024), Manatuto – Vise-Primeiru Ministru no Ministru Koordenadór Asuntu Sosiál ho Ministru Dezenvolvimentu Rural no Abitasaun Komunitáriu, Mariano Assanami Sabino, kompromete harii uma dignu unidade 50 bá komunidade Suku Aubeon, Postu Administrativu Barieque, Munisípiu Manatuto.

Vise-Primeiru Ministru no Ministru Koordenadór Asuntu Sosiál ho Ministru Dezenvolvimentu Rural no Abitasaun Komunitáriu, Mariano Assanami Sabino halo diálogu ho komunidade Suku Aubeon, Postu Administrativu Barieque, Munisípiu Manatuto, Segunda (12/02/2024). Foto/Lazaro Pereira Quefy

Mariano Assanami Sabino hateten konstrusaun bá uma dignu hamutuk 50 ne’e parte ida hosi polítika no programa bá Dezenvolvimentu Rurál no Abitasaun Komunitáriu ho orsamentu bá kada uma $40,000.00.

“Programa ho uma hanesan sei halo mós iha Tunubibi, Munisípiu Bobonaro, ho uma dignu unidade 40.” Vise-Primeiru Ministru no  no Ministru Koordenadór Asuntu Sosiál ho Ministru Dezenvolvimentu Rural no Abitasaun Komunitáriu, Mariano Assanami Sabino hato’o lia hirak ne’e  iha ámbitu diálogu ho komunidade  Suku Aubeon, Postu Administrativu Barique, Munsípiu Manatuto, Segunda (12/02/2024).

“Ita iha ona dezenvolvimentu lubuk ida mai kraik hanesan edukasaun, saúde, bee-moos no estrada rurál. Iha Abitasaun ne’ebé mak antigamente halo ne’e hotu bá agrikultura, ne’ebe ita hanoin katak dezenvolvimentu rurál ninia objetivu prinsipál mak  oinsá atu mobiliza, integra mak povu tenke moris di’ak ho sivilizadu no demokrátiku,” Mariano Assanami Sabino hateten.

Assanami Sabino hein katak ho esforsu xefe suku, lia na’in liuliu ba Prezidente Autoridade Munisípiu sira tenke fó apoiu malu bá buat hotu-hotu, tanba dezenvolvimentu rural ne’e la’ós foin mak hahú maibé buat barak la’o tiha ona no Ministériu mosu atu reorganiza, integra no apoiu bá ekonomia bá ninia abut metin liu tan.

Iha fatin hanesan Xefe Suku Aubeon, Domingos Gonzaga hateten, uma dignu 50 se halo iha Suku Aubeon ho kompozisaun Aldeia rua hanesan Wekadi ho Buburlaran ho nia total abitante 1.300 no uma-kain 345.

“Antes atu too diálogu ohin iha fulan-tolu bá kotuk ita halo ona survey ruma haree mós dadus bá komunidade sira no haree saida mak ita tenke halo hamutuk ho ekipa tékniku sira hosi Ministériu nian,” Domingos Gonzaga hateten.

Jornalista Estajiáriu : Lazaro Pereira Quefi