Hatutan.com (06 Novembru 2023) Díli—Komisaun Anti-Korrupsaun (CAC, sigla portugés) submete ona kazu korrupsaun 16 bá Ministériu Públiku (MP), inklui kazu Set-top Box Rádiu Televizaun Timor-Leste, Empreza Publika  (RTTL,E.P) ne’ebé deskonfia envolve arguido eis Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo.

Lee Mós: Deskonfia, PGR Alfonso Lopez “Budu” Kazu Set-top Box RTTL,E.P

Diretór Jerál Investigasaun CAC, José de Araújo Verdial . Foto/Elio dos Santos da Costa

Diretór Jerál Investigasaun CAC, José de Araújo Verdial, informa  CAC halo ona auto partisipasaun hamutuk 16 bá Ministériu Públiku ( MP), nune’e mós kazu barak sei pendente tanba presiza desizaun hosi Komisáriu CAC.

“Ami la halo prosesu, ami halo averiguasaun no hosi averigausaun ne’e  CAC haruka ona auto partisipasaun hamutuk 16 bá iha MP. Ami la halo prosesu, ami halo averiguasaun kuandu iha indisius forte ba korrupsaun,” José de Araújo Verdial, informa hodi responde Hatutan.com  iha Ministeriu Finansa (MF), Díli, Segunda (06/11/2023).

Nia dehan, hafoin iha fulan-Abríl maske CAC laiha ona komisáriu ida atu lidera, maibe CAC nafatin halao nia knar  hanesan  simu  keixa nafatin, halo aviriguasaun  nafatin no haruka ona auto partisipasaun  bá MP.

“Servisu ne’ebe ami halo mak hanesan kontinua rekolla dokumentu, analiza dokumentu sira-ne’e, halo mapamentu  bá prova sira, no halo mapamentu bá sasin sira ida ne’ebe mk bele sai sasin,” nia tenik.

Liga ho kazu Set-top Box RTTL, E.P  ne’ebe to’o agora pendente iha MP,  diretór investigasaun CAC  ne’e haktuir  CAC nia kompetensia atu halo deit investigasaun no hato’o relatóriu, no sei la halo intervensaun bainhira kazu ne’e to’o ona iha MP.

Bazeia bá prova investigasaun bá kazu projetu instalasaun  Set-Top box Rádiu Televizaun Timor Leste, Empreza Públika (RTTL,E.P), Komisaun Anti-Korrupsaun (CAC, sigla portugés) konstitui ona eis Ministru Asuntu Parlamentár no Komunikasaun Sosiál (MAPKOMS), Francisco  Martins da Costa Pereira Jerónimo, hosi suspeitu bá arguidu.

CAC konstitui eis-Ministru Francisco  Martins da Costa Pereira Jerónimo  nu’udár arguidu tuir baze legal ka Kódigu Prosesu Penál (KPP) artigu Artigu 91 (Notifikasaun), alínea 3  ne’ebé hateten, funsionáriu judisiál, ajente polisiál  ka autoridade seluk ne’ebé lei fó kompeténsia maka halo notifikasaun tuir despaxu ka ho orden ofisioza hosi sekretaria judisiál. 

Iha kazu projetu instalasaun Set-top Box RTTL,E.P ne’e, CAC mós konstitui na’in bá sósiu empreza DILI ETERNAL INNOVATION INFORMATION, Lda nu’udár arguida.

Molok ne’e, iha loron 12 fulan-Outubru 2022, CAC  liuhosi ekipa Medida Prevensaun no Kombate Korrupsaun, halo buska no apreensaun inklui tau alzema (borgol) bá arguida MCS nu’udár na’in ka sósiu empreza DILI ETERNAL INNOVATION INFORMATION, Lda, tanba deskonfia envolve iha projetu instalasaun Set-top Box RTTL,E.P.

Iha loron tuir mai, 17 fulan-Outubru 2022, Comissão Anti Corrupção (CAC) liuhosi ekipa Medida Prevensaun no Kombate Korrupsaun, halo mós buska no apreensaun bá dokumentu iha gabinete eis-Ministru Assuntu Parlamentár no Komunikasaun Sosiál (MAPKOMS), Francisco Martins Pereira da Costa Jerónimo, hodi hakle’an investigasaun bá kazu projetu instalasaun Set-top Box RTTL,E.P.

Ekipa CAC ne’ebé akompaña hosi Polísia Servisu Investigasaun Kriminál Nasionál halo mós identifikasaun bá eis-Ministru Francisco Jerónimo, hodi halo apreensaun bá dokumentu box rua, tempu ne’ebá, inklui komputadór ida ho marka Imec.

Hafoin halo aprensaun iha gabinete MAPKOMS, CAC tula mós eis-Ministru MAPKOMS ne’e bá iha nia servisu fatin ka gabinete Federasaun Futeból Timor Leste (FFTL) hodi halo mós apreensaun bá dokumentu importante balun.

Remata hosi FFTL, ekipa CAC kontinua ho eis-Ministru MAPKOMS bá iha nia rezidénsia iha Liquiça hodi kontinua halo apreensaun bá dokumentu sira ne’ebé iha relasaun ho kazu instalasaun Set-Top Box RTTL,E.P.

Tuir informasaun hosi CAC katak kazu projetu instalasaun Set-top Box RTTL,E.P ne’e lori prejuízu bá Estadu ho montante orsamentu $7,680.00.

Lee Mós: AJAR Konsidera MP ho PGR Haburas Impunidade

Jornalista : Leopoldina de Carvalho