Hatutan.com (09 Novembru 2023), Díli—Ministériu Administrasaun Estatál (MAE) liu hosi Sekretariadu Tékniku Administrasaun Eleitorál (STAE) kontinua organiza eleisaun órgaun suku segunda ronde ho mekanizmu manuál no garante katak sei la mosu failansu tékniku inklui abitante sei la forma naruk.

Diretór Jerál STAE, Acilino Manuel Branco distribui bulletin votus bá eleisaun órgaun suku Segunda volta iha Grafika Nasionál, Lekintai, Kinta (09/11/2023). Foto: Elio dos Santos da Costa.

Diretór Jerál STAE, Acilino Manuel Branco hateten, daudaun ne’e entidade eleitorál preparadu bá segunda volta tuir Lei númeru 9/2023 katak, votasaun sei hahú fila-fali iha loron 13 Novembru, tanba ne’e ohin loron 09 Novembru STAE hahú distribui materiál bulletin de vota bá munisipiu sira.

Lee Mós: Eleitór “Sofre” ho Mekanizmu Eleisaun Manuál, STAE Orgullu no CNE Rekomenda Hadi’a

Materiál sira ne’e lori bá atu kompleta de’it materiál hirak ne’ebé utiliza ona iha primeira volta nune’e haruka de’it bulletin no kompleta de’it númeru balun.

Eleisaun segunda volta ne’e sei akontese de’it bá xefe suku sira, tanba iha loron 28 Outubru 2023 kuaze membru konsellu suku eleitu hotu ona, liu-liu delegadu no delegada no xefe aldeia sira.

“Tanbe ne’e prossesu ne’ebé la’o, tantu primeira volta ho segunda volta ne’e uza nafatin baze legál sira ne’ebé mak iha. Iha segunuda volta ne’e sei la akontese tán hanesan saída mak mosu ona iha primeira volta tanba agora ita hili de’it mak xefe suku. Entau ida-ne’e prossesu sei lalais liu, nune’e ita mantein ho modelu prossesu hakerek naran bá eleisaun, maibé ita garante ida ne’e sei lalais tanba ita hakerek hotu simu de’it vuletin ida bá vota ona,” Acilino Manuel Branco hateten hafoin distribui bulletin de votus iha  Grafika Nasionál, Lekintai, Kinta (09/11/2023).

Distribuisaun bulletin de votus ho totál 7.200, fahe tuir kada munisipiu ho ninia regra maka tuir númeru eleitór kada suku no aldeia hirak ne’ebé mak sei avansa bá segunda volta, aumenta tán pursentu sanulu hodi antesipa bainhira iha prossesu votasaun iha segunda volta.

Diretór Jerál STAE, Acilino Manuel Branco.

Buletin sira ne’e sei distribui bá nível aldeia iha loron 12 nune’e iha loran 13 bele tuir votasaun, iha loron 14 halo apuramentu bá rezultadu iha kada suku, iha loron 24 Novembru primeiru enkontru iha suku  hamutuk 271, hodi hili sira nia lia-na’in reprezenta feto no mane, hafoin loron 27 Novembru aktus tomak kona-bá eleisaun suku to’o ona iha nia rohan hodi hakat bá prosesu sira ne’ebé mak kabe ba kompeténsia Governu liu hosi Ministériu Adminsitrasaun Estatal (MAE).

Kona-bá failansu sira ne’ebé mak mosu iha primeira volta, Diretór Jerál ne’e relata, públiku partisipa no akompaña situasaun saída mak akontese iha loron 28 Outubru 2023, tanba ne’e mak nia husu atu autoridade munisípiu no STAE munispiu hamutuk ho CNE kada munisipiu haree ho rigór liu tán iha preparasaun sira ka kestaun sira hotu ne’ebé liga ho teknikamente, nune’e failansu tékniku sira ruma labele akontese iha segunda volta ne’e.

Nia esplika, regras bá iha prossesu eleisaun ninian ne’e definidu iha Lei númeru 9/2016 no Dekretu Lei númeru 14/2016, Dekretu Lei númeru 9/2023 ho diploma Ministeriál 39/2023, tanba ne’e aktus hotu-hotu ne’ebé mak funsiona iha kada meza eleitorál ne’e bazeia bá saída mak hateten ona iha diploma legál sira.

Jornalista: Gloria Maia