Hatutan.com, (09 Outubru 2023), Díli– Programa Monitorizasaun bá Sistema Judisiáriu (JSMP, sigla portugés) konsidera katak servisu IX Governu nian durante loron 120 atinje ona buat balun, mezmu ho dezafiu oioin.
Lee Mós: Atinjimentu IX Governu Durante Loron 120
Diretora Ezekutivu JSMP, Ana Paula Marçal. Foto/Lazaro Pereira Quefi
JSMP nia monitorizasaun iha setor justisa nian iha mandatu Governu ida-ne’e nian iha loron 120 rezolve ona preokupasaun públiku nian, hanesan kaderneta pasaporte maske foin bele atende de’it nesesidade urjénsia hanesan bá ema moras atu halo tratamentu iha rai-li’ur, bá estudante sira no nesesidade urjénsia sira seluk tan.
“Ami haree sira nia servisu iha buat balu ne’ebé sira promesa konsege rezolve ona, hanesan pasaporte maske iha dezafiu ruma ne’ebé sira hasoru dalaruma la’ós hosi parte ita nian, maibé parte sira ne’ebé mak prodús kaderneta pasaporte no ita haree katak pasa porte sira komesa mai tuir nia etapa,” Diretora Ezekutivu JSMP, Ana Paula Marçal bá Hatutan.com iha iha nia servisu fatin, Díli, Kinta (09/11/2023).
“Atividade hotu ita haree la’o hela, dalaruma iha impedimentu, dezafiu no progresu la’o hela, tan ne’e husu nafatin ba Governu tenke kontínua halo buat ida di’ak liu bá setor justisa liuliu bá parte ida ne’ebé mak atu hadi’a tenke kontínua,” Ana Paula Marçal haktuir.
JSMP husu bainhira atu setór justisa ne’e funsiona ho di’ak tenke investe formasaun autór judisiáriu sira, atu nune’e, bele hasae koñesimentu no pensamentu kualidade servisu.
JSMP mós fó hanoin katak atu reforma bá setór justisa tenke hadi’a ida ne’ebé mak prioridade liu no ida ne’ebé mak la fó benefísiu bá rai Timor-Leste.
Nia hateten, papél JSMP nian hori uluk dezde harii to’o agora JSMP kontribui bá justisa nian liu hosi fó paresér, hanoin no rekomendasaun sira bá iha setór sira liga ho justisa, atu nune’e, bele hadi’a sira-nia servisu di’ak liu tan.
JSMP nia hakarak ne’e justisa tenke metin, kredivel, transparente tanba ne’e mak JSMP nia kontribui durante ne’e atu oinsá autór tribunál sira hala’o sira-nia servisu atu fó justisa hanesan bá ema hotu tuir sira-nia papél.
Jornalista Estajiáriu: Lazaro Pereira Quefi