Hatutan.com, (09 Novembru 2023), Díli—Aliansa Nasionál Kontrolu Tabaku Timor-Leste (ANCT-TL siglá Portugés) rejista númeru fumadór tabaku iha Timor Leste iha 62%, hosi persentajen ne’e labarik ho minoridade hahú hosi tinan 17 mai kraik okupa númeru aas liu ho 30,9% fuma tabaku kompara ho mane adultu no feto.

Iha loron 24 Jullu 2023, ekipa konjunta PNTL kaptura sidadun na’in rua tanba halo transaksaun sigura Surya 12 hosi karreta Prado bá karreta seluk ho total SLOF 509 (Karton 6) iha Suku Manleuana, Postu Administrativu Dom-Aleixo Munisípiu Díli. Foto: PNTL.

“Ita nia prevalénsia uza tabaku ne’e nafatin aas. Agora prevalénsia ne’e 39,9%, kuaze mane de’it fuma 62% no ki’ik liu feto. Aleinde ne’e la’ós bá ema adultu de’it maibé mós foinsa’e sira hosi idade 13 to’o 15 mós fuma aas kuaze 30,9%,” Diretór Ezekutivu ANCT-TL, Sancho Fernandes hateten iha PN, hafoin halo audiénsia ho Komisaun F, Kuarta (08/11/23).

Lee Mós:Joven Na’in-rua Hatama Sigaru Ilegál Hosi Atambua

ANCT-TL ejize katak, tuir loloos TL tenke iha ona Lei atu regula ema labele fa’an tabaku bá labarik sira tanba bele estraga futuru labarik sira nian.

“Ita nia lei ne’e loloos ne’e tau ona atu labele fa’an sigaru bá labarik sira ne’ebé ho idade 17 mai kraik. Dezafiu ne’e maka implementasaun ne’e sei fraku tebe-tebes. Tanba ne’e presiza hadi’a tanba durante ne’e laiha intervensaun, enkuantu labarik sira bá hola tabaku ho livre,” nia hateten.

Parte ANCT-TL iha evidénsia ne’ebé hatudu ona katak, hatun taxa tabaku mós laiha solusaun atu kombate ema fuma tabaku iha Timor-Leste.

“Ami reforsa liután katak lalika hatuun bá $50. Hatuun to’o zero tiha de’it mós labele kombate tabaku tanba problema rua ne’e problema ne’ebé la hanesan,” Sancho Fernandes preokupa. 

ANCT-TL rekomenda bá Governu atu estabelese mekanizmu kontrolu tabaku no planu estratejia hosi Ministériu balun ne’ebé iha papél servisu bá kontrolu tabaku nune’e bele halo redusaun bá fumadór tabaku iha rai ne’e.

Jornalista Estajiária: Zita Menezes