Hatutan.com, (10 Novembru 2023), Díli—Filipina iha kompromisu atu kontinua hametin kooperasaun ho Timor-Leste (TL) iha área Edukasaun liu-liu reforsa ensinu superiór, saúde no seguransa sosiál hodi bele reforsa liu tán relasaun bilaterál ne’ebé pais rua estabelese antes ona.

Prezidente Repúblika (PR), José Ramos-Horta vizita Filipina no hasoru-malu ho Prezidente Repúblika Filipina, Ferdinand Bongbong Romaualdez, Sesta (10/11/2023). Foto: PR

Prezidente Repúblika (PR), José Ramos-Horta nia vizita bá nasaun Filipina tanba hetan konvite hosi Prezidente Repúblika Filipina, Ferdinand Bongbong Romaualdez Marcos Jr.

Lee Mós: Ramos-Horta Fó Pose bá Loro-Horta ho Marciano da Silva Nu’udár Embaixadór bá Repúblika Populár Xina no Filipina

“Iha vizita estadu ne’e, Prezidente Repúblika José Ramos-Horta apresia bá papél signifikativu ne’ebé forsa manutensaun pás Filipina nian hala’o iha Timor-Leste no hato’o agradesimentu profunda no apresiasaun ba apoiu no kontribuisaun husi feto no mane sira ne’ebé ho aten-brani durante períodu krítiku ne’ebé ajuda restaura pás no estabilidade hafoin referendum iha 1999,” Hatutan.com sita komunikadu, Sesta (10/11/2023).

Iha sorumutu ne’e mós Xefe Estadu país rua ne’e avalia relasaun bilaterál iha dékada rua entre Filipina no Timor-Leste, amizade ida-ne’ebé hahú iha tinan 2002 bainhira asina ona Komunikadu Konjunta kona-bá Estabelesimentu Relasaun Diplomátika. Nasaun rua ne’e fahe hanoin katak sira atua ho respeitu ba malu no fahe valór komún demokrasia no direitus umanus no katak sei iha poténsia atu hakle’an liután kooperasaun entre nasaun rua ne’e.

Lider rua ne’e reafirma sira-nia kompromisu atu promove vizita no interkámbiu iha nivel hotu-hotu, ho objetivu atu hametin liután relasaun liuhosi enkoraja ofisiál sira atu uza mekanizmu diálogu polítika bilaterál ne’ebé eziste.

Lider rua ne’e mós fó instrusaun ba departamentu governu relevante sira atu hahú haree fila fali no konvoka mekanizmu konsultasaun polítika tuir mai iha Timor-Leste hodi diskute kestaun oioin no dalan kooperasaun entre nasaun rua ne’e.

“Lider na’in rua ne’e konkorda atu fó prioridade ba kooperasaun iha área ensinu superiór, saúde no Seguransa Sosiál no seluk tan atu hadi’ak moris sidadaun sira. Lider na’in rua ne’e dirije sira-nia ajénsia sira ne’ebé preokupa atu renova Memorandu Akordu Kooperasaun iha Ensinu Superiór no atu remata iha inísiu, negosiasaun sira kona-ba Memorandu Entendimentu ida kona-ba Kooperasaun Saúde nian, nune’e mós kona-ba Akordu Seguransa Sosiál no Servisu Aerea (ASA),” Hatutan.com sita Komunikadu.

Filipina sei reforsa fila-fali sira nia apoiu ba tempu naruk no liu-liu admisaun Timor-Leste nian nu’udar membru direitu tomak ba ASEAN nian. Timor-Leste hato’o ninia agradesimentu no atualiza informasaun kona-ba ninia esforsu no progresu sira iha implementasaun Roteiru ba Membru tomak Timor-Leste nian iha ASEAN.

Iha área Kooperasaun Téknika, parte rua diskute planu atu hatán ba dezafiu sosio-ekonómiku sira iha Timor-Leste.

Filipina manifesta ninia disponibilidade atu fornese projetu kapasitasaun ba Timor-Leste, hodi konsidera esperiénsia Filipina nian no nesesidade Timor-Leste nian, hanesan parte ida husi kontribuisaun Filipina nian hodi suporta implementasaun inísiu adezaun Timor-Leste nian ba ASEAN.

Lider na’in rua ne’e dirije sira-nia ajénsia relevante sira atu diskute detallu liu tan hodi asegura implementasaun projetu sira-ne’e ho susesu.

Prezidente Repúblika José Ramos-Horta mós reafirma Timor-Leste ninia apoiu bá kandidatura Filipina nian atu sai nu’udár membru naun permanente iha Konsellu Seguransa ONU nian ba mandatu 2027-2028.

Jornalista: Vito Salvadór