Hatutan.com, (10 Novembru 2023), Díli- Prezidente Federasaun Futeból Timor-Leste (FFTL), Francisco Martins da Costa Pereira Jerónimo,  ofisiálmente deklara nia rezignasaun iha kongresu Estraordináriu 2023 ho razaun hakarak kontribui bá futeból iha Timor-Leste  la’o bá oin.

Lee Mós: Ezekutivu sira FFTL Rezigna Nab-naban

Francisco Jerónimo deklara ofisial nia rezignasuna hosi prezidente FFTL, Sesta (10/11/2023). Foto/Elio dos Santos da Costa

Prezidente FFTL, Francisco Martins da Costa Pereira Jerónimo iha diskursu kongresu estraordináriu FFTL 2023 hateten bá asosiasaun futeból no membru asosiasaun sira hotu, deside 2018 hotu-hotu hamutuk haree futeból iha Timor-Leste hodi presiza hadi’a ne’e mak  la’o too mai iha loron ohin.

Aproveita oportunidade ne’e, Francisco Jerónimo, eis Ministru asuntu Parlamentár no Komunikasaun Sosiál (MAPKOMS) ne’e agradese áa Prezidente Asosiasaun sira, Vise-Prezidente no Sekretáriu Jerál asosiasaun sira hotu, husu obrigadu barak bá kooperasaun no hanoin di’ak ne’ebé fó durante mandatu hodi lori orgullu bá futeból iha Timor-Leste.

Nia afirma, saida mak asosiasaun sira-nia hakarak bá nia laiha problema, durante hamutuk iha tinan barak nia laran iha situasaun di’ak no aat nafatin hamutuk no ohin tenke iha desizaun bá futeból iha Timor-Leste.

“Ohin ha’u tenke hateten ba ita-boot sira katak, ita-boot sira nia hakarak ha’u tenke kumpre. Tamba ne’e, ha’u hanesan ema, ha’u husu deskulpa no perdaun ba ita-boot sira hotu, karik tamba iha ha’u nia servisu tamba lad’iak halo ita-boot sira hirus no halo ita oin buis ba malu. Ohin dunik, ha’u deklara katak ha’u Francisco Martins da Costa Pereira Jerónimo hanesan Prezidente FFTL ofisiálmente rezigna hosi ha’u nia kargu no integra fila fali ba asosiasaun sira hodi hili ida ne’ebé ita-boot sira dehan di’ak liu,” Francisco Martins da Costa Pereira Jerónimo hateten iha nia diskursu despedida iha kongresu Estraordináriu FFTL ne’ebé hala’o iha otél Timor, Sesta (10/11/2023).

Hanesan ema ne’ebé iha koñesimentu bá futeból no servisu mós ba dezenvolvimentu futeból iha Timor-Leste, Francisco Jerónimo  prontu nafatin atu apoiu no fó kontribuisaun bá se de’it mak sei mai lidera FFTL.

Francisco Jerónimo la’o sai hosi kongresu estraordináriu FFTL, 10 Novembru 2023. Foto/Elio dos Santos da Costa

“Ohin termina ona mandatu iha federasaun, maibé nafatin iha kompromisu  no vontade nakonu ho espíritu paixaun bá futeból atu kontribui. Maibé, ha’u nian mak ne’e, futeból iha Timor-Leste tenke la’o ba oin,”  Francisco Jerónimo afirma.

Ho rejignasaun ne’ebé iha, vise Prezidente FFTL Xefe Estadu Maiór Jenerál F-FDTL Tenente-Jenerál Domingos Raul “Falur Rate Laek” mak asume responsabilidade nu’udár Prezidente FFTL interinu hodi hein too X Kongresu Ordináriu FFTL ne’ebé sei monu iha loron 10 fulan-Janeiru 2024.

Jornalista: Vito Salvadór