Hatutan.com, (13 Novembru 2023), Díli- Federasaun Futeból Timor-Leste (FFTL), hahú loke rejistrasaun bá kandidatu Prezidente Ezekutivu no Komité Ezekutivu (Exco) bá períodu 2022-2026.

Lee Mós: Francisco Jerónimo Ofisiálmente Rezigna hosi Prezidente FFTL

Logotipu FFTL

FFTL loke rejistrasaun ne’e bazeia bá rezignasaun ne’ebé Prezidente FFTL sestante, Francisco Martins da Costa Pereira Jerónimo halo iha kongresu Estraordináriu FFTL nian ne’ebé hala’o iha Otél Timor, Sesta (10/11/2023).

Bá membru Komité Ezekutivu FFTL mós loke rejistrasaun bá kandidatu ida hodi prienxe fali Komité Ezekutivu sestante Prezidente Asosiasaun Futeból Suai (AFS), Augusto Henriques ne’ebé rezigna hosi nia kargu hanesan Membru Komité Ezekutivu FFTL.

Informasaun ne’ebé Hatuta.com asesu husi pájina ofisiál FFTL, Segunda (13/11/2023), relata FFTL hahú loke ba públiku rejistrasaun bá kandidatu prezidente ezekutivu no Komité Exco ida bá períodu  2022-2026.

FFTL sei simu rejistrasaun no submisaun dokumentu hosi kandidatu sira hahú iha loron 12 to’o loron 27 fulan-Novembru, tinan ne’e, iha oras servisu, signifika hahú husi tuku 09:00-17:30 Otl.

Rekizitu jerál bá kandidatu mak:

1. Kandidatu tenkesér disponivel atu asina karta deklarasaun hodi tuir prosedimentu verifikasaun no integridade ba akordu, kódigu no estatutu eleitorál FFTL no Prosedimentu sosializasaun FFTL ne’ebé determina ona husi Komite Ezekutivu Eleitorál ;
2. Bá membru komisaun ezekutivu labele ho idade menus hosi tinan 25;
3. Tenkesér praktikamente kontribui ona iha Futeból pelo menus tinan 4 antes eleitu;
4. Nunka hetan deklarasaun kulpadu bá infrasaun penál ruma;
5. Tenkesér hela iha territóriu Timor-Leste;
6. Kandidatu sei hetan verifikasaun integridade husi Unidade Auditoria no Kumprimentu, antes selesiona ka eleita;
7. Kandidatu tenkesér ativu iha Futeból Timor-Leste, konforme tuir karta apoiu ka rekomendasaun hosi membru FFTL ne’ebé asina no akorda ona hosi autoridade kompetente;
8. Kandidatu huoi membru Komite ezekutivu tenke propoin ka kandidata pelumenus husi membru Asosiasaun FFTL
9. Bá Membru Asosiasaun FFTL bele nomeia kandidatu ida bá kargu ka pozisaun ida no ba kandidatu seluk bá kargu ka pozisaun ne’ebé diferente;
10. Kandidatu tenkesér iha koñesimentu iha governasaun no lei futeból sira. Nomós iha experiénsia iha kargu estratéjiku ka bele toma desizaun iha setor governu no privadu;
11. Kandidatu tenkesér komprende, konkorda no iha kbiit ka matenek atu bele dezenvolve programa FFTL ho susesu tuir programa FIFA, AFC no AFF.

Dokumentu sira ne’ebé kandidatu sira presiza kompleta mak:

1. Foto tahan 4 ho fundu kor azúl ho medida pasaporte ka 4×6;
2. Kurikulum Vitae (CV) ne’ebé iha relasaun ho atividade futeból;
3. Sertifikadu relevante hanesan membru FFTL ne’ebé alista kada experiénsia;
4. Foto kopia kolorido kartaun indentidade Valido (BI);
5. Sertidaun rejistu kriminál Válidu husi Ministériu Justisa;

Jornalista: Vito Salvadór