Hatutan.com, (12 Novembru 2023), Díli—Reflesaun ne’ebé Pároku Parókia Santu António Motael, Padre Guilhermino da Silva  foti iha omilía missa Agradesimentu komemorasaun Masakre Santa Cruz bá dala 32 maka, joven sira iha tempu ohin loron nian ne’ebé hakarak atu hatutan mehi no idealizmu juventude loriku as’wa’in nian ne’e maka sunu-malu ho dezenvolvimentu la’ós rai ódiu no vingansa bá malu.

Pároku Parókia Santu Antóno Motael, Padre Guilhermino da Silva prezide missa agradesimentu bá komemorasaun Masakre Santa Cruz bá dala-32 ne’ebé hala’o iha Igreja Motael, Díli (12/11/2023). Foto: Elio dos Santos da Costa.

Padre selebrante ne’e husu Timoroan hotu atu kaer metin prinsípiu 12 Novembru hodi kontinua moris iha esperansa ho matenek atu kontribui bá dezenvolvimentu nasionál no lori povu bá moris prósperu.

Lee Mós: 12 Novembru, Testemuña Espíritu Lutadór Foin-sa’e Timoroan

“Komemorasaun 12 Novembru tinan-ne’e halo bá dala-XXXII no Timor-Leste iha ona 2023, maibé bainhira povu ne’ebé hanaran-an sarani mak sei kontinua moris iha tradisionál nian hanesan oho-malu, tuda-malu no sunu-uma, ne’e ita la hatutan mehi asw’ain sira nian. Iha mundu ohin loron ema diskute malu, sunu malu ho dezenvolvimentu atu garante moris hakmatek,” Pe.Guilhermino da Silva hateten iha nia omilia iha Igreja Santu António Motael, Domingu (12/11/2023).

Hanesan sira uluk kontribui sira nia moris ba rai ida-ne’e atu hetan independénsia, ohin loron tenke hatene katak rai ida-ne’e merese atu tenke fó an tomak hodi dezenvolve ho matenek.

Selebrasaun loron ne’e atu fó hanoin fali bá hotu-hotu,  juventude loriku as’wa’in sira nia desizaun ida ne’ebé halo ho matenek, brani no domin ne’ebé ohin loron fó valór bo’ot bá rai Timor.

Iha realidade ohin loron, buat ne’ebé akontese iha Timor-Leste oinseluk, ema hetok matenek ba bebeik, ema hetok hetan fízika no isin ne’ebé forte maibé ema nunka hanoin sira nia objetivu bá rai Timor. Ema nunka valoriza ema sira ne’ebé fakar sira nia ran bá rai Timor, atu rai ida-ne’e bele hamrik mós hanesan nasaun sira seluk iha mundu ne’e.

Laiha Selebrasaun Eukaristia Espesiál

Pároku Parokia Igreja Santu António Motael Pe. Guilhermino da Silva Preokupa ho komisaun organizadora bá selebrasaun loron 12 Novembru, Masacre Santa Cruz tanba laiha selebrasaun Eukaristia espesiál hodi komemora no valoriza eroi no mártir da pátria sira hotu ne’ebé mate no halo sakrifisiu bá Timor-Leste nia independénsia.

Ohin 12 Novembru maibé monu iha loron Domingu no no liturgia sira labele troka ho selebrasaun loron sira seluk.

“Pelumenus tinan lima ona ha’u iha ne’e, kona-bá selebrasaun 12 Novembru, há’u sempre dehan mais ou menus ita tenke komunika ba malu antes, tenke iha planu antes atu nune’e monu ba loron Domingu nune’e ita konbina selebra antes, atu selebra loron ne’e tenke espesiál duni. Ba sira ne’ebé iha komisaun, selebrasaun loron 12 Novembru ne’e tenke espesiál duni no iha nia loron rasik. Katak, se loron 12 Novembru monu iha Domingu hanesan ohin, ita buka ona atu antes loron ida ne’e atu selebra ita nia loron espesiál ida ne’e,” Pe. Guilhermino da Silva hateten.

Hafoin selebrasaun Eukaristia Domingu nian, komisaun organizadora husu kedan deskulpa ba Pároku no sarani sira, hodi konvida atu hotu-hotu bele halo marsa hosi Igreja Motael bá to’o iha resintu Semitériu Públiku Santa Cruz hodi tau ai-funan no komemora loron istóriku ne’e.

Jornalista: Vito Salvadór