Hatutan.com (12 Novembru 2023), Díli—Eis Prezidente Repúblika, Francisco Guterres Lú-Olo, preokupadu ho konstrusaun monumentu memoriál 12 Novembru Santa Cruz ne’ebé tinan rua resin ona to’o ohin loron seidauk finaliza, nune’e husu bá Ministériu Assuntu Kombatentes Libertasaun Nasionál (MAKLN) atu halo investigasaun bá kompañia.

Eis Prezidente da Repúblika, Francisco Guterres Lú-Olo ho espoza kari ai-funan iha Semitériu Santa Cruz, Díli perante serimónia komemorasaun Masakre Santa Cruz bá Dala-32, Domingu (12/11/2023). Foto: Elio dos Santos da Costa.

“Loloos konstrusaun monumentu Memoriál Santa Cruz ne’e prontu ona, maibé ita la hatene tanba saída mak to’o agora seidauk prontu. Parede, kalén taka sira nee mós tinan rua resin ona iha ne’e sei nafatin de’it. Tanba nee Estadu tenke husu-tuir responsabilidade kompañia ne’ebé kaer projetu ne’e,” Lú-Olo hateten iha semitériu Santa Crus, hafoin partisipa komemorasaun loron 12 Novembru, Domingu (12/11/2023).

Lee Mós: Gil “Oan Soru” Husu Bobolait Justifika Razaun Atraza Konstrusaun Monumentu 12 Novembru

Iha fatin hanesan, Prezidente Komité 12 Novermbru, Gregório Saldaha informa, durante ne’e Komité 12 Novembru ezije beibeik, halo krítika, hato’o liu hosi karta ba diretamente,  hasoru ona Governu responsável liu hosi MAKLN no agora prossesu la’o hela.

“Rezultadu hosi krítika no ezijénsia sira ne’e, iha ona pozisaun Governu nian, tanba Governu mak sai na’in ba prossesu ne’e. Komité 12 Novembru sai hanesan benefisiáriu, tanba ne’e maka desizaun Governu foti ona atu observa,” nia esplika.

Prezidente ne’e dehan, informasaun saída de’it mak parte Komité 12 Novembru hetan kona-bá konstrusaun la la’o ne’e iha hotu, maibé nia parte lakohi halo polémika, no he’in de’it Governu prossesa.

Jornalista: Gloria Maia