Hautan.com (12 Novembru 2023), Dili—Prezidente Komité 12 Novembru, Gregório Saldanha konsidera joven ohin loron difísil tebes atu hamutuk hodi harii unidade kompara ho joven rezisténsia sira tanba ohin loron ne’e joven sira iha interese barak liu.

Prezidente Komité 12 Novembru, Gregório Saldanha konversa hela ho Vise Primeiru Ministru, Mariano Assanami Sabino iha Komemorasaun Masakre Santa Cruz bá Dala-32 Ne’ebé hala’o iha Semitériu Santa Cruz, Díli, Domingu (12/11/2023). Foto: Elio dos Santos da Costa.

Gregório Saldanha hato’o ne’e iha diskursu durante serimónia komemorasaun loron 12 Novembru Masakre Santa Cruz ba dala-32, iha Semitériu Santa Cruz, Domingu (12/11/2023).

Lee Mós: 12 Novembru, Testemuña Espíritu Lutadór Foin-sa’e Timoroan

“Se ita halo komparasaun, ohin loron difísil tebes joven sira atu hamutuk tanba interese barak. Joven uluk interese bá buat ida de’it mak hakarak ukun aan. Interese ida ne’e maka domina ami joven sira uluk halo ami hamutuk. Ohin difísil la halimar, grupu barak ho interese barak,” nia halo komparasaun.

Iha momentu espesiál ida ne’e, iha komemorasaun loron Masakre Santa Cruz ba dala-32, nia konvida ema hotu-hotu hahú hosi katuas to’o labaraik, atu hakruk no husu deskulpa bá matebian hotu-hotu ne’ebé mate iha loron hanesan iha fatin ida-ne’e.

Husu deskulpa tanba, konsiente hahalok durante tempu naruk nia laran, keta iha buat ruma ne’ebé maka la loos karik, tenke hamutuk atu hadi’a nafatin.

“Husu ita hotu atu halo promessa bá matebian sira, liu-liu Joven sira atu hadi’a hahalok sira hotu inkluzivamente prátika violénsia até krime sira ne’ebé mak sei buras nafatin iha ita nia rain,” nia konvida.

Ema hotu-hotu servisu ho ida-idak nia knaar hanesan estudante, traballadór sira iha fatin hotu-hotu, nunee bele fó valór duni bá sira ne’ebé mak uluk mate ona ba rai ida-nee.

Tanba liu hosi ema ida-idak nia hahalok di’ak mak bele kontiribui bá dezenvolvimentu ba rai ida-ne’e, nune’e valoriza matebian sira, tanba sira mak martires loloos ba rai ida ne’e, sira mak erói loloos, to’o ohin loron ema hotu-hotu bele goza demokrasia ida-ne’e.

Dezenvolvimentu rai ne’e atu bá oin no atu hetan hakmatek maka, joven hotu-hotu tenke iha toleránsia makás, respeita-malu, respeita sira nia aan, labele husik sira nia an bá ema seluk aproveita, kuda unidade iha ida-idak nia an, rai ne’e bele lao ho hakmatek ba oin, ema nia nasaun bo-boot problema ema bele rezolve tanba saida nasaun kiik ida-ne’e labele rezolve.

Tanba ne’e nia husu atu identifika fukun loloos hosi problema, tenke fó ai-moruk hanesan respeita malu, foku bá dezenvolvimentu ba moris di’ak, tanba ida-ne’e mak alvu prinsipál.

Jornalista: Gloria Maia