Hatutan.com, (12 Novembru 2023), Díli—Primeiru-Ministru (PM) Kay Rala Xanana Gusmão ho Konsellu Ministru deside ona atu suspende atividade grupu arte-marsiál (GAM) ho grupu arte-rituál (GAR).

Lee Mós: Governu Kompromete Hasai Membru PNTL Sira hosi Grupu Oioin

Hosi Ministériu Interiór liu hosi Ministru Francisco da Costa Guterres, mós hatún ona despaxu bá Komandu Jerál Polísia Nasionál Timor-Leste (PNTL) atu   identifika  membru sira ne’ebé envolve iha GAM ho GAR.

Primeiru Ministru, Kay Rala Xanana Gusmão akompaña Prezdente PD, Mariano Assanami Sabino ba hasoru malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kinta (29/06/2023). Foto/Dok

Governu nia desizaun bá membru PNTL sira ne’ebé envolve iha GAM-GAR atu hili serbí instituisaun PNTL no serbí Estadu ka hili serbí GAM ho GAR. Tanba ne’e, iha serimónia loron proklamasaun independénsia, 28 fulan-Novembru ne’e, membru PNTL sira ne’ebé identifikadu nu’udár membru GAM ho GAR sei halo juramentu bá bandeira RDTL hodi serbí loos de’it Estadu no povu Timor-Leste.

Vise-Primeiru Ministru no Ministru Koordenadór asuntu Sosiál  e  Dezenvolvimetu Rurál, Mariano Assanami Sabino subliña katak  sé mak komete krime tenke responsabiliza tuir lei. Tanba ema hotu tenke hatene nia responsabilidade bainhira envolve an iha organizasaun ka instituisaun ida.

“Ha’u nia mensajen mak ne’e, desizaun Governu ne’e Primeiru-Ministru ho Konsellu Ministru mak deside,  maibe se husu ha’u nia pesoal mak ne’e, sé mak halo krimi bá hatan iha Tribunál,” Prezidente Partidu Demokrátiku (PD) ne’e hateten bá jornalista sira bainhira partisipa serimónia loron nasionál juventude iha Semitériu Santa Krús, Díli, Domingu (12/11/2023)

Sai ona segredu públiku katak Mariano Assanami Sabino nu’udár membru organizasaun arte-marsiál Persaudaraan Setia Hati Terate (PSHT) ne’ebé gradua (pengesahan)   iha tinan 2022.

Mariano Assanami Sabino afirma nia hanesan prezidente PD nu’udár PD nia ema, sé asume knaar iha instituisaun nia la’ós PD nia ema, maibé Estadu nia ema atu hala’o servisu no orientasaun Estadu nian.

“Ita tenke hatene tau an. Se ha’u arte-marsiál ha’u tenke hatene koloka sasaun tuir nia doutrina,” Mariano Assanami hateten.

Nia konsidera desizaun Governu nian suspende atividade arte-marsiál ho arte-rituál nu’udár oportunidade atu halo reflesaun no haree didi’ak estrutura organizaun nian hosi nasionál to’o baze.

“Laiha arte-marsiál ka arte-rituál ida mak  hanorin nia elementu sira bá baku ema, sunu ema nia uma to’o oho ema.. bainhira akontese buat sira ne’e maka ida ne’ebé envolve tenke responsabiliza tuir Lei.

Governante ne’e husu ba lider GAM no  GAR hotu, nafatin responsabilidade bá nia membru sira, apoiu kampu servisu bá sira hatu atu sira labele envolve an iha krimi.

Jornalista : Leopoldina de Carvalho